ភរិយារបស់លោក Umar Madi បានប្រាប់លោកឲ្យឈប់ធ្វើការ ប៉ុន្តែលោកមិនចង់នោះទេ។ ក្នុងវ័យ៦៤ឆ្នាំ លោក Umar Madi គឺជាមន្ត្រីរៀបចំការបោះឆ្នោតម្នាក់នៅតំបន់ក្រុងហ្សាកាតាខាងលិច (West Jakarta) ដែលមានតួនាទីក្នុងការតាមដាន និងរាប់សន្លឹកឆ្នោត នៅក្នុងការបោះឆ្នោតប្រធានាធិបតីនិងសភា កាលពីថ្ងៃទី១៧ ខែមេសា។ លោក Umar បានចេញទៅធ្វើការនៅម៉ោង៦ព្រឹក គឺ១ម៉ោង មុនពេលការបោះឆ្នោតបានចាប់ផ្តើម និងឈប់ធ្វើការនៅម៉ោង ១០ព្រឹកនៅថ្ងៃបន្ទាប់។ លោកមិនបានគេងនោះទេនៅយប់នោះ។
នៅថ្ងៃទី២៤ ខែមេសា លោកទើបបានក្រោកពីគេងដើម្បីធ្វើការអធិដ្ឋានមិនបានប៉ុន្មានផង ក៏ស្រាប់តែសន្លប់នៅក្នុងដៃរបស់ភរិយាលោក។ លោកត្រូវបានបញ្ជូនទៅកាន់មន្ទីរនៅក្បែរនោះ ហើយទទួលបានការបានការព្យាបាលសង្គ្រោះបន្ទាន់ មុនពេលលោកស្លាប់នៅ ២ ថ្ងៃក្រោយមក។ លោកបានបន្សល់ទុកនូវ ភរិយា កូន ២ នាក់របស់លោក និងចៅ ៣ នាក់របស់លោក។
កូនស្រីរបស់លោក Umar គឺនាង Evi Erwiyati បានប្រាប់ VOA ថា៖ «បន្ទាប់ពីបោះឆ្នោតចប់ លោកនៅតែធ្វើការ។ គាត់ចង់ធ្វើឲ្យប្រាកដថា សន្លឹកឆ្នោតទាំងអស់ត្រូវបានយាម និងមានសុវត្ថិភាព។ គាត់ក៏បានត្អូញត្អែរថា គាត់ហត់ខ្លាំងណាស់ និងមិនព្រមញ៉ាំអាហារនោះទេ»។
លោក Umar ជាមន្ត្រីម្នាក់ក្នុងចំណោមមន្ត្រីរៀបចំការបោះឆ្នោតជាង ៣០០ នាក់ដែលគេបានរាយការណ៍ថា បានស្លាប់ដោយសារតែជំងឺទាក់ទងនឹងការហត់អស់កម្លាំងខ្លាំង។ ក្នុងករណីរបស់លោក Umar កូនស្រីរបស់លោកបាននិយាយថា ការវិនិច្ឆ័យរោគគឺរកឃើញថា លោកមានជំងឺដាច់សសៃឈាមក្នុងខួរក្បាល (stroke)។ លោកក៏មានបញ្ហាបេះដូងផងដែរ ប៉ុន្តែនៅពេលនោះ បេះដូងមិនមានបញ្ហានោះទេ។
នាង Evi បាននិយាយថា៖ «ម្តាយរបស់ខ្ញុំយកថ្នាំទៅឲ្យគាត់ ប៉ុន្តែគាត់មិនព្រមឈប់ធ្វើការនោះទេ។ គាត់សប្បាយចិត្តនឹងធ្វើការនោះ»។
លោក Arief Priyo Susanto អ្នកនាំពាក្យរបស់គណៈកម្មាការរៀបចំការបោះឆ្នោតជាតិបានបញ្ជាក់ប្រាប់ VOA ពីចំនួននៃការស្លាប់នេះ។ លោកបាននិយាយថា៖ «ជាទូទៅ មូលហេតុនៃការស្លាប់ គឺដោយសារតែជំងឺហត់អស់កម្លាំង»។ មនុស្សជាង ២.០០០ នាក់ផ្សេងទៀតក៏ត្រូវបានគេរាយការណ៍ថា បានធ្លាក់ខ្លួនឈឺ។
