ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

តុលាការ​កាត់ទោស​លោក​ថោង សារ៉ាត់ និង​អង្គរក្ស​ឲ្យ​ជាប់​ពន្ធនាគារ​មួយ​ជីវិត​ពី​បទ​ឃាត​កម្ម​លោក​អ៊ឹង ម៉េងជឺ


លោក ថោង សារ៉ាត់ ត្រូវបាន​នាំខ្លួន​មក​សាលាដំបូងរាជធានីភ្នំពេញ ថ្ងៃទី២៦ ខែមីនា ឆ្នាំ២០១៩។ (រូបថត​៖ Fresh News)

ចៅក្រម​តុលាការ​រាជធានី​ភ្នំពេញ​ ​បាន​កាត់​ទោស​ឲ្យ​លោក ថោង សារ៉ាត់​ ​អតីត​ម្ចាស់​សំណង់​ ៩៩៩​ ​និង​អង្គរក្ស​ចំនួន​ ៤​ នាក់​ ​ឲ្យ​ជាប់​ពន្ធនាគារ​ម្នាក់ៗ​អស់​មួយ​ជីវិត​​ ដោយ​ចោទ​ពី​បទ​ឃាតកម្ម​គិតទុក​ជាមុន​និង​បទ​សម​គំនិត​ក្នុង​សំណុំ​រឿង​បាញ់​សម្លាប់​លោក​ ​អ៊ឹង ម៉េងជឺ​ ​ដែល​ជា​ថៅកែ​ស៊ីម៉ងត៍​ត្បូង​ពេជ្រ។

ចៅក្រម​សាលា​ដំបូង​រាជធានី​ភ្នំពេញ​សម្រេច​ផ្ដន្ទាទោស​លោក​ ​ថោង សារ៉ាត់​ ​និង​អង្គរក្ស​ចំនួន ​៤​ នាក់​ ​ឲ្យ​ជាប់​ពន្ធនាគារ​ម្នាក់ៗ​អស់​មួយ​ជីវិត​ ពាក់ព័ន្ធ​នឹង​បទ​ឃាតកម្ម​គិត​ទុក​ជាមុន​លើ​ឧកញ៉ា អ៊ឹង ម៉េងជឺ។​ ​នេះ​បើ​តាម​ការ​បញ្ជាក់​របស់​មេធាវី​ការពារ​ក្ដី​ឲ្យ​អ្នក​ទាំង៥។

នា​រសៀល​ថ្ងៃអង្គារ​នេះ​ ​ចៅ​ក្រម​សាលាដំបូង​រាជធានី​ភ្នំពេញ​ ​បាន​ប្រកាស​សាលក្រម​សំណុំ​រឿង​បាញ់​សម្លាប់​លោក​ ​អ៊ឹង ម៉េងជឺ​ ​ដែល​មាន​ជន​ជាប់​ចោទ​ឈ្មោះ​ ​ថោង សារ៉ាត់​ ​ជាអតីត​ម្ចាស់​សំណង់​ ៩៩៩​ ថា ​ជា​អ្នក​ផ្ដើម​គំនិត​នៃ​ការ​បាញ់​សម្លាប់​ ​ចំណែក​អង្គរក្ស​របស់​លោក​ចំនួន​ ៤​ នាក់​ ​ត្រូវ​បាន​ចោទ​ប្រកាន់​ពី​បទ​សមគំនិត​ ​និង​បទ​ឃាតកម្ម​គិតទុក​ជាមុន។

លោក​ ​គា អ៊ាវ​ ​មេធាវី​មួយ​រូប​ដែល​ការពារ​ក្ដី​ឲ្យ​លោក​ ​ថោង សារ៉ាត់​ ​និង​អង្គរក្ស​ទាំង​បួន​រូប​របស់​លោក​ប្រាប់​ ​VOA​ ​នា​រសៀល​ថ្ងៃអង្គារនេះ​ថា ​ចៅក្រមសាលា​ដំបូង​រាជធានី​ភ្នំពេញ​ ​បាន​ប្រកាស​សាល​ក្រម​លើ​សំណុំ​រឿង​នៃ​ការ​បាញ់​សម្លាប់​លោក​ ​អ៊ឹង ម៉េងជឺ​ ​ដោយ​ប្រកាស​ដាក់​ទោស​កូន​ក្ដី​របស់​លោក​ទាំង​ប្រាំ​នាក់​ ​ក្នុង​ម្នាក់ៗ​ជាប់​ពន្ធនាគារ​អស់​មួយ​ជីវិត។​ ​លោក​បន្ត​ថា​ ​ការ​សម្រេច​នេះ​មាន​ភាព​អយុត្តិធម៌​សម្រាប់​កូន​ក្ដី​របស់​លោក​ ​ហើយ​ថា​ ​លោក​ព្រមទាំង​សហ​មេធាវី​ ​នឹង​ប្ដឹង​ទៅ​ឧទ្ធរណ៍​ជា​បន្ត។

