ថ្នាក់ដឹកនាំប៉ូលិសមកពីទូទាំងប្រទេសកម្ពុជាបានជួបប្រជុំគ្នានៅថ្ងៃអង្គារនេះ ដើម្បីទទួលការណែនាំពីវិធីទប់ស្កាត់ការប៉ុនប៉ងផ្តួលរំលំរដ្ឋាភិបាលកម្ពុជា និងរក្សាសណ្តាប់ធ្នាប់នៅពេលបុណ្យភ្ជុំ។ នេះបើតាមសេចក្តីរាយការណ៍របស់បណ្តាញព័ត៌មានក្នុងប្រទេសកម្ពុជា។
កិច្ចប្រជុំនេះធ្វើឡើងនៅក្នុងរាជធានីភ្នំពេញក្រោមអធិបតីភាពរបស់លោក នេត សាវឿន អគ្គស្នងការនគរបាលជាតិ ដោយមានការចូលរួមពីអគ្គស្នងការរងនគរបាលជាតិ ស្នងការនគរបាលរាជធានី-ខេត្ត ប្រធាន និងអនុប្រធាននាយកដ្ឋាន អង្គភាពនិងនាយការិយាល័យចំណុះសេនាធិការទាំងអស់ សរុបប្រមាណជាង ១,០០០ នាក់ ។
លោក ឆាយ គឹមខឿន អ្នកនាំពាក្យនៃអគ្គស្នងការប៉ូលិសជាតិបានប្រាប់អ្នកសារព័ត៌មាននិងត្រូវបានដកស្រង់ដោយគេហទំព័រប៉ូលិសកម្ពុជាថា៖
«សភាពការណ៍ថ្មីៗនេះ មានចលនាឧទ្ទាមមានចេតនារៀបផែនការប៉ុនប៉ងបង្កអសន្តិសុខផ្តួលរំលំរាជរដ្ឋាភិបាលស្របច្បាប់ ដែលកើតចេញពីការបោះឆ្នោតរបស់ប្រជាពលរដ្ឋ»។
លោក គឹមខឿន បានបន្ថែមថាកងកម្លាំងប៉ូលិសប្តេជ្ញា«ពង្រឹងសន្តិសុខជារួម ដោយមិនអនុញ្ញាតឲ្យកម្លាំងអមិត្ត ឬ ពួកឧទ្ទាមណាមកបំផ្លិចបំផ្លាញសុវត្ថិភាព សន្តិសុខ និងសន្តិភាព ផលប្រយោជន៍របស់ជាតិដែលកំពុងមានសព្វថ្ងៃនេះឡើយ»។
មេដឹកនាំគណបក្សសង្គ្រោះជាតិដែលនៅក្រៅប្រទេសបានរៀបចំផែនការឱ្យលោកសមរង្ស៊ីប្រធានស្តីទីគណបក្សវិលត្រឡប់ទៅប្រទេសកម្ពុជាវិញនៅថ្ងៃទី៩ខែវិច្ឆិកាខាងមុខនិងបានបំផុសឱ្យពលរដ្ឋទាមទារការផ្លាស់ប្តូរព្រមទាំងអំពាវនាវកុំឱ្យកងកម្លាំងប្រដាប់អាវុធធ្វើបាបពលរដ្ឋ។
កាលពីចុងសប្តាហ៍កន្លងមកនេះ អាជ្ញាធរប៉ូលិសបានចាប់ឃាត់ខ្លួនអតីតសកម្មជនបក្សប្រឆាំងចំនួន៩នាក់និងបន្តចាប់ខ្លួនបន្ថែមទៀតដោយចោទប្រកាន់ថាពួកគេបានចូលរួមធ្វើសកម្មភាពនិងចូលរួមកិច្ចប្រជុំដើម្បីស្វាគមន៍លោកសមរង្ស៊ី។ រហូតមកដល់ពេលនេះមានអតីតសកម្មជនបក្សប្រឆាំងចំនួន២៦នាក់ហើយកំពុងជាប់ពន្ធនាគារ៕
