ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

បញ្ហា​សង្គម​ដ៏​ស្មុគស្មាញ​មួយ​នៅ​រាជធានី​ភ្នំពេញ៖ ការ​កកស្ទះ​ចរាចរណ៍


អ្នកបើកបរ​កំពុង​ធ្វើ​ដំណើរ​តាម​បណ្តោយ​មហាវិថី​ព្រះ​នរោត្តម​​ រាជធានី​ភ្នំពេញ នៅ​ព្រឹក​​ថ្ងៃទី​៨ ខែ​កក្កដា ឆ្នាំ​២០២២។ (កាន់ វិច្ឆិកា/វីអូអេ)

នាព្រឹកមួយនា​ដើម​ខែ​សីហា​នេះ លោក ឃឹម ដារ៉ា កំពុង​អង្គុយ​រងចាំ​ម៉ូយ នៅ​លើ​ដងមហាវិថី​ព្រះ​នរោត្តម ក្នុង​រាជធានី​ភ្នំពេញ។ បុរស​វ័យ ៤៥ ឆ្នាំ​រូបនេះ មាន​បទពិសោធន៍​ច្រើនអំពីចរាចរណ៍​នៅ​ទីក្រុង​ភ្នំពេញ ដោយសារ​លោក​មាន​របរ​ជា​អ្នក​រត់ PassApp។ លោក​បាន​បង្ហាញ​ការសម្គាល់​ឃើញ​របស់​លោក​ថា ជាទូទៅ​ការកក​ស្ទះតាម​ដង​ផ្លូវ​មួយចំនួននៅរាជធានីភ្នំពេញ​ តែង​កើត​ឡើង​នៅ​ចន្លោះម៉ោង​ ៧ ទៅ​ ៩​ ព្រឹក និង​ល្ងាច​ម៉ោង​ ៤ ដល់​ម៉ោង​ ៦​ ល្ងាច។

«ជួនកាល​វាស្ទះ​យូរ​ដែរ ជួនកាលមួយ​ម៉ោង​ កន្លះ​ម៉ោង​អី ពេល​ល្ងាច​គេ​ចេញ ​ស្ទះម៉ោង​ ៤ ម៉ោង ​៥ ជួន​កាលស្ទះ​ដល់​ម៉ោង​ ៧ ​អី ក៏​មាន​ដែរ»

ជា​អ្នក​បើកបរ​ PassApp ប្រចាំ​ថ្ងៃ​ដែល​ក្នុង​មួយ​ថ្ងៃ​ត្រូវ​ចំណាយ​ពេល​រាប់​ម៉ោង​ដើម្បី​ដឹក​អ្នក​ដំណើរ​ពី​ទីតាំង​មួយ​ ទៅកាន់​ទីតាំង​មួយ​ទៀត លោក ឃឹម ដារ៉ា បាន​ឆ្លងកាត់​នូវ​បទពិសោធន៍​បើកបរ​លើ​ដងផ្លូវ​នៅ​រាជធានី​ភ្នំពេញ ដែល​លោក​ថា អ្នក​បើក​បរ​ជាច្រើន​មិន​សូវ​គោរព​គ្នា និង​គោរព​ច្បាប់​ចរាចរណ៍​ឲ្យ​បាន​ខ្ជាប់​ខ្ជួន​នោះ​ទេ។

«អ្នកយើង​បើកបរ​រាល់​ថ្ងៃ​ហ្នឹង វា​អត់​គោរព​គ្នា។ អត់​សូវ​គោរព​គ្នា​ថា បើគេ​ទៅ​ហើយ​ឱ្យគេ​ទៅ យើង​មិន​ចាំបាច់​វ៉ា​គេ​ទេ។ ភ្លើង​ស្តុបអី​ យើ​ងចេះ​គោរពខ្លះ​ទៅ។ ជួនកាល​ភ្លើង​លឿង​ចូលជិត​ក្រហម​ ហើយ​នៅ​នាំគ្នា​ទៅ ដល់​ទៅៗគេ​នៅ​ខាង​នោះ​គេមក​ហើយ។ ជួនកាល​ផ្លូវ​ឆ្លង​កាត់​ចឹង កន្លែង​ណា​យើង​មិនគួរ​ឆ្លង យើង​មិនគួរឆ្លង​ទេ ប៉ុន្តែ​នៅ​តែ​ឆ្លង​ទៅតែម្តង។ ចេះ​តែ​ត្រសុលៗ​ទៅ​វាអាច​ស្ទះ»