លោក​បញ្ជាក់​ថា៖​

«ខ្ញុំ​គិត​ថា​ ការ​ធ្វើ​នេះ​ ​សម្រេច​នេះ​មិន​បាន​យុត្តិធម៌​ទេ​ ​មិន​បាន​តាម​ដំណើរ​រឿង​ពិត​ ​ហើយ​អត់​បាន​តាម​ភស្តុតាង។​ ​ខ្ញុំ​គិត​ថា ​កន្លង​មក​ក្នុង​រឿង​នេះមាន​ភស្តុតាង​ដោះ​បន្ទុក​គ្រប់គ្រាន់​ ​ដែល​ពួកគាត់​គួរ​តែ​រួច»។

VOA​ ​បាន​ព្យាយាម​ទាក់ទង​សុំ​ការ​អត្ថាធិប្បាយ​ពី​លោក​ ​អ៊ី រិន្ទ​ ​អ្នក​នាំពាក្យ​សាលា​ដំបូង​រាជធានី​ភ្នំពេញ​ ​តែ​លោក​ប្រាប់​ឲ្យ​សួរ​ទៅ​លោក​ ​សួស វិទ្យារ៉ាន់ឌី​ ​ប៉ុន្តែ​ ​លោក​ ​សួស វិទ្យារ៉ាន់ឌី​ ​ដែល​ជា​អ្នក​នាំ​ពាក្យ​សាលា​ដំបូង​រាជធានី​ភ្នំពេញ​មួយ​រូប​ដែរ​នោះ​ ​មិន​ទទួល​ទូរស័ព្ទ​ ​រហូត​ដល់​ល្ងាច​ថ្ងៃ​អង្គារ​នេះ។

​អង្គរក្ស​របស់​លោក​ ​ថោង សារ៉ាត់​ ​ទាំង​បួន​នាក់​ ដែល​ត្រូវ​បាន​តុលាការកាត់ទោស​ឲ្យ​ជាប់​ពន្ធនាគារ​ម្នាក់ៗ​អស់​មួយ​ជីវិត​ ​មាន​ឈ្មោះ សៀង វាសនា​ ​ជា​ជន​ដៃ​ដល់​ ឈ្មោះ​ ​លី សៅ​ ​ជា​អ្នក​ឌុប​ជន​ដៃ​ដល់​ និង​អ្នក​រួម​គំនិត​ឈ្មោះ​ ​មាស សម្បត្តិ និង កូយ ចាន់ថុល។

ក្រោយ​ការ​ប្រកាស​សាល​ក្រម​របស់​តុលាការ​ ​គេ​ឃើញ​ក្រុម​គ្រួសារ​របស់​លោក​ ​ថោង សារ៉ាត់​ ​និងក្រុម​គ្រួសារ​របស់​អង្គរក្ស​លោក​ ​ថោង សារ៉ាត់​ ​អង្គុយ​តវ៉ា​នៅ​ខាង​មុខ​សាលា​ដំបូង​រាជធានី​ភ្នំពេញ ដោយ​ស្រែក​ថា​ ការ​សម្រេច​នោះ​មាន​ភាព​អយុត្តិធម៌​សម្រាប់​អ្នក​ទាំង​៥​រូប។​

កំពុង​អង្គុយ​ស្រែក​យំ​មុខ​តុលាការ​ ​អ្នកស្រី​ ​ណុប លីដា​ ​ភរិយា​របស់​លោក​ ​មាស សម្បត្តិ​ ​និយាយ​ថា ស្វាមី​របស់​អ្នកស្រី​ ​មិន​មាន​ពាក់ព័ន្ធ​នឹង​ការ​សម្លាប់​មនុស្ស​ដូច​ការ​ចោទ​ប្រកាន់​នោះ​ទេ។​ ​អ្នកស្រី​បន្ថែម​ថា​ ​ការ​សម្រេច​របស់​តុលាការ​មាន​ភាព​អយុត្តិធម៌​សម្រាប់​ស្វាមី​របស់​អ្នកស្រី។

