សមាជិកសភាសហរដ្ឋអាមេរិកកំពុងពិនិត្យមើលកិច្ចព្រមព្រៀងមួយ ដើម្បីបង្កើនកម្រិតប្រាក់បំណុលរបស់សហរដ្ឋអាមេរិក នៅមុនការបោះឆ្នោតអនុម័តយល់ព្រមមួយ ដែលគេរំពឹងថា នឹងត្រូវធ្វើឡើងក្នុងពេលប៉ុន្មានថ្ងៃឆាប់ៗខាងមុខនេះ ស្របពេលដែលទាំងប្រធានាធិបតីនិងប្រធានរដ្ឋសភាសហរដ្ឋអាមេរិក បានជំរុញឱ្យពួកគេសម្រេចយល់ព្រមអនុម័តកិច្ចព្រមព្រៀងនេះ។
សេចក្តីស្នើនេះ រួមមានការលើកលែងពិដានបំណុលរហូតដល់ខែមករា ឆ្នាំ២០២៥ និងកិច្ចព្រមព្រៀងថវិការយៈពេល២ឆ្នាំ ដែលនឹងរក្សាការចំណាយសហព័ន្ធក្នុងឆ្នាំ២០២៤នៅដដែល ហើយនឹងបង្កើនប្រមាណត្រឹម១ភាគរយក្នុងឆ្នាំ២០២៥។
នៅក្នុងចំណោមចំណុចសម្របសម្រួលជាកញ្ចប់នោះ គឺការកាត់បន្ថយមូលនិធិខ្លះទៅលើការជ្រើសរើសថ្មីបន្ថែមទៀតនៃភ្នាក់ងារសេវាប្រមូលពន្ធឬ IRS លុបចោលថវិកាចំនួន៣០ពាន់លានដុល្លារសម្រាប់ការជួយទៅលើជំងឺកូវីដ១៩ និងធានាថា ពលរដ្ឋអាមេរិកដែលមានអាយុចន្លោះពី៤៩ទៅ៥៤ឆ្នាំមានលក្ខណៈសម្បត្តិការងារគ្រប់គ្រាន់ ក្នុងទទួលបានជំនួយស្បៀងអាហារជាដើម។
លោក Biden និងលោក McCarthy បានឯកភាពគ្នាលើកិច្ចព្រមព្រៀងនេះកាលពីថ្ងៃអាទិត្យ បន្ទាប់ពីមានការចរចាគ្នាអស់ពេលជាច្រើនសប្តាហ៍កន្លងមក ក្រោយកាលបរិច្ឆេទចុងក្រោយនៃថ្ងៃកំណត់ការបង្កើនពិដានបំណុលអាមេរិកខិតកាន់តែជិតនៅដើមខែមិថុនាខាងមុខ សម្រាប់រដ្ឋាភិបាល ដែលនឹងត្រូវអស់លុយដើម្បីបង់ថ្លៃសេវាផ្សេងៗ។
លោក Biden បាននិយាយនៅសេតវិមានថា «កិច្ចព្រមព្រៀងនេះបានបញ្ចៀសវិបត្តិដ៏ធ្ងន់ធ្ងរមួយដែលអាចកើតចេញពីការដែលរដ្ឋាភិបាលគ្មានលុយសងបំណុល និងជាលើកទី១នៅក្នុងប្រវត្តិសាស្ត្ររបស់សហរដ្ឋអាមេរិក។ កិច្ចព្រមព្រៀងនេះបានបញ្ចៀសការគំរាមកំហែងដ៏មហន្តរាយមួយ»។
ដោយឡែកប្រធានរដ្ឋសភាអាមេរិកលោក McCarthy ដែលកំពុងពិភាក្សាកិច្ចព្រមព្រៀងនេះនៅវិមានសភា និយាយថា «នៅទីបំផុតយើងអាចធ្វើការនេះរួមគ្នាដើម្បី ឆ្លងផុតរឿងនេះ»។
ខណៈពេលដែលមេដឹកនាំសហរដ្ឋអាមេរិកទាំងពីរគាំទ្រលើកិច្ចព្រមព្រៀងគ្នានេះ សមាជិកសភាបក្សប្រជាធិបតេយ្យដែលមានទស្សនៈឆ្វេងនិយមនិងគាំទ្រការកែទម្រង់ ក៏ដូចជាសមាជិកសភាគណបក្សសាធារណរដ្ឋស្តាំនិយម ក៏បានសម្តែងការប្រឆាំងរបស់គេភ្លាមៗផងដែរកាលពីថ្ងៃអាទិត្យម្សិលមិញ៕
ព័ត៌មានខ្លះនៅក្នុងសេចក្ដីរាយការណ៍នេះត្រូវបានដកស្រង់មកពីទីភ្នាក់ងារសារព័ត៌មាន AP, AFP និង Reuters។