សម្រាប់​លោក ឡេង មករា វិញ លោកមិន​មាន​បទពិសោធន៍​ល្អ​ ក្នុង​ពេល​ធ្វើ​ដំណើរ​ជា​ប្រចាំ​ថ្ងៃ​ នៅ​ក្នុង​ចរាចរណ៍​ដ៏​ណែនតាន់តាប់​នៅ​ទីក្រុង​ភ្នំពេញនេះទេ។ បុគ្គលិក​ធនាគារ​ឯកជនរូប​នេះ​ បាន​រៀបរាប់​ប្រាប់ VOA ​ថា ការ​កកស្ទះ​ចរាចរណ៍​នៅ​តែ​កើត​មាន​ជា​រៀង​រាល់​ថ្ងៃ ដែល​ពេល​ខ្លះ​បណ្តាល​ឱ្យ​លោកត្រូវ​ទៅ​រៀន និង​ទៅ​ធ្វើ​ការ​យឺត​ក៏​មាន។

«ការកកស្ទះ​ហ្នឹង​គឺ​ជាបញ្ហា​មួយ វា​រំខាន​មែនទែន​ដល់​ការ​ធ្វើ​ដំណើរ​ គឺ​យើងអាចធ្វើ​ដំណើរពេលយូរ។ ឧទាហរណ៍​ថា​ យើង​ត្រូវ​ធ្វើ​ជិះ​តែ​ ១០​ នាទី​ទៅ​ដល់ តែ​ធ្វើ​ឱ្យ​យើង​ចំណាយ​ពេលកន្លះ​ម៉ោង មួយ​ម៉ោងអី​អ៊ីចឹង​ អ៊ីចឹង​ធ្វើ​ឱ្យ​យើ​ង​ស្រ្តេស​ដែរ»

មករា ​តែង​ធ្វើ​ដំណើរ​តាម​បណ្តោយ​ផ្លូវ​សហព័ន្ធ​រុស្សី ពី​ផ្ទះ​នៅ​ម្តុំ​ទឹក​ថ្លាទៅកាន់សាលា​រៀន និង​កន្លែង​ធ្វើការ។ មករា​ លើក​ឡើង​ថា លោក​ខាត​ទាំង​ពេល ហើយ​ទទួល​ឥទ្ធិពល​អវិជ្ជមាន​ពី​ការ​កកស្ទះ​ចរាចរណ៍​នេះ ដែល​ធ្វើ​ឲ្យ​រូបលោក​ធុញថប់។

«ជាធម្មតា​ យើង​ធ្វើ​ដំណើរ​តែ​ ១០ ​នាទី នៅ​ពេល​ដែល​យើង​ស្ទះ​ អាច​ដល់​កន្លះ​ម៉ោង ៤០​ នាទី អ៊ីចឹង​វាអាច​ខាត​ពេល​វេលា​របស់​អ្នក​បើក​បរ ដូចជា​ខ្ញុំផ្ទាល់​អ៊ីចឹង។ កាលណា​ស្ទះ គឺ​យើង​ត្រូវ​ខាត​ពេល ហើយវា​ធ្វើ​ឱ្យ​ប៉ះពាល់​ដល់​អារម្មណ៍ ប៉ះពាល់​ដល់ mental [ផ្លូវ​ចិត្ត] របស់​យើង​ វាស្ត្រេស​ វា​អត់​សប្បាយ​ចិត្ត​ នៅ​ពេល​ដែល​យើង​ស្ទះ​ពេក ជិះ​មួយ​បន្តិច​ស្ទះ ជិះ​មួយ​បន្តិច​ស្ទះ ធ្វើ​ឱ្យ​យើង​តប់​ប្រមល់»

