លោករដ្ឋមន្ត្រីការបរទេសស.រ.អា. Mike Pompeo បានមានប្រសាសន៍ថា «ការជឿនលឿនពិតប្រាកដ»បានត្រូវធ្វើឱ្យមានឡើងនៅក្នុងកិច្ចចរចាកាលពីថ្ងៃព្រហស្បតិ៍ជាមួយភូឈួយជាន់ខ្ពស់របស់មេដឹកនាំកូរ៉េខាងជើង គីម ជុងអ៊ុននៅក្នុងបុរីញូវយ៉ក ឆ្ពោះទៅកាន់ការធ្វើឱ្យមានជំនួបកំពូលមួយរវាងលោក គីម ជុងអ៊ុន និងប្រធានាធិបតីស.រ.អា. ដូណាល់ ត្រាំ។
លោក Pompeo បានមានប្រសាសន៍នៅក្នុងសន្និសីទកាសែតមួយនៅក្រោយជំនួបនេះថា «យើងបានធ្វើឱ្យមានការជឿនលឿនពិតប្រាកដក្នុងរយៈពេល៧២ម៉ោងមុននេះក្នុងការដាក់លក្ខខណ្ឌ»។ លោកបាននិយាយបន្ថែមថា «មានកិច្ចការច្រើនត្រូវធ្វីថែមទៀត»។
លោក Pompeo បានមានប្រាសាសន៍ថាលោកមានជំនឿថាប្រទេសកូរ៉េខាងជើងកំពុងសម្លឹងមើលមាគ៌ាយុទ្ធសាស្ត្រថ្មីមួយទៅមុខ ក៏ប៉ុន្តែលោកបាននិយាយដោយប្រុងប្រយ័ត្នថា ប្រទេសកូរ៉េខាងជើងនឹង«ត្រូវជ្រើសរើសមាគ៌ាមួយដែលប្លែកពីមុន»ដើម្បីឱ្យបានសម្រេចសន្តិសុខដែលមានន័យថាការធ្វើមិនឱ្យមានអាវុធនុយក្លេអ៊ែរទាំងស្រុង អាចត្រួតពិនិត្យបាននិងមិនអាចប្រែក្រឡះបានឡើយ។
លោក Pompeo បាននិយាយឱ្យមានការប្រុងប្រយ័ត្នថា «ប្រទេសទាំងពីររបស់យើងប្រឈមនឹងពេលវេលាសំខាន់ក្រៃលែងមួយនៅក្នុងទំនាក់ទំនងរបស់យើងដែលនៅក្នុងនោះវាអាចគ្មានអ្វីក្រៅពីការសោកស្តាយដោយខ្លោចផ្សាដែលបានធ្វើឱ្យបាត់បង់ឱកាសនេះ»។
លោករដ្ឋមន្ត្រីការបរទេសអាមេរិកាំងរូបនេះបាននិយាយថាលោក Kim Yong Chol ដែលជាមន្ត្រីកូរ៉េខាងជើងថ្នាក់ខ្ពស់បំផុតដែលមកបំពេញទស្សនកិច្ចក្នុងស.រ.អា.ក្នុងរយៈពេល១៨ឆ្នាំគ្រោងនឹងធ្វើដំណើរមកកាន់រដ្ឋធានីវ៉ាស៊ីនតោន នៅថ្ងៃសុក្រនេះ ដើម្បីប្រគល់លិខិតផ្ទាល់ខ្លួនមួយពីលោក គីម ជុងអ៊ុន ជូនលោកប្រធានាធិបតី ត្រាំ។
លោក Pompeo និងលោក Kim Yong Chol បានជួបគ្នានៅក្នុងផ្ទះ Appartement មួយជួលដោយរដ្ឋាភិបាលស.រ.អា.នៅជិតស្នាក់ការកណ្ដាលអង្គការសហប្រជាជាតិ។ លោកទាំងពីរនាក់នេះបានធ្វើការចរចាគ្នានៅពេលពិសារអាហារពេលយប់មានបន្ទះសាច់គោអាំងកាលពីថ្ងៃពុធនិងពិសារ croissants chocolat នៅព្រឹកថ្ងៃព្រហស្បតិ៍។
កាលពីពេលមុនអស់លោកទាំងពីរនាក់នេះបានជួបគ្នាពីរដងនៅក្នុងក្រុងព្យុងយ៉ាង។
កាលពីពេលមុននេះ លោកប្រធានាធិបតី ដូណាល់ ត្រាំ បាននិយាយថាកិច្ចចរចាគ្នារវាងលោក Pompeo និងលោក Kim Yong Chol មានដំណើរការល្អហើយលោកសង្ឃឹមថានឹងធ្វើជំនួបកំពូលជាមួយលោក គីម ជុងអ៊ុន នៅថ្ងៃទី១២ខែមិថុនា តាមការកំណត់កាលពីដំបូង។ លោក ត្រាំ បានថ្លែងថាលោកទន្ទឹងចង់ឃើញអ្វីនៅក្នុងលិខិតដែលគណៈប្រតិភូកូរ៉េខាងជើងនាំមកកាន់រដ្ឋធានីវ៉ាស៊ីនតោន៕
