តំបន់សេដ្ឋកិច្ចពិសេសភ្នំពេញ នឹងក្លាយទៅជាក្រុមហ៊ុនទី៤សម្រាប់ការជួញដូរភាគហ៊ុន នៅក្នុងផ្សារមូលប័ត្រកម្ពុជា ដែលបានដំណើរការជាងបួនឆ្នាំមកហើយ។
តំបន់សេដ្ឋកិច្ចពិសេសភ្នំពេញ ដែលបានក្លាយជាក្រុមហ៊ុនសាធារណៈ និងហៅកាត់ថា ភ្នំពេញ អេសអ៊ីហ្សិត (PPSEZ) នៅថ្ងៃពុធនេះបានចាប់ផ្តើមលក់ភាគហ៊ុនដំបូងជាសាធារណៈ (Initial Public Offering) បន្ទាប់ពីការធ្វើប្រតិបត្តិការរបស់ខ្លួនអស់រយៈពេលជាង១០ឆ្នាំ ជាមួយការកើនឡើងនៃប្រាក់ចំណេញបីឆ្នាំជាប់ៗគ្នា។
ក្រុមហ៊ុន ភ្នំពេញអេសអ៊ីហ្សិត នឹងក្លាយជាក្រុមហ៊ុនទីបួននៅក្នុងផ្សារមូលប័ត្រកម្ពុជា ហើយក៏ជាក្រុមហ៊ុនទីពីរដែលចេញពីវិស័យឯកជន។ ភ្នំពេញអេសអ៊ីហ្សិត គឺជាតំបន់សេដ្ឋកិច្ចពិសេសនាំមុខគេនៅកម្ពុជានាពេលបច្ចុប្បន្ននេះ ជាមួយផ្ទៃដីជាង៣៥៧ហិកតា និងក្រុមហ៊ុនអន្តរជាតិ៧៦ក្រុមហ៊ុន។
លោកស្រី លីម ឈីវហូ ប្រធានក្រុមហ៊ុនភ្នំពេញអេសអ៊ីហ្សិត ថ្លែងប្រាប់ក្រុមអ្នកវិនិយោគិនជាតិនិងអន្តរជាតិ នៅក្នុងពិធីប្រកាសការចាប់ផ្តើមលក់ភាគហ៊ុនដំបូងជាសាធារណៈ ហៅកាត់ថា IPO ដែលរៀបចំឡើងនៅក្នុងសណ្ឋាគារមួយក្នុងរាជធានីភ្នំពេញថា ភ្នំពេញអេសអ៊ីហ្សិត គឺជាក្រុមហ៊ុនដ៏ធំមួយដែលបានរកស៊ីបណ្តាក់ទុនរវាងអ្នកជំនួញក្នុងស្រុក និងបរទេសក្នុងវិស័យឯកជននៅកម្ពុជា។ អ្នកស្រីបញ្ជាក់ថា ការដាក់ឲ្យលក់ភាគហ៊ុននេះ បានបង្ហាញពីការជឿនលឿនទៅមុខនៃសកម្មភាពវិនិយោគឧស្សាហកម្មរបស់ ភ្នំពេញអេសអ៊ីហ្សិត។
លោកស្រី លីម ឈីវហូ ថ្លែងថា៖
«ការចាប់ផ្តើមរបស់ IPO របស់យើងនៅថ្ងៃនេះ គឺជាសញ្ញាដ៏សំខាន់នៃទំនុកចិត្ត និងទីផ្សារសម្រាប់អាជីវកម្មរបស់យើងនៅក្នុងពេលអនាគតរុងរឿងសម្រាប់ ភ្នំពេញអេសអ៊ីហ្សិត សម្រាប់វិនិយោគរបស់យើងសម្រាប់ប្រទេសកម្ពុជា»។