អ្នកបើកបរ​កំពុង​ធ្វើ​ដំណើរ​លើមហាវិថី​ព្រះ​មុនីវង្ស ជិត​ស្ពាន​អាកាស​ក្បាល​ថ្នល់​ រាជធានី​ភ្នំពេញ នៅព្រឹកថ្ងៃទី​៨ ខែ​កក្កដា ឆ្នាំ​២០២២។ (កាន់ វិច្ឆិកា/វីអូអេ)
អ្នកបើកបរ​កំពុង​ធ្វើ​ដំណើរ​លើមហាវិថី​ព្រះ​មុនីវង្ស ជិត​ស្ពាន​អាកាស​ក្បាល​ថ្នល់​ រាជធានី​ភ្នំពេញ នៅព្រឹកថ្ងៃទី​៨ ខែ​កក្កដា ឆ្នាំ​២០២២។ (កាន់ វិច្ឆិកា/វីអូអេ)

បញ្ហា​កកស្ទះចរាចរណ៍​នៅ​រាជធានី​ភ្នំពេញដែល​មាន​ពលរដ្ឋ​សរុប​ប្រមាណ ២ លាន​នាក់​រស់នៅ​នេះ​ កំពុង​តែបន្ត​កើត​មាន​ឡើងជា​ប្រចាំ ទាំង​ពេល​ព្រឹក ​ថ្ងៃ និងល្ងាច ត្រូវ​នឹង​ម៉ោងដែល​ប្រជាជន​ចេញ​ចូល​ធ្វើការ​ និងសិក្សា និង​ប្រកប​របរ​ចិញ្ចឹម​ជីវិត​ប្រចាំ​ថ្ងៃ។ ជារៀង​រាល់​ថ្ងៃ​ គេ​តែង​ឃើញ​អ្នក​បើកបរ​មួយ​ចំនួនបញ្ជ្រៀត​រុល​ទៅ​មុខ​ នៅ​ពេល​មាន​ការ​កក​ស្ទះ​ រួមទាំង​ការ​បន្ថែម​ល្បឿនពេល​ឃើញ​ភ្លើង​ស្តុបពណ៌​លឿង​ រថយន្តនិងម៉ូតូ​កង់បីបើកបរ​នៅ​លើ​ផ្លូវ​ម៉ូតូ​ ​ការ​យក​ចំណី​ផ្លូវ​ប្រកប​របរ​អាជីវកម្ម​ ​ការ​ចត​លើចំណី​ផ្លូវ ​និង​ការ​ជិះ​បញ្ច្រាស​ផ្លូវ​ជាដើម។

ហើយ​បញ្ហា​សង្គម​កាន់តែស្មុគស្មាញ​មួយ​នេះ ដែល​កើត​ឡើង​ជា​ទូទៅ​នៅ​តាម​ទីក្រុង​ធំៗ​ក្នុង​តំបន់ នៅ​តែ​ជា​បញ្ហាចម្បង​មួយ ដែល​ធ្វើ​ឱ្យ​ប្រជាពលរដ្ឋខាត​បង់ថវិកា ពេល​វេលា និង​ប៉ះពាល់​ដល់​សុខភាព​ ជាពិសេស​សុខភាព​ផ្លូវ​ចិត្ត​របស់​អ្នក​បើកបរ​រាប់​ម៉ឺន​នាក់។ នេះ​បើ​តាម​អ្នក​ជំនាញ​និង​មន្ត្រី​មាន​សមត្ថកិច្ច។

លោក​បណ្ឌិត​ គី សេរីវឌ្ឍន៍​ អ្នកជំនាញ​សេដ្ឋកិច្ច​នៃ​រាជបណ្ឌិត្យ​សភា​កម្ពុជា លើក​ឡើង​ថា ជា​រៀង​រាល់ថ្ងៃ ការ​កកស្ទះ​នេះបានបង្ក​ផលប៉ះពាល់​ខាង​សេដ្ឋកិច្ច​យ៉ាង​ច្រើន ដោយសារ​ការ​ចំណាយ​ថ្លៃ​ប្រេង​សាំ​ងដែល​បញ្ឆេះ​ចោល​ ការ​ខាត​ពេល​វេលា​ប្រកបរបរ ហើយ​ក្នុង​ករណី​ខ្លះ ក៏​មាន​ការ​បង្ក​ជា​អំពើ​ហិង្សា​ផង​ដែរ។

