ក្រុមបាតុករប៉ះទង្គិចជាមួយនឹងប៉ូលិស ហើយបានបិទមហាវិថីដ៏ធំមួយពេញមួយយប់នៅទីក្រុង Charlotte ដែលជាទីក្រុងភាគខាងកើត ស្ថិតក្នុងរដ្ឋ North Carolina សហរដ្ឋអាមេរិក បន្ទាប់ពីមន្ត្រីប៉ូលិសស្បែកខ្មៅមួយរូបបានបាញ់សម្លាប់បុរសស្បែកខ្មៅមួយរូបនៅក្នុងបន្ទប់ជួលមួយ។ ការប៉ះទង្គិចនេះបានធ្វើឲ្យមនុស្សរាប់សិបនាក់រងរបួស រួមទាំងមន្ត្រីប៉ូលិស១៦នាក់ផងដែរ។
ប៉ូលិសបានថ្លែងថា ការបាញ់ប្រហារនេះបានកើតឡើងកាលពីរសៀលថ្ងៃអង្គារ ហើយពួកគេកំពុងស្វែងរកអ្នកផ្សេងទៀត ហើយបានឃើញលោក Keith Lamont Scott អាយុ៤៣ឆ្នាំ ចេញពីរថយន្តជាមួយនឹងកាំភ្លើង។
ស្នងការប៉ូលិសស្រុក Mecklenburg នៃទីក្រុង Charlotte លោក Kerr Putney បានប្រាប់ក្រុមអ្នកសារព័ត៌មានថា មន្ត្រីប៉ូលិសដែលបានបាញ់សម្លាប់លោក Scott ក្នុងគ្រានោះលោកមានអារម្មណ៍ថាមានការគំរាមកំហែងមួយប្រុងនឹងកើតមានឡើង។ ប៉ូលិសបានបដិសេធមិនផ្តល់ព័ត៌មានពិស្តារទៅលើម៉ាកកាំភ្លើងនោះទេ។
ក្រុមគ្រួសាររបស់លោក Scott បានថ្លែងថាលោកមិនមានអាវុធនោះទេ។ ស្ត្រីម្នាក់ដែលអះអាងថាខ្លួនគឺជាកូនរបស់ Scott បានថ្លែងថា ឪពុករបស់នាងពេលនោះកំពុងអានសៀវភៅធម្មតានៅក្នុងឡាន នៅពេលដែលលោកត្រូវបានប៉ូលិសបាញ់សម្លាប់។ វីដេអូផ្សាយផ្ទាល់មួយដែលបានចែកចាយពាសពេញបណ្តាញសង្គមហ្វេសប៊ុកបានបង្ហាញថា កូនស្រីរបស់លោក Scott ថ្លែងថា លោកកំពុងចាំរថយន្តដឹកកូនប្រុសរបស់លោកទៅសាលារៀន នៅពេលដែលប៉ូលិសមកដល់ ហើយបានបាញ់សម្លាប់លោកចំនួន៤គ្រាប់។ នាងក៏បានថ្លែងថាលោក Scott ជាមនុស្សពិការ។ ប៉ូលិសបានបដិសេធមិនធ្វើអត្ថាធិប្បាយទៅលើវីដេអូនេះនោះទេ៕