ការស្លាប់ទាំងនេះមិនមែនជាហេតុការណ៍ល្អទេ សម្រាប់បញ្ចប់ការបោះឆ្នោតនៅឥណ្ឌូណេស៊ី ដែលនេះជាការបោះឆ្នោតពីរក្នុងពេលតែមួយជាលើកដំបូង ចាប់តាំងពីមានការបោះឆ្នោតបែបប្រជាធិបតេយ្យក្នុងប្រទេសឥណ្ឌូណេស៊ី កាលពី ២ ទស្សវត្សរ៍មុន។ ការបោះឆ្នោតប្រធានាធិបតីបែបប្រជាធិបតេយ្យដំបូងគេបង្អស់ធ្វើឡើងនៅក្នុងឆ្នាំ ២០០៤។ មនុស្សជាច្រើនយល់ថា ការបោះឆ្នោតនៅឆ្នាំនេះជា «ជោគជ័យនៃលទ្ធិប្រជាធិបតេយ្យ» ដោយមានមនុស្ស ១៩៣ លាននាក់ចេញទៅបោះឆ្នោត នៅតាមការិយល័យបោះឆ្នោតចំនួន ៨១០.០០០។
បើយោងតាមការរាប់សន្លឹកឆ្នោតភ្លាមៗ លទ្ធផលបង្ហាញថា លោកប្រធានាធិបតី Joko Widodo បានយកឈ្នះគូប្រកួតរបស់លោក គឺលោកឧត្តមសេនីយ៍ឯក Prabowo Subianto ដែលជាអតីតមេបញ្ជាការយោធា។
ដូចមន្ត្រីផ្សេងទៀតដែរ លោក Umar ទទួលបាន ៣៥ ដុល្លារ សម្រាប់ការងារដ៏ច្រើន រួមទាំងការរាប់សន្លឹកឆ្នោតដោយដៃ និងការតាមដានសន្លឹកឆ្នោតទាំងនេះ។
នាង Titi Anggraini ដែលជានាយកប្រតិបត្តិរបស់អង្គការឃ្លាំមើលឈ្មោះសមាគមសម្រាប់ការបោះឆ្នោត និងប្រជាធិបតេយ្យនិយាយថា ប្រាក់ ៣៥ ដុល្លារនេះមិនគ្រប់គ្រាន់នោះទេ។ នាង Titi និយាយថា៖ «ការបោះឆ្នោតត្រូវបានធ្វើឡើងដោយមានសន្លឹកឆ្នោត ៥ ប្រភេទផ្សេងៗគ្នា សម្រាប់តំណែងប្រធានាធិបតី និងតំណាងរាស្ត្រ។ ការណ៍ដែលធ្វើការពីរក្នុងពេលតែមួយបែបនេះបានបណ្តាលឲ្យមានការស្លាប់ទាំងនេះ»។
នៅក្នុងឆ្នាំនេះ គណៈកម្មាការរៀបចំការបោះឆ្នោតបានបន្ថយអាយុអប្បរមាសម្រាប់មន្ត្រីរៀបចំការបោះឆ្នោត ដោយបន្ថយពី ២៥ ឆ្នាំ ទៅ ១៧ ឆ្នាំ។ បើតាមនាង Titi ការធ្វើបែបនេះ រួមជាមួយនឹងការបន្ថយចំនួនអ្នកបោះឆ្នោតនៅក្នុងមណ្ឌលនីមួយៗ ត្រូវបានសង្ឃឹមថា អាចជួយសម្រាលភាពហត់នឿយរបស់មន្ត្រីនីមួយៗ។
នាងនិយាយថា៖ «ប៉ុន្តែវិធានការនេះមិនមានប្រសិទ្ធភាពនោះទេ ដោយសារតែវានៅមានបញ្ហាជាមួយនឹងចំនួនសន្លឹកឆ្នោតដែលមិនគ្រប់គ្រាន់ និងចំនួនគណបក្សនយោបាយ ហើយអ្នកឈរឈ្មោះក៏មានការកើនឡើងដែរ»។
នាងបានបន្ថែមថា៖ «មន្ត្រីរៀបចំការបោះឆ្នោតត្រូវតែទទួលបានការលើកទឹកចិត្តគ្រប់គ្រាន់។ បើគេមិនទទួលបានប្រាក់គ្រប់គ្រាន់សម្រាប់អ្វីដែលពួកគេបានធ្វើនោះទេ រដ្ឋាភិបាលត្រូវផ្តល់សំណងដល់សាច់ញាតិ ដែលបន្សល់ទុកក្រោយពីការស្លាប់របស់ពួកគេ»។