«យើង​អាច​វាស់​វែង​បាន​តាមរយៈ​យកចំនួន​រថយន្ត គុណ​ហ្នឹងចំនួន​ម៉ោង​ដែល​ត្រូវ​ស្ទះ​ចរាចរណ៍ យើង​នឹង​អា​ច​គណនា​ឃើញ​ថា ​ក្នុង​មួយថ្ងៃៗ​ហ្នឹង​ ការ​ស្ទះចរាចរណ៍ធ្វើ​ឱ្យ​ឆេះសាំង​ចោល​អស់​ប៉ុន្មាន​លីត្រ​ដែលមិន​បាន​ទៅមុខ។ កត្តាទី​ ២ ការ​ខកខាន​ពេល​វេលា​ក្នុងការ​បំពេញ​ការងារ អាច​ធ្វើ​ឱ្យ​គាត់​បាត់​បង់​ឱកាស​ទទួល​បាន​ប្រាក់​ចំណូល​ក្នុង​អំឡុង​ពេល​កក​ស្ទះ​ហ្នឹង អាចធ្វើ​ឱ្យ​ខូច​កិច្ច​ ឬក៏​គម្រោង​ការ​របស់​គាត់។ ហើយ​ទី ៣ ការកក​ស្ទះ​ចរាចរណ៍នេះ​អាច​បង្កឱ្យ​មាន​អំពើ​ហិង្សា​ទាំង​នៅ​ក្នុងគ្រួសារ និង​អំពើ​ហិង្សា​នៅ​កន្លែង​ធ្វើ​ការ​ផង​ដែរ ដោយសារ​តែ​ការ​កកស្ទះ​ចរាចរណ៍​ធ្វើ​ឱ្យ​យើង​មាន​ភាពមួរម៉ៅ និង​អាច​ធ្វើ​ការ​សម្រេច​ចិត្ត​ខុស​ក្នុង​កិច្ចការ​ផ្សេងៗ»

ទោះយ៉ាងណា ​លោក​ថា នៅ​មិនទាន់​មាន​តួលេខ​ផ្លូវ​ការ​ពី​ចំនួន​នៃ​ការ​ខាតបង់​សេដ្ឋកិច្ច​ ដែល​បណ្តាល​មក​ពី​ការ​កកស្ទះ​ចរាចរណ៍​នៅ​ឡើយ​ទេ។

គិតត្រឹមខែធ្នូ ឆ្នាំ ២០១៩ ​យានយន្ត​ក្នុង​រាជធានី​ភ្នំពេញ​មាន​រថយន្ត​ចំនួន ៥០៨,១៤៣ គ្រឿង និង​ទោចក្រ​យាន​យន្តចំនួន​ ១,៩៦៦,៣២២ គ្រឿង។​ នេះ​បើ​យោង​តាម​ព័ត៌មាន​ដែល​បាន​ចេញ​ផ្សាយ​នៅ​លើ​គណនី​ហ្វេសប៊ុក​របស់​ក្រសួង​សាធារណការ​និង​ដឹកជញ្ជូន ​កាល​ពី​ថ្ងៃ​ទី ១៣ ខែមករា ឆ្នាំ​ ២០២០។

បើតាម​លោក គី សេរីវឌ្ឍន៍ ​ការ​ដោះស្រាយ​បញ្ហា​កកស្ទះ​ចរាចរណ៍​គួរ​តែមាន​រំដោះ​ចិញ្ចើម​ផ្លូវ តាមរយៈ​ការ​បញ្ឈប់​ការ​លក់ដូរ និង​ចត​យានយន្ត​លើ​ចិញ្ចើម​ផ្លូវ ​បង្កើន​ចំណត​សម្រាប់​យាន​យន្ត បង្កើន​ការ​រឹតបន្តឹង​ច្បាប់​ចរាចរណ៍ និង​ផ្តល់​បណ្ណ​បើកបរ​ដោយ​ភាព​ត្រឹមត្រូវ។

