ម្ចាស់ក្រុមហ៊ុនបំពង់បង្ហូរប្រេងដ៏សំខាន់មួយរបស់សហរដ្ឋអាមេរិក ដែលរងការវាយប្រហារដោយការជំរិតប្រាក់ក្នុងប្រព័ន្ធកុំព្យូទ័ររបស់ខ្លួន បានប្រកាសពីការចាប់ផ្ដើមដំណើរការឡើងវិញ។
ក្រុមហ៊ុន Colonial Pipeline បានឲ្យដឹងថា បំពង់បង្ហូរប្រេងរបស់ខ្លួនមានដំណើរការឡើងវិញហើយកាលពីរសៀលថ្ងៃពុធ ប៉ុន្តែថានឹងត្រូវការពេលវេលាប៉ុន្មានថ្ងៃទៀត ដើម្បីធ្វើឲ្យការដឹកជញ្ជូនប្រេងមានសភាពធម្មតាវិញ។
ទីផ្សារមួយចំនួនដែលទិញប្រេងរបស់ក្រុមហ៊ុន Colonial Pipeline អាចជួបប្រទះ ឬបន្តជួបប្រទះការរអាក់រអួលខ្លះ ក្នុងអំឡុងពេលប៉ុន្មានថ្ងៃដំបូងនៃការចាប់ផ្តើមដឹកជញ្ជូនប្រេងឡើងវិញនេះ។
ក្រុមហ៊ុន Colonial Pipeline នឹងដឹកជញ្ជូនប្រេងសាំង ប្រេងម៉ាស៊ូត និងប្រេងសម្រាប់យន្តហោះឲ្យបានច្រើន និងប្រកបដោយសុវត្ថិភាពតាមដែលអាចធ្វើបាន រហូតដល់ពេលទីផ្សារមានភាពប្រក្រតីឡើងវិញ។
នៅពេលនេះ រដ្ឋាភិបាលសហរដ្ឋអាមេរិក និងក្រុមមន្ត្រីក្នុងវិស័យនេះ កំពុងអំពាវនាវឲ្យអ្នកបើកបរយានជំនិះទំាងអស់ ឈប់សម្រុកទិញប្រេងសំាងយ៉ាងស្លន់ស្លោរ និងកុំទិញសាំងស្តុកទុក។
ហាងសាំងជាច្រើននៅក្នុងរដ្ឋធានីវ៉ាស៊ីនតោន និងរដ្ឋ Virginia អស់សាំងលក់ កាលពីថ្ងៃពុធ៕
