នៅក្នុងសប្តាហ៍នេះ លោករដ្ឋមន្ត្រីការបរទេសស.រ.អា. Mike Pompeo នឹងធ្វើដំណើរលើកទីបីទៅកាន់ក្រុង Pyongyang នៅពេលមានកង្វល់ថាប្រទេសកូរ៉េខាងជើងហាក់ដូចជាបង្កើនសមត្ថភាពកន្លែងនុយក្លេអ៊ែរនិងកន្លែងកាំជ្រួចមីស៊ីលរបស់ខ្លួន និងមិនបានរុះរើកន្លែងទាំងនោះទេ។
លោក Pompeo ដែលបានទៅបំពេញទស្សនកិច្ចដំបូងរបស់លោកក្នុងប្រទេសកូរ៉េខាងជើងកាលពីពេលមុននេះក្នុងឆ្នាំនេះក្នុងឋានៈជានាយកនៃទីភ្នាក់ងារស៊ើបការសម្ងាត់ CIA នឹងស្ថិតក្នុងក្រុង Pyongyang ពីថ្ងៃព្រហស្បតិ៍រហូតដល់ថ្ងៃសៅរ៍។
ដំណើរទស្សនកិច្ចរបស់លោកធ្វើឡើងនៅក្រោយការពិភាក្សាកាលពីថ្ងៃអាទិត្យនៅឯតំបន់គ្មានកងទ័ពនៃប្រទេសកូរ៉េរវាងលោក Sung Kim ឯកអគ្គរដ្ឋទូតស.រ.អា.ប្រចាំប្រទេសហ្វីលីពីន និងពួកមន្ត្រីកូរ៉េខាងជើង។
នេះជាលើកដំបូងដែលគេបានដឹងថា ពួកមន្ត្រីស.រ.អា. និងកូរ៉េខាងជើងបានជួបគ្នាចាប់តាំងពីលោកប្រធានាធិបតី Donald Trump បានធ្វើការចរចាជាមួយលោក Kim Jung Un នៅក្នុងប្រទេសសិង្ហបុរីកាលពីថ្ងៃទី១២ខែមិថុនា។
អ្នកស្រី Sarah Huckabee Sanders អ្នកនាំពាក្យសេតវិមានបាននិយាយនៅក្នុងការឆ្លើយតបនឹងសំណួរមួយរបស់ VOA នៅក្នុងសន្និសីទកាសែតមួយកាលពីថ្ងៃចន្ទថា «យើងនៅតែបន្តធ្វើឱ្យមានការជឿនលឿនតទៅទៀត។ យើងមានជំនួបល្អប្រសើរកាលពីម្សិលមិញ។ លោករដ្ឋមន្ត្រីការបរទេសនឹងស្ថិនៅទីនោះក្នុងសប្តាហ៍នេះដើម្បីបន្តការពិភាក្សាទាំងនោះ»។
ក៏ប៉ុន្តែទោះជាយ៉ាងណាក៏ដោយក៏អ្នកស្រី Sanders បានប្រកែកមិនព្រមពិភាក្សាអំពីរបាយការណ៍នានាដែលនិយាយយោងដល់ព័ត៌មានបានមកពីពួកមន្ត្រីខាងការស៊ើបការសម្ងាត់ស.រ.អា. និងរួបថតដោយផ្កាយវិទ្យាសាស្ត្រពាណិជ្ជកម្មដែលថាកូរ៉េខាងជើងនៅតែបន្តកែលម្អកម្មវិធីនុយក្លេអ៊ែរនិងកម្មវិធីកាំជ្រួចមីស៊ីលមានវង់ប្រតិបត្តិការឆ្ងាយរបស់ខ្លួន៕