លោក ​ហឿ​ សេធុល​ អ្នក​ជំនាញ​ខាង​ចិត្តវិទ្យា​ និង​ជា​ប្រធាន​សមាគម​អ្នក​ប្រឹក្សា​យោបល់ ​និង​អប់រំ​ផ្លូវ​ចិត្ត លើក​ឡើង​ថា អ្នក​ដំណើរ​ដែល​ស្ថិត​ក្នុងការ​កកស្ទះ​ចរាចរណ៍ មាន​ទំនោរបំពាន​ច្បាប់​ចរាចរណ៍​ខ្ពស់ តាមរយៈ​ការ​បង្កើនល្បឿន​យានយន្ត​ នៅ​ពេល​ដែល​ពួក​គេ​ចេញ​ផុត​ពី​តំបន់​កកស្ទះ។ លោក​បន្ត​ថា ការ​កកស្ទះ​ចរាចរណ៍​ធ្វើ​ឱ្យ​មានការ​ផ្លាស់ប្តូរ​អាកប្បកិរិយា ចរិត និង​អារម្មណ៍​របស់​អ្នក​បើកបរ ដែល​ធ្វើ​ឱ្យ​ប៉ះពាល់​ដល់​ការងារ ទំនាក់​ទំនង​សង្គម និង​គ្រួសារ។

អ្នកជំនាញ​ផ្នែក​ចិត្តវិទ្យា​រូបនេះ​បាន​ថ្លែង​បន្ថែម​ថា ប្រសិន​បើ​អ្នក​បើកបរ​ឆ្លងកាត់​ស្ថានភាព​កកស្ទះ​ចរាចរណ៍នេះ​ជា​រៀង​រាល់ថ្ងៃ នោះភាព​តានតឹង​ផ្លូវ​ចិត្ត​ និង​ភាព​តានតឹង​ផ្នែក​សង្គម​របស់​ពួកគេ​ ក៏​កាន់តែ​ធ្ងន់ធ្ងរ ហើយ​គ្រោះ​ថ្នាក់​ចរាចរណ៍​ក៏​នឹង​កើនឡើង​ផង​ដែរ។

«បើសិនជា​យើង​មិនរក​វិធីសាស្រ្ត​ក្នុងការ​ដោះ​ស្រាយ​រវាង​ចន្លោះ ខ្ញុំ​ទុក​ពេល​ថា​ ១០ ឆ្នាំ​ចុះ បើសិន​ជាយើង​រក​វិធីសាស្រ្ត​ក្នុងការ​ដោះ​ស្រាយ ទាក់ទង​ទៅ​នឹងចរាចរណ៍ហ្នឹ​ងអត់បានទេ វា​អាច​នឹង​រួម​ចំណែក​ធ្វើ​ឱ្យ​ធនធាន​របស់​មនុស្សយើង​ ធនធាន​របស់​ប្រជាជន​យើងវា Low productivity [ផលិតភាព​ទាប] ជាពិសេស​អ្នក​នៅ​ទីក្រុង ប្រឈម​មុខ​នឹងស្ត្រេស ប្រឈម​មុខ​នឹង​ភាព​តាន​តឹង​ច្រើន»

កន្លង​មក ​កម្ពុជា​បាន​ដាក់​អនុវត្ត​យន្តការ​ជា​ច្រើន ដើម្បី​ដោះ​ស្រាយ​បញ្ហា​កក​ស្ទះ​នេះ​។ ក្នុង​នោះ​មាន​ដូច​ជា ការ​រឹត​បន្តឹង​ការ​អនុវត្ត​ច្បាប់​ចរាចរណ៍​ ​ការ​បំពាក់​កាមេរ៉ា​សុវត្ថិភាព​នៅ​តាម​ភ្លើង​ស្តុប​សំខាន់ៗ ​ការ​សាងសង់​ស្ពាន​អាកាស​បន្ថែម​ពី​លើ​ផ្លូវ​ដែល​មា​ន​ស្រាប់ ការ​ហាម​មិនឱ្យ​ចត​លើ​ផ្លូវ​មួយចំនួន​ ការ​បំពាក់ភ្លើង​ស្តុប​វ័យ​ឆ្លាត ​និង​ការ​ដាក់​ឱ្យ​ដំណើរ​ការ​សេវាកម្ម​រថយន្ត​ក្រុង​សាធារណៈ​ជាដើម។​ ក៏​ប៉ុន្តែ​ យន្តការ​ទាំង​នោះ​ត្រូវបាន​គេ​មើល​ឃើញ​ថា ​នៅ​មិនទាន់​មាន​ប្រសិទ្ធភាព​គ្រប់​គ្រាន់​នៅឡើយ ខណៈ​ចំនួន​អ្នក​បើកបរ​និង​យានយន្ត​នៅ​លើ​ដងផ្លូវ​នីមួយៗ ក្នុង​រាជធានី​នេះ បន្ត​កើន​ឡើង​ពី​មួយថ្ងៃ​ទៅ​មួយ​ថ្ងៃ។

