តុលាការក្រុងភ្នំពេញ នៅថ្ងៃព្រហស្បតិ៍ បានបន្ថែមភស្តុតាងជាង១០ ក្នុងនោះមានទាំងឃ្លីបវីដេអូចំនួន៣ ការសន្ទនាតាមប្រព័ន្ធទូរស័ព្ទ និងការបង្ហោះសារនានារបស់សកម្មជនបក្សជំទាស់តាមបណ្តាញសង្គមហ្វេសប៊ុក។
ភស្តុតាងទាំងនេះ ត្រូវបានបង្ហាញក្នុងសវនាការមួយ នៅចំពោះមុខជនជាប់ចោទចំនួន១១នាក់ដែលត្រូវតុលាការចោទប្រកាន់ពីបទញុះញង់ និងរួមគំនិតក្បត់ ដែលមានទំនាក់ទំនងនឹងព្រឹត្តិការណ៍មាតុភូមិនិវត្តន៍មិនបានសម្រេចរបស់លោក សម រង្ស៊ី កាលពីឆ្នាំ២០១៩។
សំណុំរឿងញុះញង់នេះ មានជនជាប់ចោទសរុបចំនួន២១នាក់ ក៏ប៉ុន្តែ មានជនជាប់ចោទតែ១៣នាក់ប៉ុណ្ណោះ ដែលស្ថិតក្នុងពន្ធនាគារ។ បទចោទលើអ្នកទាំង២១នោះ ក៏ជាប់ទាក់ទងនឹងការបញ្ចេញយោបល់តាមប្រព័ន្ធទំនាក់ទំនងទូរគមនាគមន៍ និងប្រព័ន្ធបណ្តាញទំនាក់ទំនងសង្គមអំពីស្ថានភាពជំងឺកូវីដ១៩ ការជេរប្រមាថមេដឹកនាំកម្ពុជា និងចលនាសង្គ្រោះជាតិផ្តួចផ្តើមដោយលោក សម រង្ស៊ី។
ក្នុងសាលសវនាការកាលពីព្រឹកថ្ងៃព្រហស្បតិ៍ ជនជាប់ចំនួន១១នាក់ បានបង្ហាញខ្លួននៅចំពោះមុខក្រុមប្រឹក្សាជំនុំជម្រះក្តី ដែលស្ថិតក្រោមការឃ្លាំមើលពីមន្ត្រីសិទ្ធិមនុស្សជាតិ អន្តរជាតិ និងតំណាងអង្គទូតមួយចំនួន ព្រមទាំងក្រុមគ្រួសាររបស់ជនជាប់ចោទ។ ជនជាប់ចោទពីរនាក់ បានសុំការអនុញ្ញាតពីមន្ត្រីពន្ធនាគារមិនចូលរួមសវនាការដោយសារបញ្ហាសុខភាព។
ភស្តុតាងដំបូងដែលចៅក្រមលោក អ៊ឹម វណ្ណៈ ឱ្យចាក់បង្ហាញតាមប្រព័ន្ធកំព្យូទ័រនោះ គឺបទសម្ភាសន៍ជាវីដេអូមួយដែលគេឃើញអ្នកយកព័ត៌មានរបស់វិទ្យុអាស៊ីសេរីលោក ជុន ច័ន្ទបុត្រ បានសួរលោក សម រង្ស៊ី អំពីហេតុផលនៃការបង្កើតចលនាសង្គ្រោះជាតិនៅចុងខែមករា ឆ្នាំ២០១៨ ក្រោយតុលាការនៅប្រទេសកម្ពុជា បានរំលាយគណបក្សសង្គ្រោះជាតិកាលពីខែវិច្ឆិកា ឆ្នាំ២០១៧។
