កាលពីថ្ងៃពុធម្សិលមិញ ព្រឹទ្ធសភាសហរដ្ឋអាមេរិកបានបោះឆ្នោតក្នុងសំឡេង ៦៣ ទល់នឹង ៣៧ ដើម្បីអនុម័តច្បាប់ដែលមានបំណងបញ្ចប់ការប្រឡូករបស់សហរដ្ឋអាមេរិកនៅក្នុងសង្គ្រាម ដែលដឹកនាំដោយប្រទេសអារ៉ាប៊ីសាអ៊ូឌីតក្នុងប្រទេសយេម៉ែន។
ការបោះឆ្នោតនេះគឺជាភស្តុតាងនៃទស្សនៈផ្ទុយគ្នារវាងសេតវិមាន និងសមាជិកសភាទាក់ទិននឹងប្រទេសអារ៉ាប៊ីសាអ៊ូឌីត ទោះបីជាបន្ទាប់ពីសមាជិកកំពូលពីររូបនៃក្រុមសន្តិសុខជាតិរបស់លោកប្រធានាធិបតី Donald Trump ជូនដំណឹងសម្ងាត់ទៅដល់ព្រឹទ្ធសភាពេញអង្គ។
រយៈពេលជិត២ខែ បន្ទាប់ពីអ្នកកាសែតអារ៉ាប៊ីសាអ៊ូឌីតលោក Jamal Khashoggi ត្រូវបានសម្លាប់នៅស្ថានកុងស៊ុលអារ៉ាប៊ីសាអ៊ូឌីតក្នុងប្រទេសតួកគី រដ្ឋមន្ត្រីការបរទេសអាមេរិកលោក Mike Pompeo និងរដ្ឋមន្ត្រីការពារប្រទេសលោក Jim Mattis បានជំរុញឲ្យរក្សាទំនាក់ទំនងជិតស្និទ្ធជាប្រវត្តិសាស្ត្រជាមួយនឹងរដ្ឋាភិបាលអារ៉ាប៊ីសាអ៊ូឌីត ដែលក្នុងនោះរួមទាំងការគាំទ្ររបស់សហរដ្ឋអាមេរិកសម្រាប់យុទ្ធនាការយោធា ដែលដឹកនាំដោយប្រទេសអារ៉ាប៊ីសាអ៊ូឌីតក្នុងប្រទេសយេម៉ែនផងដែរ។
សារនោះមិនសូវត្រូវគេខ្វាយខ្វល់នោះទេ ដោយសារតែសមាជិកព្រឹទ្ធសភានៃគណបក្សទាំងពីរមិនពេញចិត្តចំពោះការមិនដាក់បញ្ចូលលោកស្រី Gina Haspel ប្រធានទីភ្នាក់ងារ CIA ទៅក្នុងការប្រជុំបិទទ្វារអំពីព័ត៌មានសម្ងាត់នេះ។ ទីភ្នាក់ងារ CIA ត្រូវបានគេរាយការណ៍ថា បានសន្និដ្ឋានថា ព្រះអង្គម្ចាស់រជ្ជទាយាទ Mohammed Bin Salman នៃប្រទេសអារ៉ាប៊ីសាអ៊ូឌីត ជាអ្នកបញ្ជាឲ្យមានការសម្លាប់លោក Jamal Khashoggi។
លោក Pompeo បាននិយាយថា ផ្អែកលើព័ត៌មានសម្ងាត់ដែលលោកបានឃើញ គ្មានភស្តុតាងណាមួយដែលបញ្ជាក់ថា ព្រះអង្គម្ចាស់ Bin Salman មានការពាក់ព័ន្ធដោយផ្ទាល់ជាមួយនឹងករណីឃាតកម្មលើលោក Khashoggi នោះទេ។
លោក Pompeo ក៏បានប្រឆាំងខ្លាំងក្លាផងដែរចំពោះសេចក្ដីសម្រេចដែលចង់រារាំងសហរដ្ឋអាមេរិកមិនឲ្យគាំទ្រសកម្មភាពរបស់ប្រទេសអារ៉ាប៊ីសាអ៊ូឌីតនៅក្នុងប្រទេសយេមែន ដោយលោកអះអាងថាវានឹងបំផ្លាញដល់កិច្ចប្រឹងប្រែងដើម្បីបញ្ចប់សង្គ្រាមស៊ីវិលបំផ្លិចបំផ្លាញនៅក្នុងប្រទេសយេម៉ែន៕