អ្នកបើកបរ​កំពុង​ធ្វើ​ដំណើរ​លើ​ស្ពាន​ច្បារ​អំពៅ រាជធានី​ភ្នំពេញ នៅ​ព្រឹក​ថ្ងៃទី​៨ ខែ​កក្កដា ឆ្នាំ​២០២២។ (កាន់ វិច្ឆិកា/វីអូអេ)
អ្នកបើកបរ​កំពុង​ធ្វើ​ដំណើរ​លើ​ស្ពាន​ច្បារ​អំពៅ រាជធានី​ភ្នំពេញ នៅ​ព្រឹក​ថ្ងៃទី​៨ ខែ​កក្កដា ឆ្នាំ​២០២២។ (កាន់ វិច្ឆិកា/វីអូអេ)

លោក គង់ រតនៈ​ អ្នក​ជំនាញ​ និង​អ្នក​ពិគ្រោះ​យោបល់​លើ​បញ្ហា​ចរាចរណ៍​ផ្លូវគោកបាន​បកស្រាយ​ថា មាន​កត្តា​ធំៗ​បី ​ដែល​បណ្តាល​ឱ្យ​មាន​ការ​កក​ស្ទះ​ចរាចរណ៍​នេះ​ដូចជា កំណើន​យានយន្ត​ ឥរិយាបថ​របស់​អ្នក​បើកបរ និង​កង្វះ​ចំណត​សាធារណៈ។​

លោក គង់ រតនៈ បាន​ថ្លែង​បន្ថែម​ថា ​ដំណោះស្រាយសម្រាប់​ការ​កកស្ទះ​ចរាចរណ៍​អាច​ធ្វើ​ឡើង​បាន​ លុះ​ត្រា​តែមាន​ការ​ចូលរួម​ពី​អ្នក​បើកបរ​ផ្ទាល់ និង​ពី​រដ្ឋាភិបាល។

«វិធានការ​ក្នុង​រយៈពេល​ខ្លី​ គឺ​គាត់​ត្រូវតែកំណត់​គោលដៅ​កន្លែង​ដែល​ស្ទះ ហើយ​ឱ្យ​មន្រ្តី​សមត្ថកិច្ច​គាត់​ទៅជួយ​សម្រួល ប្រសើរ​ជាង​ទៅចាប់។ ដូច​ប្រជាពលរដ្ឋ​គាត់​បានរអ៊ូរទាំ​កន្លង​មក គាត់​ថា ​ពេល​ដែល​រឹតបន្តឹង​ចរាចរណ៍​ គឺ​មាន​មុខ​សមត្ថកិច្ច ប៉ុន្តែ​នៅ​ពេល​ដែល​ស្ទះ​ គឺអត់​មាន​ទេ។ ហើយ​ទី​ ២ សូម​ឱ្យ​រដ្ឋាភិបាល​គួរមាន​កញ្ចប់​សិក្សា​ថា​ តើ​គួរ​ដោះស្រាយ និង​សម្រួល​ខាង​ផ្នែក​វិស្វកម្ម​បែប​ណា ដើម្បី​កុំ​ឱ្យ​ស្ទះ​ហ្នឹង​នៅ​តែបន្ត​ទៀត»