យោងតាមបទសម្ភាសន៍មានរយៈពេលជាង១០នាទីនោះ លោក សម រង្ស៊ី លើកឡើងថា ការបង្កើតចលនាសង្គ្រោះជាតិ គឺជារូបមន្តល្អបំផុតមួយដើម្បីជំរុញឱ្យមានចលនាមហាជន និងកងកម្លាំងប្រដាប់អាវុធក្រោកឈរ ប្រឆាំងជនផ្តាច់ការ និងធានាថាគណបក្សសង្គ្រោះជាតិ បានវិលមកចូលរួមប្រកួតក្នុងការបោះឆ្នោតមួយដែលមានភាពសេរី យុត្តិធម៌ និងត្រឹមត្រូវ និងចំហសម្រាប់គ្រប់និន្នាការនយោបាយ។
មេដឹកនាំនយោបាយជំទាស់រូបនេះបន្ថែមទៀតថា ចលនាសង្គ្រោះជាតិជាឧបករណ៍ដើម្បីទប់ទល់នឹងការគាបសង្កត់របស់អាជ្ញាធរនៅប្រទេសកម្ពុជា ក្រោយមេបក្សប្រឆាំងលោក កឹម សុខា ត្រូវចាប់ខ្លួន និងបក្សត្រូវរំលាយ និងថា ចលនានេះ អាចទទួលបានការគាំទ្រច្រើនពីមន្ត្រីសង្គមស៊ីវិល អង្គការសិទ្ធិមនុស្ស អ្នកមានវិវាទដីធ្លី និងអ្នកសារព័ត៌មាន។
លោក សម រង្ស៊ី និយាយថា ចលនាសង្គ្រោះជាតិដែលគ្មាននរណាអាចរំលាយបាននោះ មានគោលដៅទាមទារឱ្យលោក កឹម សុខា និងអ្នកទោសមនសិការមានសេរីភាពឡើងវិញផងដែរ ហើយក៏ជាជម្រើសនយោបាយមួយដែលអាចចៀសចេញពីល្បែងនយោបាយ ដែលលោកចោទលោកនាយករដ្ឋមន្ត្រី ហ៊ុន សែន ថា ចង់ឃើញការបង្កើតបក្សជំទាស់ផ្សេងពីគណបក្សសង្គ្រោះជាតិ។
លោក សម រង្ស៊ី ថ្លែងក្នុងឃ្លីបបទសម្ភាសន៍ជាវីដេអូដដែលនោះថា៖ «គោលដៅតែមួយគត់ គឺឱ្យដោះលែងលោកកឹម សុខា និងអ្នកទោសមនសិការ និងប្រគល់សោរសេរីភាពធ្វើបាតុកម្ម បោះឆ្នោតទូលំទូលាយសម្រាប់គ្រប់ភាគី និងមានគណបក្សសង្គ្រោះជាតិ»។
បន្ទាប់ពីការបង្ហាញឃ្លីបវីដេអូនេះ និងឃ្លីបវីដេអូពីរផ្សេងទៀត ដែលគេឃើញលោកសម រង្ស៊ី ពន្យល់ពីការរៀបចំឱ្យមានចលនាសង្គ្រោះជាតិ នៅពេលរចនាសម្ព័ន្ធបក្សសង្គ្រោះជាតិបែកខ្ញែក ដោយមានថ្នាក់ដឹកនាំ និងសកម្មជនភៀសខ្លួនទៅក្រៅប្រទេសនោះ តុលាការ បានបញ្ចេញភស្តុតាងនៃការសន្ទនាតាមទូរស័ព្ទរបស់សកម្មជនគណបក្សសង្គ្រោះជាតិដែលកំពុងជាប់ឃុំ និងសកម្មជនផ្សេងដែលភៀសខ្លួនទៅក្រៅប្រទេសទាក់ទិនស្ថានភាពឆ្លងជំងឺកូវីដ១៩ ការប្រើប្រាស់ពាក្យសម្តីអសុរោះលើលោក ហ៊ុន សែន និងការបាត់បង់២០%នៃប្រព័ន្ធឋានៈអនុគ្រោះពន្ធពីសហភាពអឺរ៉ុប ហៅកាត់ថា EBA។
