កញ្ញា សេង ធារី ជាមេធាវីខ្មែរ-អាមេរិកាំង ដែលត្រូវបានចាប់ខ្លួនជាងមួយឆ្នាំមកហើយនោះ ត្រូវបានបញ្ជូនចេញពីពន្ធនាគារក្នុងខេត្តព្រះវិហារ មកកាន់ពន្ធនាគារព្រៃសនៅរាជធានីភ្នំពេញវិញ តាមការស្នើសុំរបស់មេធាវីកញ្ញា។ នេះបើតាមមន្រ្តីជាន់ខ្ពស់ម្នាក់នៃអគ្គនាយកដ្ឋានពន្ធនាគារ។
កញ្ញា សេង ធារី ជាសកម្មជនម្នាក់ដែលត្រូវបានរដ្ឋាភិបាលអាមេរិកទាមទារឱ្យដោះលែង ចាប់តាំងពីកញ្ញាត្រូវបានចាប់ខ្លួន។ កញ្ញាត្រូវបានបញ្ជូនទៅឃុំខ្លួនក្នុងពន្ធនាគារនៅខេត្តព្រះវិហារ ដែលការណ៍នេះ អ្នកតាមដានមើលឃើញថា អាជ្ញាធរមិនចង់ឱ្យមានការតវ៉ាណាមួយនៅពន្ធនាគារក្នុងរាជធានីភ្នំពេញ។
លោក នុត សវនា អ្នកនាំពាក្យអគ្គនាយកដ្ឋានពន្ធនាគារនៃក្រសួងមហាផ្ទៃ ប្រាប់វីអូអេនៅថ្ងៃច័ន្ទនេះថា ការបញ្ជូនខ្លួនកញ្ញា សេង ធារី មកកាន់ពន្ធនាគារនៅទីក្រុងភ្នំពេញនេះ មិនមានហេតុផលអ្វីឡើយ ប៉ុន្តែជាការសម្រេចរបស់ថ្នាក់ដឹកនាំក្រសួងមហាផ្ទៃទៅតាមការស្នើសុំរបស់មេធាវី។
លោកថ្លែងថា៖ «អ៊ីចឹងសំណើនេះយើងមិនបានទុកចោលទេគឺខាងអគ្គនាយកដ្ឋានបានធ្វើជាសំណើសុំយោបល់ដឹកនាំពីថ្នាក់ដឹកនាំក្រសួង ហើយថ្នាក់ដឹកនាំក្រសួងលោកអនុញ្ញាត ទើបខាងអគ្គនាយកដ្ឋានពន្ធនាគារបានបញ្ជូនគាត់មករាជធានីភ្នំពេញ»។
បើតាមអ្នកនាំពាក្យរូបនេះ កញ្ញា សេង ធារី ត្រូវបានបញ្ជូនមកពន្ធនាគារព្រៃស ចាប់តាំងពីថ្ងៃទី២៣ ខែកញ្ញា ឆ្នាំ២០២៣មក។
មេធាវីការពារក្តីកញ្ញា សេង ធារី លោក សំ ចំរើន ប្រាប់វីអូអេថា ការបញ្ជូនមកឃុំខ្លួននៅរាជធានីភ្នំពេញនឹងធ្វើឱ្យមានភាពងាយស្រួលសម្រាប់ការទាក់ទងគ្នារវាងកូនក្តី និងមេធាវី។
លោកបញ្ជាក់ថា៖ «ខ្ញុំគ្រាន់តែថា ដោយសារតែរឿងក្តីរបស់គាត់នៅសាលាឧទ្ធរណ៍ភ្នំពេញ គាត់បានមកកៀកសាលាឧទ្ធរណ៍ភ្នំពេញ យើងងាយស្រួលទំនាក់ទំនងគ្នាប៉ុណ្ណឹងហើយ»។