លោក កើត ឆែ អភិបាល​រង​សាលារាជធានីភ្នំពេញ​ បាន​ប្រាប់​ VOA ថា នៅ​មុន​ពេល​ជំងឺ​កូវីដ​១៩ រាល​ដាល ពោលគឺ​មុន​ឆ្នាំ​ ២០២០ ស្ថានភាព​កកស្ទះ​ចរាចរណ៍​គឺ​មាន​ភាព​ធ្ងន់ធ្ងរ ប៉ុន្តែ​លោក​ថា ក្នុង​អំឡុង​ពេល​នៃការ​រីករាលដាល​ជំងឺ​កូវីដ​១៩​ នេះ រាជធានីភ្នំពេញ​មិនមាន​ការ​កកស្ទះ​ខ្លាំង​នោះទេ។ ទោះ​យ៉ាងណា​ លោក​ថា រដ្ឋបាល​សាលារាជធានី​ភ្នំពេញ​បាន​និង​កំពុង​ដោះ​ស្រាយ​បញ្ហា​កកស្ទះ​ចរាចរណ៍​នេះ​ជាបន្ត​បន្ទាប់​ផង​ដែរ។

«បញ្ហា​នេះ​ គឺ​រាជធានី​ភ្នំពេញ​បាន​ខិតខំ​កសាង​ហេដ្ឋារចនា​សម្ព័ន្ធ​សាធារណៈ​បន្ថែម ដើម្បី​ដោះស្រាយ​ប​ញ្ហា​កកស្ទះ។ ដូច​យើង​ឃើញ​ហើយ​ថា រាជរដ្ឋាភិបាល​បាន​អនុញ្ញាត​ឱ្យ​រដ្ឋបាល​រាជធានីធ្វើ​ស្ពាន​អាកាស​ សូម្បីកន្លែងដែល​មាន​ភាពស្មុគស្មាញ យើង​មាន​ច្បាប់​ចរាចរណ៍​ជាច្រើន។ ហើយ​ទាំង​ក្មួយឯង ទាំង​ប្រជាពលរដ្ឋយើង​ក៏​បាន​ទទួល​ផល​ពីការ​អភិវឌ្ឍ​ធ្វើ​ស្ពាន​អាកាស​មួយ​ចំនួន​នៅ​ទីក្រុង​ភ្នំពេញផង​ដែរ។​ ឥឡូវ​យើង​ខិតខំ​ធ្វើ​បន្ថែម​ទៀត​ ដើម្បី​ដោះ​ស្រាយ»

កាលពី​ខែ​ឧសភា ឆ្នាំ​ ២០១៩ លោក ស៊ុន ចាន់ថុល រដ្ឋមន្ត្រី​ក្រសួង​សាធារណការ និង​ដឹកជញ្ជូន និង​ជា​អនុប្រធាន​គណៈកម្មាធិការជាតិ​សុវត្ថិភាព​ចរាចរណ៍​ផ្លូវគោក បានបញ្ជាក់ថា ដើម្បី​កាត់​បន្ថយ​ការ​កកស្ទះ ក្រសួង​គ្រោង​នឹង​រៀបចំ​ដាក់ផ្លូវ​មួយ​ចំនួន​ឱ្យ​ធ្វើ​ដំណើរ​ឯកទិស ផ្លូវ​ខ្លះ​ទៀត​ហាម​មិន​ឱ្យ​រថយន្ត​ចត និង​ផ្លូវខ្លះ​ទៀត​ប្រើ​សម្រាប់​តែ​រថយន្ត​ក្រុង​សាធារណៈ​ប៉ុណ្ណោះ។

ទោះយ៉ាងណា​ រាជធានី​ភ្នំពេញ​ ជាពិសេស​អ្នក​ធ្វើ​ដំណើរ​ជា​ប្រចាំ​ក្នុង​ទីក្រុង​ដ៏​ធំមួយ​នេះ នឹង​មិន​ទាន់​ស្រាកស្រាន្ត​ពី​បញ្ហា​កកស្ទះ​ចរាចរណ៍​ដ៏​ស្មុគស្មាញ​នេះ​នៅ​ឡើយ​ទេ ហើយ​រាល់​ថ្ងៃ ​អ្នក​បើកបរខ្លះនៅ​តែបង្ហោះ​សារ​រអ៊ូរទាំ​លើ​បណ្តាញ​សង្គម ​រាល់​ពេល​ដែល​ពួកគេ​ស្ថិតក្នុងស្ថាន​ភាពកក​ស្ទះ​ចរាចរណ៍​ម្តង​ហើយ​ម្តង​ទៀត៕

XS
SM
MD
LG