មេធាវីការពារក្តីឱ្យជនជាប់ចោទលោក សំ សុគង់ ប្រាប់វីអូអេថា សកម្មជនអតីតគណបក្សសង្គ្រោះជាតិ ដែលកំពុងជាប់ឃុំនេះ គ្មានទំនាក់ទំនងអ្វីជាមួយនឹងការបង្កើតចលនាសង្គ្រោះជាតិរបស់លោក សម រង្ស៊ី នៅក្រៅប្រទេសនោះទេ។
«អ្វីដែលតុលាការយកមកបង្ហាញពីព្រឹកមិញនេះ គឺពាក់ព័ន្ធនឹងការដែលគាត់និយាយសន្ទនាគ្នាជាមួយគ្រួសារគាត់ ជាមួយមិត្តភក្តិគាត់ ហើយពាក់ព័ន្ធនឹងបញ្ហាជំងឺកូវីដ ភាគច្រើន គឺបញ្ហាកូវីដ។ អ៊ីចឹងទំនាក់ទំនងជាមួយនឹងការបង្កើតចលនាសង្គ្រោះជាតិរបស់ថ្នាក់ដឹកនាំនៅក្រៅប្រទេស ហើយនឹងការបង្ហោះហ្វេសប៊ុកគាត់ទាក់ទងនឹងកូវីដដូចអត់មានការពាក់ព័ន្ធគ្នាទេ»។
លោកបន្ថែមថា ការយកសារសន្ទនាតាមទូរស័ព្ទមកធ្វើជាភស្តុតាងនោះ ជាការរំលោភសិទ្ធិឯកជន និងប៉ះពាល់សិទ្ធិសេរីភាពបញ្ចេញមតិដែលធានាដោយរដ្ឋធម្មនុញ្ញរបស់ប្រទេស។
លោក ស៊ឹង សែនករុណា អ្នកនាំពាក្យសមាគមសិទ្ធិមនុស្សអាដហុក យល់ឃើញថា រឿងក្តីក្តាំរបស់សកម្មជនបក្សជំទាស់ដែលកំពុងបន្តនៅតុលាការនេះ មិនអាចបំបែកបានឆាប់ទេ បើគ្មានដំណោះស្រាយខាងនយោបាយនោះ។
«អ៊ីចឹងការយកបញ្ហាជម្លោះនយោបាយ ទំនាស់នយោបាយយកមកកាត់សេចក្តីដោយតុលាការខ្ញុំគិតថា វាមិនអាចធ្វើឱ្យមានជំនឿចិត្តពីសាធារណជន សាធារណមតិជាតិអន្តរជាតិបានទេ»។
គួររំឭកផងដែរថា ជនជាប់ចោទ១៣នាក់ ដែលត្រូវបានចាប់មកដាក់ក្នុងពន្ធនាគារនោះ រួមមានលោក ឆុន ប៊ុនឆាត លោក យឹម សារ៉េត លោក ជុំ ចាន់ លោក កែវ ថៃ លោក ស៊ុន ធន់ លោក ឡុង ផារី លោក ពៀត ម៉ាប់ លោក សុខ ចាន់ថា លោក ឃឹម ភាណា លោក ឃុត ច្រឹក លោក ញ៉ែម វ៉ាន លោក ថៃ គន្ធា និងលោក ងិន ឃាន។
ក្រោយការបង្ហាញភស្តុតាង កាលពីព្រឹកថ្ងៃព្រហស្បតិ៍នេះ ប្រធានក្រុមប្រឹក្សាជំនុំជម្រះ លោក រស់ ពិសិដ្ឋ ប្រកាសលើកសវនាការទៅបន្តធ្វើនៅថ្ងៃទី២០ ខែមករា ឆ្នាំ២០២២៕
