អ្នកនយោបាយកម្ពុជាគួរតែចាប់ផ្តើមជជែកគ្នាពីគោលនយោបាយការបរទេសរបស់ខ្លួនដើម្បីបានជំហររួមមួយក្នុងការទាក់ទងជាមួយនឹងប្រទេសជិតខាង និងមហាអំណាច ជាជាងការក្លាយទៅជា«កូនត្រី»នៅក្នុងក្រឡាអុករបស់មហាអំណាច។ នេះបើតាមការលើកឡើងរបស់អ្នកវិភាគនយោបាយកម្ពុជា។
លោក អ៊ូ វីរៈ ប្រធាន និងជាស្ថាបនិកវេទិកាអនាគតបានរំឭកថា ការងាកតែមករកប្រទេសចិនឬអាមេរិកខ្លាំងពេកនាំឱ្យកម្ពុជាក្លាយជាប្រទេសដែល បម្រើផលប្រយោជន៍ឱ្យគេតែក្នុងរយៈពេលខ្លីប៉ុណ្ណោះ។
លោកបានចោទសួរថា៖
«បើសិនគ្រប់គ្នា ម្នាក់ៗដណ្តើមគ្នាទៅឱបជើងចិនអញ្ចឹង តើប្រទេសកម្ពុជានឹងឈរជើងយ៉ាងម៉េចទៅអនាគត?»
លោកបន្ថែមថាការឱបជើងចិន ឬអាមេរិកខ្លាំងពេកគឺជាស្ថានភាពដែល«គ្រោះថ្នាក់»។
លោក អ៊ូ វីរៈ បញ្ជាក់ថា បច្ចុប្បន្ននេះគឺជាពេលវេលាសមស្របដែលមេដឹកនាំនៃគណបក្សទាំងពីរអង្គុយជាមួយគ្នាជជែកស្វែងរកគោលជំហររួមសម្រាប់នយោបាយការបរទេស ព្រោះប្រទេសកម្ពុជាហាក់ដូចជាដើរមកដល់ផ្លូវបំបែកមួយ ដែលមិនដឹងច្បាស់ថាជាប្រទេសកុម្មុយនិស្ត ឬប្រជាធិបតេយ្យពិតប្រាកដ។
លោករិះគន់ថា កម្ពុជាហាក់ដូចជាពឹងផ្អែកចាំតែជំនួយបរទេសច្រើនជាង ពង្រឹងលទ្ធភាពដោយខ្លួនឯង ដែលលោកហៅថា ជាផ្នត់គំនិត«ជាអ្នកសុំទាន»។
លោកបន្ថែមថា៖«ការធ្វើផ្នត់គំនិតជាអ្នកសុំទាន គឺយើងឈរខ្លួនឯងមិនរឹងមាំគឺយើងនៅតែជាកូនអុករបស់គេដដែល»។
លោកយល់ថា កម្ពុជាគួរតែមើលគំរូរបស់សិង្ហបុរីដែលឈរម្ចាស់ការខ្លួនឯង។
ប្រទេសកម្ពុជាត្រូវបានគេមើលឃើញថា ហាក់បានងាកទៅរកប្រទេសចិនកាន់តែខ្លាំងដោយចិនបានផ្តល់ជំនួយយ៉ាងច្រើន ជាជំនួយឥតសំណង កម្ចីឥតការប្រាក់ និងកម្ចីសម្បទានសម្រាប់អភិវឌ្ឍន៍។ ចិនជួយកសាងផ្លូវបានជាង២០០០គីឡូម៉ែត្រ និងសំណង់វារីអគ្គិសនីតម្លៃជាង២០០០លានដុល្លារ។ នេះបើតាមការបញ្ចាក់របស់ក្រសួងការបរទេសកម្ពុជា។
លោក ហោ ណាំហុង រដ្ឋមន្ត្រីការបរទេសបានបញ្ជាក់ថា«ទំនាក់ទំនងកម្ពុជាចិនបានឈានដល់កម្រិតភាពជាដៃគូយុទ្ធសាស្ត្រគ្រប់ជ្រុងជ្រោយ ហើយប្រទេសទាំងពីរក៏បានបង្កើតគណៈកម្មាធិការសម្របសម្រួលអន្តររដ្ឋាភិបាលកម្ពុជា-ចិន ដើម្បីអនុវត្តភាពជាដៃគូយុទ្ធសាស្រ្តគ្រប់ជ្រុងជ្រោយលើគ្រប់វិស័យ»។
លោក អ៊ូ វីរៈ យល់ថា ការកើនឡើងជំនួយនេះដោយសារក្នុងពេលកន្លងមក ប្រទេសចិនពឹងផ្អែកលើប្រទេសពីរនៅក្នុងសមាគមអាស៊ាន ដើម្បីជួយការពារផលប្រយោជន៍របស់ចិននោះគឺ កម្ពុជា និងប្រទេសភូមា។
លោកបានបន្ថែមថា៖ «ប៉ុន្តែដោយសារឥឡូវប្រទេសភូមាចាប់ផ្តើមបែរទៅរកលោកខាងលិច ប្រទេសចិនកំពុងតែដាក់ផុកលើប្រទេសកម្ពុជាខ្លាំងណាស់ ហើយការដាក់ផុកនេះហើយដែលធ្វើឱ្យមានការកើនឡើងជំនួយសេដ្ឋកិច្ច និងជំនួយផ្សេងៗមានសព្វាវុធយោធា រួមទាំងការការពាររដ្ឋាភិបាលកម្ពុជាពីការរិះគន់នានា និងពីការដាក់ការគាបសង្កត់ពីសហរដ្ឋអាមេរិកផងដែរ»។
លោក អ៊ូ វីរៈ មើលឃើញថា បណ្តាប្រទេសខាងលិចមិនសូវដាក់សម្ពាធមកលើរដ្ឋាភិបាលកម្ពុជាប្រកបដោយប្រសិទ្ធភាព ដូចមុនទៀតទេដោយសារតែកម្ពុជានាពេលបច្ចុប្បន្ននេះមានចិនជាអាង។
«ចំពោះខ្ញុំជានយោបាយមួយដ៏គ្រោះថ្នាក់បំផុត»៕