លោកស្រី លីម ឈីវហូ អនុប្រធានសភាពាណិជ្ជកម្មកម្ពុជាបន្ថែមថា ក្រុមហ៊ុនភ្នំពេញអេសអ៊ីហ្សិត បានធ្វើការវិនិយោគក្នុងទឹកប្រាក់សរុប៤៦០លានដុល្លារអាមេរិក និងបានធ្វើឲ្យតំបន់សេដ្ឋកិច្ចពិសេសភ្នំពេញ ក្លាយជាទីកន្លែងសម្រាប់ការវិនិយោគឧស្សាហកម្ម និងទាក់ទាញដល់ក្រុមហ៊ុនអន្តរជាតិ។ លោកស្រីបញ្ជាក់ផងដែរថា ភ្នំពេញ អេសអ៊ីហ្សិត គឺជាក្រុមឯកជនជាតិទីមួយដែលនឹងដាក់លក់ភាគហ៊ុនរបស់ខ្លួនក្នុងផ្សារភាគហ៊ុនកម្ពុជា។
យោងទៅតាមការបង្ហាញនៃរបាយការណ៍ហិរញ្ញវត្ថុរបស់អ្នកជំនាញហិរញ្ញវត្ថុរបស់ក្រុមហ៊ុនភ្នំពេញ អេសអ៊ីហ្សិត បានបង្ហាញថា ប្រាក់ចំណេញរបស់ក្រុមហ៊ុនដែលបានទូទាត់ពីការបង់ពន្ធរួចហើយ បានកើនពី១.១លានដុល្លារក្នុងឆ្នាំ២០១២ ដល់ជិត៤លានដុល្លារនៅដំណាច់ខែកញ្ញាឆ្នាំ២០១៥។ ក្នុងពេលចាប់ផ្តើមលក់ភាគហ៊ុនដំបូងជាសាធារណៈ ឬ IPO ក្រុមហ៊ុន ភ្នំពេញ អេសអ៊ីហ្សិត គ្រោងដាក់លក់ភាគហ៊ុនជាង១១លានភាគហ៊ុន។ តម្លៃភាគហ៊ុនគឺមានពី០.៧០ដុល្លារ (ឬប្រមាណ ២.៨០០រៀល) ដល់១ដុល្លារ (ឬប្រមាណ៤.០០០រៀល) ក្នុងមួយភាគហ៊ុន។ តម្លៃក្រុមហ៊ុននៅទីផ្សារសរុបរបស់ ភ្នំពេញ អេសអ៊ីហ្សិត អាចស្ថិតក្នុងចន្លោះពី ៤០.៥១លានដុល្លារ ទៅ៥៧.៨៨លានដុល្លារ។
ឯកសារដែលបង្ហាញពីសក្ដានុពលរបស់ ក្រុមហ៊ុន ភ្នំពេញ អេសអ៊ីហ្សិត បានឲ្យដឹងថា ភ្នំពេញ អេសអ៊ីហ្សិត គឺជាគោលដៅចម្បងក្នុងការវិនិយោគឧស្សាហកម្មរបស់អ្នកវិនិយោគ នៅក្នុងការផលិតផលិតផលសម្រេចមេកានិច និងអគ្គិសនីសម្រាប់ការនាំចេញ ផលិតផលទំនិញប្រើប្រាស់ បំណែករថយន្ត និងបង្គំបំណែកសម្រាប់ការត្រៀមផលិត និងរហូតដល់ផលិតផលសម្រេចជាច្រើន។ ក្រុមហ៊ុនដែលកំពុងដំណើរការនៅក្នុងតំបន់សេដ្ឋកិច្ចពិសេសភ្នំពេញ រួមមានក្រុមហ៊ុន Minebea របស់ជប៉ុន និងក្រុមហ៊ុន Coca-Cola របស់សហរដ្ឋអាមេរិក និងបណ្តាក្រុមហ៊ុនផ្សេងៗទៀត។
ការចាប់ផ្តើមលក់ភាគហ៊ុនដំបូងជាសាធារណៈរបស់ ក្រុមហ៊ុន ភ្នំពេញ អេសអ៊ីហ្សិត កើតមានឡើងនៅស្របពេលដែល សកម្មភាពជួញដូរកំពុងរើបឡើងបន្តិចម្តងៗ ដោយទំហំនៃការជួញដូរមានតែ៦.០០០ដុល្លារប៉ុណ្ណោះ ក្នុងមួយថ្ងៃនៅចុងឆ្នាំ២០១៣រហូតមកដល់១០.០០០ដុល្លារក្នុងពេលបច្ចុប្បន្ន។ នេះបើយោងទៅតាមការបញ្ជាក់ពីមន្ត្រីប្រតិបត្តិការទីផ្សារនៃផ្សារមូលបត្រកម្ពុជា។