អ្នកស្រី ណុប លីដា ភរិយារបស់លោក មាស សម្បត្តិ អង្គរក្សរបស់លោក ថោង សារ៉ាត់ និយាយជាមួយអ្នកកាសែតទាំងកំពុងហូរទឹកភ្នែកនៅខាងមុខ សាលាដំបូងរាជធានីភ្នំពេញ ថ្ងៃទី២៦ ខែមីនា ឆ្នាំ២០១៩។ (កាន់ វិច្ឆិកា/VOA)
អ្នកស្រី ណុប លីដា ភរិយារបស់លោក មាស សម្បត្តិ អង្គរក្សរបស់លោក ថោង សារ៉ាត់ និយាយជាមួយអ្នកកាសែតទាំងកំពុងហូរទឹកភ្នែកនៅខាងមុខ សាលាដំបូងរាជធានីភ្នំពេញ ថ្ងៃទី២៦ ខែមីនា ឆ្នាំ២០១៩។ (កាន់ វិច្ឆិកា/VOA)

អ្នកស្រី​បញ្ជាក់​ថា៖​

«រឿង​នេះ​វា​អយុត្តិធម៌​ខ្លាំង​ណាស់។​ ​យក​ឃាតក​សិប្បនិម្មិត​យក​មក​កាត់​ទោស​ឲ្យ​ជាប់​មួយ​ជីវិត។ ខ្ញុំ​យក​ជីវិត​ពួក​ខ្ញុំ​មក​ធានា។​ ​ថ្ងៃ​កើត​ហេតុ​ គាត់​នៅ​ផ្ទះ​ទាំង​អស់​គ្នា​ ​នៅ​បុរី​ជាមួយ​មេ​ទាំង​អស់​គ្នា​ ​ក្រុម​គ្រួសារ​នៅជាមួយ​គ្នា​ ​រឿង​អី​ដែល​មិន​ហ៊ាន​តវ៉ា? អះអាង​ថា​ គាត់​មិន​បាន​ធ្វើ​ទេ​ ​ព្រោះ​ថ្ងៃ​កើត​ហេតុ​គាត់​ស្កែន​មេដៃ​ម៉ោង ​៧​ ហើយ​ស្កែន​ហើយ​មិន​ទាន់​បាន​ចេញ​មក​ផង»។

កាល​ពី​ខែ​វិច្ឆិកា ​ឆ្នាំ ​២០១៤​ ​លោក​ឧកញ៉ា​ ​អ៊ឹង ម៉េងជឺ ដែល​ជា​អតីត​ថៅកែ​ស៊ីម៉ងត៍​សញ្ញា​ត្បូង​ពេជ្រ​ ត្រូវ​បាន​ខ្មាន់​កាំភ្លើង​បាញ់​សម្លាប់​នៅ​នឹង​មុខ​ហាង​លក់​ផ្លែឈើ​មួយ​កន្លែងក្នុង​រាជធានី​ភ្នំពេញ។ នៅ​ខែ​ធ្នូ​ ឆ្នាំ ​២០១៤​ ​តុលាការ​រាជធានីភ្នំពេញបាន​ចោទ​ប្រកាន់​លោក​ ​ថោង​ សារ៉ាត់​ ​ថា​ជា​មេ​គំនិត​នៅ​ពី​ក្រោយ​ខ្នង​នៃ​ការ​បាញ់​សម្លាប់​លោក​ឧកញ៉ា​ អ៊ឹង ម៉េងជឺ។

ក្រៅ​ពី​បទ​ល្មើស​ពាក់ព័ន្ធ​នឹង​ឃាតកម្ម​គិត​ទុក​ជាមុន​ ​កាល​ពី​ខែ​មិថុនា​ ​ឆ្នាំ​ ២០១៦ តុលាការ​បាន​សម្រេច​កាត់​ទោស​ឲ្យ​លោក​ ​ថោង សារ៉ាត់ ជាប់​ពន្ធនាគារ​ចំនួន ​២ ឆ្នាំ​ ៦ ខែ​ ពី​បទ​«លាក់​ទុក​អាវុធ​ខុស​ច្បាប់»។ តុលាការ​ដដែល​នេះ​ក៏​បាន​ផ្ដន្ទាទោស​ឪពុក​ម្ដាយ​ ​និង​អង្គរក្ស​ផ្ទាល់​របស់​លោក​ ​ថោង សារ៉ាត់​ ​ឲ្យ​ជាប់​ពន្ធនាគារ​ ​ម្នាក់ៗ​រយៈពេល​២​ឆ្នាំ​ ​និង​ពិន័យ​ជា​ប្រាក់​ម្នាក់ៗ​ ៦​លាន ​រៀល ​ពី​បទ​ល្មើស​ដូច​គ្នា៕

XS
SM
MD
LG