បាតុករដែលគាំទ្របេក្ខជនប្រធានាធិបតី Prabowo Subianto បានប្រយុទ្ធជាមួយកងកម្លាំងសន្តិសុខ ហើយមនុស្សយ៉ាងហោចណាស់៧នាក់ដែរបានស្លាប់។
ផ្លូវនានាក្នុងរដ្ឋធានីហ្សាកាតាមានភាពស្ងប់ស្ងាត់កាលពីថ្ងៃព្រហស្បត៍សប្តាហ៍មុន បន្ទាប់ពីមានការប៉ះទង្គិចរវាងប៉ូលិសនិងពួកអ្នកគាំទ្ររបស់បេក្ខជនដែលបានចាញ់ការបោះឆ្នោតប្រធានាធិបតីប្រទេសឥណ្ឌូនេស៊ី។
រដ្ឋាភិបាលបានដាក់ពង្រាយមន្រ្តីប៉ូលិសរាប់ពាន់នាក់ដើម្បីដោះស្រាយអំពើហឹង្សាដែលបានរាលដាលអស់រយៈពេល២យប់។ អំពើហិង្សាបានធ្វើឲ្យមនុស្សយ៉ាងតិចណាស់៧នាក់ដែរស្លាប់ ហើយជាង២រយនាក់ទៀតរងរបួស។
ប្រធានាធិបតីឥណ្ឌូនេស៊ីលោក Joko Widodo បានជាប់ឆ្នោតម្តងទៀតដោយបានផ្តួលលោក Prabowo Subianto អតីតឧត្តមសេនីយ៍ដោយសំឡេងឆ្នោត ៥៥ភាគរយទល់នឹង ៤៥ភាគរយ ប៉ុន្តែលោក Prabowo មានគម្រោងជំទាស់នៅតុលាការធម្មនុញ្ញប្រឆាំងនឹងលទ្ធផលបោះឆ្នោតនេះកាលពីថ្ងៃព្រហស្បត៍សប្តាហ៍មុន។ លោកបានចោទប្រកាន់ថា មានការលួចបន្លំសន្លឹកឆ្នោតដ៏ច្រើន ក៏ប៉ុន្តែលោកមិនបានផ្តល់ភស្តុតាងដែលអាចគួរឲ្យទុកចិត្តបានទេ។
លោកប្រធានាធិបតី Widodo បានថ្កោលទោសអំពើហិង្សាក្រោយការបោះឆ្នោត ហើយបាននិយាយថា លោកនឹងមិនអត់ឱនដល់ជនណាម្នាក់ដែលបានរំខានដល់ដំណើរការប្រជាធិបតេយ្យរបស់ឥណ្ឌូនេស៊ីទេ។
លោកប្រធានាធិបតីបានប្រាប់ពួកអ្នកយកព័ត៌មានថា «យើងនឹងមិនអនុញ្ញាតឲ្យមានកុប្បកម្មទេ ជាពិសេសអ្នកដែលនឹងធ្វើឲ្យប៉ះពាល់ប្រទេសឥណ្ឌូនេស៊ី»។
លោក Didi Prasetyo អ្នកនាំពាក្យប៉ូលិសជាតិបានប្រាប់ VOA ថា ការតវ៉ាប្រឆាំងបានក្លាយជាអំពើហិង្សាកាលពីយប់ថ្ងៃអង្គារ ហើយបានបន្តចូលមកថ្ងៃពុធសប្តាហ៍មុន។ មនុស្សរាប់សិបនាក់បានត្រូវចាប់ខ្លួន។
ថ្លែងទៅកាន់ពួកអ្នកយកព័ត៌មានកាលពីយប់ថ្ងៃពុធសប្តាហ៍មុន លោក Prabowo បេក្ខជនប្រធានាធិបតីបានសម្តែងនូវការរំលែកមរណទុក្ខដល់អ្នកដែលត្រូវបានគេសម្លាប់នៅក្នុងការតវ៉ាប្រឆាំងនោះ។
លោកបាននិយាយថា «យើងគាំទ្រមធ្យោបាយខាងសីលធម៌និងស្របតាមរដ្ឋធម្មនុញ្ញ ដែលជាសន្តិវិធីនិងអហិង្សានៅក្នុងការប្រយុទ្ធខាងនយោបាយដើម្បីប្រទេសរបស់យើងនេះ។ ខ្ញុំសុំអង្វរដល់សមាជិកទាំងអស់ដែលតាមបំណងប្រាថ្នារបស់ខ្លួន និងប៉ូលិស កងកម្លាំងប្រដាប់អាវុធ និងពលរដ្ឋផ្សេងៗទៀត ត្រូវទប់ខ្លួនកុំប្រព្រឹត្តអំពើហិង្សា ឬសូម្បីអំពើហិង្សាដោយពាក្យសម្តីនិងសកម្មភាពផ្សេងៗ ដែលជាការបង្កហេតុ»។
កាលពីដើមសប្តាហ៍មុន លោកបានជំរុញឲ្យពួកអ្នកគាំទ្ររបស់លោកបង្ហាញការគាំទ្ររបស់ខ្លួនដោយសន្តិវិធី។ លោកបាននិយាយថា «វិធានការរបស់យើងត្រូវតែស្របទៅតាមរដ្ឋធម្មនុញ្ញ ប្រជាធិបតេយ្យ សន្តិវិធី និងគ្មានអំពើហឹង្សា។ អ្នកដែលនៅមានជំនឿលើរូបខ្ញុំ និងមិត្តភក្តិរបស់ខ្ញុំនៅទីនេះ យើងមិនមែនប្រយុទ្ធដើម្បីផលប្រយោជន៍ផ្ទាល់ខ្លួនទេ ក៏ប៉ុន្តែយើងប្រយុទ្ធដើម្បីអធិបតេយ្យភាពរបស់ប្រជាពលរដ្ឋ ដើម្បីលទ្ធិប្រជាធិបតេយ្យ ដើម្បីឯករាជ្យភាពរបស់ឥណ្ឌូនេស៊ី ដើម្បីរួចផុតពីការត្រួតត្រាក្នុងទម្រង់ណាមួយ»។
លោក Argo Yuwono អ្នកនាំពាក្យប៉ូលិសក្រុងហ្សាកាតា បានប្រាប់ VOAថា ប៉ូលិសយ៉ាងហោចណាស់ ៥ម៉ឺននាក់ដែរ បានត្រូវដាក់ពង្រាយសម្រាប់ការតវ៉ាប្រឆាំងដែលមានការគ្រោងទុក៕
ប្រែសម្រួលដោយជឹង ប៉ូជីន