លោក ល្មុន សូឡី ប្រធាននាយកដ្ឋានប្រតិបត្តិការទីផ្សារនៃផ្សារមូលបត្រកម្ពុជា (Cambodia Securities Exchange) បានថ្លែងប្រាប់ VOA កាលពីពេលកន្លងមកថា ទោះជាមានការកើនឡើងទំហំនៃការជួញដូរក្តី ដំណើរការផ្សារភាគហ៊ុននៅមានសភាពយឺតយ៉ាវ។ លោកថា បន្ទាប់ពីក្រុមហ៊ុនភ្នំពេញ អេសអ៊ីហ្សិត ចុះបញ្ជីក្នុងផ្សារភាគហ៊ុន ផ្សារភាគហ៊ុននឹងមានល្បឿនទៅមុខបន្ថែមទៀត។ លោកបញ្ជាក់ថា យ៉ាងណាក៏ដោយ ផ្សារភាគហ៊ុនកម្ពុជា ត្រូវការក្រុមហ៊ុនជាង២០ក្រុមហ៊ុន ដើម្បីឲ្យការជួញដូរមានសភាពកាន់តែសកម្មឡើង។
លោក ល្មុន សូឡី ពន្យល់ប្រាប់ VOA ថា៖
«វាដំណើរវានៅយឺត ហើយដើម្បីឲ្យផ្សារយើងវាមានការជួញដូរលក្ខណៈស្វ័យទ្រទ្រង់ ចរន្តជួញដូរប្រចាំថ្ងៃហ្នឹងប្រហែល យើងត្រូវការពី១០ ទៅ២០ឡើង បើគិតទៅ។ ១០ ពី២០ ទៅ ឡើងទៅ គឺមានវិនិយោគិនច្រើន ដែលអាចជួញដូរ មានជាប្រចាំ»។
លោកបន្តថា ផ្សារភាគហ៊ុននឹងចេះតែវិវត្តខ្លួនបន្តទៅមុខទៀត ហើយលោករំពឹងថា ក្រុមហ៊ុនជាច្រើនផ្សេងទៀតនឹងចុះបញ្ជីក្នុងផ្សារភាគហ៊ុននេះ ក្នុងពេលខាងមុខ។
ក្រុមហ៊ុន ភ្នំពេញ អេសអ៊ីហ្សិត ត្រូវបានបង្កើតឡើងនៅឆ្នាំ២០០៦ និងស្ថិតនៅតាមបណ្ដោយផ្លូវជាតិលេខ៤ ដែលអាចតភា្ជប់ទៅកាន់ប្រព័ន្ធដឹកជញ្ជូនតាមផ្លូវទឹក គោក និងអាកាស។ ក្រុមហ៊ុនឯកជនបរទេស ដែលបានចុះបញ្ជីក្នុងផ្សារមូលបត្រកម្ពុជារួចហើយនោះ គឺក្រុមហ៊ុនកាត់ដេរសម្លៀកបំពាក់ Grand Twin International។ ក្រុមហ៊ុនរដ្ឋចំនួនពីរដែលចុះបញ្ជីហើយដែរនោះ រួមមាន រដ្ឋាករទឹកស្វយ័តក្រុងភ្នំពេញ និងកំពង់ផែស្វយ័តភ្នំពេញ។
យ៉ាងណាក៏ដោយ អ្នកវិភាគទីផ្សារក្នុងស្រុកនិយាយថា ការចុះបញ្ជីផ្សារភាគហ៊ុនរបស់ក្រុមហ៊ុនភ្នំពេញ អេសអ៊ីហ្សិត មិនទំនងជាអាចផ្តល់ជោគជ័យដល់ផ្សារភាគហ៊ុនកម្ពុជា ខណៈដែលអ្នកវិភាគទីផ្សារអន្តរជាតិឲ្យដឹងថា កម្សោយនៃការអនុវត្តច្បាប់ និងអំពើពុករលួយដែលនៅញាំញីកម្ពុជា អាចនឹងធ្វើឲ្យផ្សារភាគហ៊ុនកម្ពុជាពិបាកនឹងទាក់ទាញក្រុមហ៊ុនថ្មីៗបន្ថែមទៀត៕
