ក្រោយមានការរិះគន់លើសកម្មភាពក្រុមក្មេងៗដែលលេង គប់ទឹកប៉ាតម៉្សៅ និងបើកម៉ូតូជាក្រុមៗតាមដងផ្លូវសាធារណៈ បណ្តាលឱ្យកើតមានភាពអនាធិបតេយ្យនោះ ស្នងការដ្ឋាននគរបាលរាជធានីភ្នំពេញ បានបញ្ជូនកម្លាំងចុះល្បាតលើសកម្មភាពទាំងអស់នោះ ដើម្បីរក្សាសណ្តាប់ធ្នាប់សាធារណៈ និងការពារសុវត្ថិភាពអ្នកដំណើរ។
អ្នកតាមដានសង្គមយល់ថា អាជ្ញាធរនិងភាគីពាក់ព័ន្ធដូចជាឪពុកម្តាយ ឬអាណាព្យាបាលក្មេងទាំងនោះៗ ត្រូវចូលរួមគិតគូរ និងដោះស្រាយ និងទប់ស្កាត់សកម្មភាពអនាធិបតេយ្យនេះ ដើម្បីរក្សាភាពថ្លៃថ្នូរ និងលើកកម្ពស់សីលធម៌ក្នុងសង្គមកម្ពុជា។
អ្នកប្រឹក្សាយោបល់ផ្នែកអភិវឌ្ឍន៍ផ្នត់គំនិត និងការស្រាវជ្រាវ លោក សេក សុជាតិ ថ្លែងថា បច្ចុប្បន្ននេះយុវជនមួយចំនួនហាក់ដូចជា ដើរខុសឆ្ងាយខ្លាំងពីគន្លងសីលធម៌ វប្បធម៌ប្រពៃណីរបស់ជាតិ។ លោកថា សកម្មភាពរបស់ក្មេងៗដែលបង្កឡើងតាមទីសាធារណៈប៉ុន្មានថ្ងៃមកនេះ បង្ហាញឱ្យឃើញថា ពួកគេកំពុងងប់នឹងវប្បធម៌ពីខាងក្រៅ រហូតដល់ភ្លេចគិតពីតម្លៃសីលធម៌ និងទំនៀមទម្លាប់របស់ប្រជាជាតិខ្មែរ។
លោកថ្លែងថា៖ «ក្មេងៗទាំងអស់ហ្នឹងសុទ្ធសឹងតែជាសិស្សសាលា ស្ថិតនៅក្នុងកម្រិតចំណេះដឹងទូទៅ។ សកម្មភាពរបស់គាត់ទាំងអស់ហ្នឹងវាបាន បង្ហាញពីការធ្លាក់ចុះវប្បធម៌ប្រពៃណី ទំនៀមទម្លាប់ជាពិសេសប៉ះពាល់សិទ្ធិជាស្រ្តី និងធ្វើឱ្យប៉ះពាល់ដល់កិត្តិយសរបស់ស្រ្តីខ្មែរយើង ដែលជាមនុស្សកាន់ទំនៀមទម្លាប់ប្រពៃណីបានល្អណាស់មិនមែន បណ្តែតបណ្តោយឱ្យមនុស្សប្រុសមានការឱបថើបឬក៏បង្ហាញនៅទីសាធារណៈទេ»។
ប្រធានមជ្ឈមណ្ឌលប្រជាពលរដ្ឋ ដើម្បីអភិវឌ្ឍន៍ និងសន្តិភាព លោក យង់ គិមអេង យល់ថា សកម្មភាពនៃការលែងរបស់ក្រុមសិស្សសាលាទាំងអស់នោះ បានបង្កការរំខានអ្នកដែលធ្វើដំណើរតាមដងផ្លូវដែលគួរតែទទួលបានការណែនាំ និងត្រូវបញ្ឈប់ជាបន្ទាន់។
លោកថ្លែងថា៖ «ការលេងនេះវាមិនមែនជារឿងសមរម្យទេ។ សំខាន់បំផុតបើគាត់លេងតែក្នុងសាលារបស់គាត់ ក្នុងមិត្តភក្តិដែលយល់ព្រមលេងជាមួយគ្នានោះអត់អីទេ។ប៉ុន្តែអ្នកដែលគេធ្វើដំណើរគេទៅធ្វើការ អ្នកខ្លះទៅមើលម្តាយឈឺ អ្នកខ្លះមានទុក្ខត្រូវទៅពេទ្យ គ្នាមកសប្បាយរីករាយអីហ្នឹងប៉ាតម៉្សៅ។ រឿងទាំងអស់ហ្នឹងជារឿងមិនសមស្រប អ៊ីចឹងគួរតែមានការណែនាំមានការបញ្ឈប់កុំឱ្យគាត់ធ្វើបែបនោះ ព្រោះវាប៉ះពាល់ដល់អារម្មណ៍សាធារណៈជនដែលមិនពេញចិត្តនឹងលេង»។