នាយកទទួលបន្ទុកកិច្ចការទូទៅនៃអង្គការការពារសិទ្ធិមនុស្សលីកាដូ លោក អំ សំអាត លើកឡើងថា នេះជារឿងល្អសម្រាប់កញ្ញា សេង ធារី ដោយសារក្រុមគ្រួសារអាចសួរសុខទុក្ខកញ្ញាបានដោយស្រួល។ លោកជំរុញឱ្យរដ្ឋាភិបាលអាណត្តិទី៧មានយន្តការអ្វីមួយ ដើម្បីដោះលែងអ្នកជាប់ពន្ធនាគារ ដែលជាសកម្មជននយោបាយ និងសិទ្ធិមនុស្ស។
លោកថ្លែងថា៖ «វាជារឿងល្អមួយដែរ ហើយក៏ជារឿងចាប់ផ្តើមមួយដែរសម្រាប់រាជរដ្ឋាភិបាលអាណត្តិថ្មី ដើម្បីដោះស្រាយនូវបញ្ហារឿងចម្រូងចម្រាសទាក់ទងនឹងសិទ្ធិមនុស្ស និងលទ្ធិប្រជាធិបតេយ្យ។ គួរតែមានយន្តការណាមួយដើម្បីធ្វើការដោះលែងកញ្ញា សេង ធារី សកម្មជនគណបក្សនយោបាយផ្សេងដែលការចោទប្រកាន់និងការឃុំខ្លួនហ្នឹងគឺសហគមន៍អន្តរជាតិលើកឡើងថា វាមិនសមហេតុផល។ វាជាប់ពាក់ព័ន្ធទៅនឹងរឿងនយោបាយ»។
បើតាមលោក អំ សំអាត ការផ្ទេរកញ្ញា សេង ធារី ពីពន្ធនាគារក្នុងខេត្តព្រះវិហារមកភ្នំពេញវិញ ធ្វើឡើងក្រោយជំនួបរបស់លោកនាយករដ្ឋមន្ត្រី ហ៊ុន ម៉ាណែត និងអនុរដ្ឋមន្ត្រីការបរទេសស្តីទីរបស់សហរដ្ឋអាមេរិក អ្នកស្រី វ៉ិចតូរីយ៉ា នូលែន (Victoria Nuland) នៅទីក្រុងញូវយ៉ក កាលពីចុងខែកញ្ញា ដែលពេលនោះអាមេរិកបានសម្រេចផ្តល់ជំនួយប្រមាណ១៨លានដុល្លារមកកម្ពុជាវិញ ក្រោយសម្រេចផ្អាកកាលពីខែកក្កដា ឆ្នាំ២០២៣។
គួរបញ្ជាក់ថា កាលពីថ្ងៃទី១៤ ខែមិថុនា ឆ្នាំ២០២២ សាលាដំបូងរាជធានីភ្នំពេញបានសម្រេចផ្តន្ទាទោសកញ្ញា សេង ធារី ដាក់ពន្ធនាគារកំណត់៦ឆ្នាំ ពីបទរួមគំនិតក្បត់និងបទញុះញង់ឱ្យមានភាពវឹកវរធ្ងន់ធ្ងរដល់សន្តិសុខសង្គម ទាក់ទងនឹងផែនការមាតុភូមិនិវត្តន៍មិនជោគជ័យរបស់លោក សម រង្ស៊ី កាលពីចុងឆ្នាំ២០១៩។
ភ្លាមៗក្រោយការកាត់ទោស កញ្ញា សេង ធារី ត្រូវបានអាជ្ញាធរចាប់ខ្លួននៅរាជធានីភ្នំពេញ ខាងមុខតុលាការ ហើយត្រូវបានបញ្ជូនទៅឃុំខ្លួននៅពន្ធនាគារក្នុងខេត្តព្រះវិហារ។ កញ្ញា សេង ធារី បានប្តឹងទាស់នឹងការកាត់ទោសរបស់សាលាដំបូងរាជធានីភ្នំពេញ។ បច្ចុប្បន្ននេះ សំណុំរឿងរបស់កញ្ញាស្ថិតក្នុងដៃរបស់សាលាឧទ្ធរណ៍ ដែលមិនទាន់កំណត់ថ្ងៃបើកសវនាការនៅឡើយទេ៕