លោក Arief បានប្រាប់ VOA ថា ប្រាក់សំណងច្រើនបំផុតសម្រាប់សាច់ញាតិរបស់មន្ត្រីដែលបានស្លាប់មានចំនួនជាង ២.១០០ ដុល្លារ។ នៅថ្ងៃទី២៣ ខែមេសា ក្រសួងសុខាភិបាលបានចេញសារាចរណ៍ណែនាំមួយដល់មន្ទីរពេទ្យ និងកន្លែងផ្តល់សេវាសុខាភិបាលផ្សេងទៀត ឲ្យធ្វើការយកចិត្តទុកដាក់ឲ្យបានដិតដល់បំផុតចំពោះមន្ត្រីដែលមានជំងឺ។
ក្តីបារម្ភអំពីដំណើរការបោះឆ្នោតពីរក្នុងពេលតែមួយបានធ្វើឲ្យមានការពិភាក្សាគ្នាអំពីកំណែទម្រង់។ លោក Ace Hasan Syadzily ដែលជាអ្នកនាំពាក្យរបស់ក្រុមយុទ្ធនាការរបស់លោក Joko បានប្រាប់ដល់អ្នកសារព័ត៌មានថា៖ «យើងត្រូវតែវាយតម្លៃលើការបោះឆ្នោតពីរក្នុងពេលតែមួយ ជាពិសេសគឺត្រូវអនុវត្តយ៉ាងដូចម្តេច។ លោក Joko បានចែករំលែកទុក្ខដល់ក្រុមគ្រួសារមន្ត្រីរៀបចំការបោះឆ្នោតដែលបានស្លាប់(កាលពីសប្តាហ៍មុន)។ លោកបាននិយាយថា៖ «ខ្ញុំគិតថា ក្រុមមន្ត្រីទាំងនេះគឺជាអ្នកតស៊ូប្រយុទ្ធដើម្បីលទ្ធិប្រជាធិបតេយ្យ»។
គណៈកម្មការរៀបចំការបោះឆ្នោតនឹងបញ្ចប់ដំណើរការរាប់សន្លឹកឆ្នោតនៅថ្ងៃទី២២ ខែឧសភា ខាងមុខ។
នៅក្នុងការបោះឆ្នោតកាលពី៥ឆ្នាំមុន ដែលពេលនោះគេធ្វើការបោះឆ្នោតប្រធានាធិបតី និងបោះឆ្នោតតំណាងរាស្ត្រផ្សេងគ្នា មានមនុស្សជាង ១៥០ នាក់បានស្លាប់។ នាង Titi បាននិយាយថា ក្រុមមន្ត្រីទាំងនោះ៖ «មិនត្រឹមតែយាមការពារការបោះឆ្នោតនោះទេ ប៉ុន្តែក៏ការពារឆន្ទៈរបស់ឥណ្ឌូណេស៊ីក្នុងនាមជាប្រទេសប្រជាធិបតេយ្យផងដែរ»។
នាង Evi កូនស្រីរបស់លោក Umar យល់ស្របចំពោះគំនិតខាងលើនេះ។
នាងនិយាយថា៖ «នៅពេលឪពុកខ្ញុំតាំងចិត្តធ្វើអ្វីមួយ គាត់តែងតែយល់ថា គាត់មានទំនួលខុសត្រូវចំពោះការងារនោះ។ គាត់នឹងមិនមកផ្ទះនោះទេ ប្រសិនបើការងារទាំងអស់មិនទាន់ត្រូវបានបញ្ចប់។ គាត់ធ្វើយ៉ាងនេះ ដើម្បីកុំឲ្យមនុស្សម្នាមានការសង្ស័យចំពោះការងាររបស់គាត់។ ខ្ញុំមានមោទនភាពដែលនៅទីបំផុតគាត់ត្រូវបានគេស្គាល់ (ឬចងចាំ) ដោយសារតែ (ការមាន) វិន័យខ្ពស់របស់គាត់»៕
ប្រែសម្រួលដោយ ប៊ុន ប៉េងហ៊ុយ
