បុរីវ៉ាទីកង់បានឱ្យដឹងថាសម្តេចប៉ាប ហ្វ្រង់ស៊ីស មានគោលបំណងពង្រឹងចំណងទាក់ទងជាមួយនឹងមេដឹកនាំសាសនាអ៊ីស្លាម ក្នុងអំឡុងពេលដំណើរទស្សនកិច្ចរយៈពេលបីថ្ងៃទៅប្រទេសតួកគីដែលបានចាប់ផ្តើមនៅថ្ងៃសុក្រនេះ។
មន្ត្រីនានានិយាយថាការអត់អោនខាងផ្នែកសាសនា និងការវាយប្រយុទ្ធនឹងក្រុមជ្រុលនិយមនឹងស្ថិតនៅក្នុងរបៀបវារៈកំពូលនៅពេលដែលសម្តេចប៉ាបជួបពិភាក្សាជាមួយនឹងលោកប្រធានាធិបតីតួកគី Recep Tayyip Erdogan និងមេដឹកនាំសាសនា Mehmet Gormez។ តួកគីជាប្រទេសដែលពលរដ្ឋភាគច្រើនកាន់សាសនាអ៊ីស្លាម ប៉ុន្តែតាមរដ្ឋធម្មនុញ្ញគឺជាប្រទេសដែលមានសាសនាច្រើន។
ដំណើរទស្សនកិច្ចកើតមានឡើងក្នុងខណៈពេលដែលមានភាពតានតឹងជាថ្មីរវាងអ្នកកាន់សាសនាអ៊ីស្លាមនិងគ្រិស្តសាសនា និងក្រុមសកម្មប្រយុទ្ធរដ្ឋអ៊ីស្លាមបានកាន់កាប់តំបន់ជាច្រើនក្នុងប្រទេសអ៊ីរ៉ាក់និងស៊ីរី ដោយរុញច្រានជនភៀសខ្លួនប្រហែលជា១លាន៦សែននាក់ឆ្លងកាត់ព្រំដែនចូលក្នុងប្រទេសតួកគី៕