បើតាមលោកយង់ គិមអេង ការធ្វើសកម្មភាពរបស់ក្រុមក្មេងៗសិស្សសាលាទាំងអស់នោះ គឺមកពីទម្លាប់របស់ពួកគេ បូករួមទាំងកង្វះវិធានការទប់ស្កាត់ពីសំណាក់អាជ្ញាធរ ក៏ដូចជាកង្វះការណែនាំពីសាលារៀន។
ការចាត់វិធានការរបស់នគរបាលរាជធានីភ្នំពេញលើសកម្មភាពអនាធិបតេយ្យរបស់ សិស្សនាពេលថ្មីៗនេះ កើតឡើង ក្រោយមានការចែករំលែកឃ្លីបវីដេអូបង្ហាញពី សកម្មភាព សិស្សនៅវិទ្យាល័យ ជា ស៊ីម សាមគ្គី និងសិស្សមកពីសាលាផ្សេងទៀត ចូលរួមលេងប៉ាតម្ស៉ៅ គប់ទឹក បាញ់ទឹក នៅក្រៅបរិវេណសាលា និងជិះម៉ូតូជាក្រុមៗ បង្កភាពអនាធិបតេយ្យ និងបង្កការរំខានដល់អ្នកធ្វើដំណើរ។
ការចាត់វិធានការទប់ស្កាត់ភាពអនាធិបតេយ្យនេះ ក្មេងៗ ឬសិស្សដែលមិនស្តាប់តាមការណែនាំរបស់អាជ្ញាធរមានសមត្ថកិច្ច នឹងត្រូវប្រឈមនឹងចំណាត់ការតាមផ្លូវច្បាប់ដោយគ្មានការលើកលែង បើពួកគេនៅរឹងត្អឹងបង្កផលប៉ះពាល់លើសណ្តាប់ធ្នាប់សាធារណៈ។ នេះបើតាមសេចក្តីថ្លែងការណ៍របស់ស្នងការដ្ឋាននគរបាលរាជធានីភ្នំពេញ ចេញផ្សាយកាលពីថ្ងៃចន្ទ។
អ្នកនាំពាក្យស្នងការដ្ឋាននគរបាលរាជធានីភ្នំពេញ លោក សំ វិច្ឆិកា បានបញ្ជាក់វីអូអេឱ្យដឹងនៅថ្ងៃអង្គារនេះថា កម្លាំងស្នងការដ្ឋាននគរបាលរាជធានីភ្នំពេញ បានដាក់ចេញវិធានការចុះល្បាតជាបន្ទាន់រួចរាល់ក្នុងការទប់ស្កាត់រាល់សកម្មភាពរបស់ក្រុមក្មេងៗទាំងអស់នោះ ដើម្បីរក្សាសុវត្ថិភាព សន្តិសុខ សណ្តាប់ធ្នាប់ដល់ប្រជាពលរដ្ឋដែលធ្វើដំណើរតាមដងផ្លូវ។
លោកបន្ថែមថា៖ «ក្នុងករណីគាត់ពួកគាត់ធ្វើសកម្មភាពប៉ះពាល់រូបរាងកាយរបស់ស្រ្តីវ័យក្មេង មើលទៅមានភាពអសីលធម៌ក្នុងសង្គម យើងនឹងមានវិធានការជាក់ស្តែង និងសុំគោលការណ៍ពីថ្នាក់លើដើម្បីពិនិត្យថា តើក្នុងកម្រិតអនុវត្តច្បាប់ឬកម្រិតធ្វើការអប់រំ...យើងកុំលេងអ្វីដែលប្រាសចាកនឹងប្រពៃណីសីលធម៌ ដែលធ្វើឱ្យមានការស្អប់ខ្ពើមពីសំណាក់សង្គមក៏ដូចជា សំណាក់ប្រជាពលរដ្ឋ»។
ស្នងការដ្ឋាននគរបាលរាជធានីភ្នំពេញ បានបញ្ជាឱ្យអធិការដ្ឋាននគរបាលខណ្ឌទាំង១៤ សហការជាមួយនាយកសាលា និងគ្រូបង្រៀន តាមបណ្តាសាលារៀនទាំងអស់ អប់រំឱ្យសិស្សានុសិស្សចូលរួមគោរពច្បាប់ និងគោរពតាមសេចក្តីណែនាំរបស់អាជ្ញាធរមូលដ្ឋាន ដើម្បីលើកកម្ពស់ថែរក្សាសន្តិសុខ សណ្តាប់ធ្នាប់ សុវត្ថិភាពសង្គម និងបញ្ឈប់រាល់សកម្មភាព ទាំងឡាយណាដែលបង្កប៉ះពាល់លើ សន្តិសុខសណ្តាប់ធ្នាប់សាធារណៈ និងសីលធម៌របស់ពលរដ្ឋម្នាក់ៗ៕
វេទិកាបញ្ចេញមតិ