អាជ្ញាធររាជធានីភ្នំពេញបានសម្រេចដាក់ផ្នែកខ្លះនៃភូមិចំនួន៤ក្នុងខណ្ឌពោធិ៍សែនជ័យជា«តំបន់លឿងទុំ»រយៈពេល១៤ថ្ងៃ ខណៈករណីឆ្លងជំងឺកូវីដ១៩នៅបន្តកើនឡើងគួរឲ្យព្រួយបារម្ភ។
សេចក្ដីសម្រេចមួយចុះថ្ងៃទី៨ ខែមិថុនា ឲ្យដឹងថា ផ្នែកខ្លះនៃភូមិចោមចៅ៣នៃសង្កាត់ចោមចៅទី២ ផ្នែកខ្លះនៃភូមិត្រពាំងពោធិ៍ ផ្នែកខ្លះនៃភូមិព្រៃព្រីងខាងជើង២និងផ្នែកខ្លះនៃភូមិជម្ពូវ័ន២នៃសង្កាត់ចោមចៅទី៣ ក្នុងខណ្ឌពោធិ៍សែនជ័យ ជា«តំបន់លឿងទុំ»សម្រាប់រយៈពេល១៤ថ្ងៃ គិតចាប់ពីម៉ោងសូន្យ នាថ្ងៃទី១០រហូតដល់ថ្ងៃទី២៣ ខែមិថុនា ឆ្នាំ២០២១។ សេចក្តីសម្រេចបញ្ជាក់ថាការសម្រេចដាក់ផ្នែកខ្លះនៃភូមិទាំងនេះជា«តំបន់លឿងទុំ» គឺដើម្បីទប់ស្កាត់ការឆ្លងរាលដាលនៃជំងឺកូវីដ១៩។
បើតាមសេចក្តីសម្រេច បុគ្គលគ្រប់រូបក្នុង«តំបន់លឿងទុំ» ត្រូវបានហាមឃាត់មិនឲ្យធ្វើដំណើរចេញពីលំនៅឋាន ប៉ុន្តែការធ្វើដំណើរចេញក្រៅអាចត្រូវបានអនុញ្ញាតក្នុងករណីចាំបាច់ និងមានលិខិតអនុញ្ញាតពីរដ្ឋបាលរាជធានីភ្នំពេញ។ ការធ្វើដំណើរទៅទិញអាហារអាចធ្វើឡើងដោយសមាជិកយ៉ាងច្រើន២នាក់ក្នុងមួយលំនៅឋាន និងមិនឲ្យលើស៣ដងក្នុងមួយសប្តាហ៍។
នៅក្នុង«តំបន់លឿងទុំ» ក៏មានការហាមឃាត់រាល់សកម្មភាពការងារ មុខរបរ ឬអាជីវកម្មទាំងអស់ ដែលមិនមែនជាតម្រូវការចាំបាច់ប្រចាំថ្ងៃ។
សេចក្តីសម្រេចបញ្ជាក់បន្ថែមថាតំបន់ទាំងនោះក៏ត្រូវអនុវត្តបម្រាមគោចរផងដែរ ដោយផ្អាកជាបណ្តោះអាសន្នរាល់ការធ្វើចរាចរណ៍និងរាល់សកម្មភាពការងារ មុខរបរឬអាជីវកម្ម នៅចន្លោះម៉ោង៨យប់ដល់ម៉ោង៣ព្រឹក។
នៅថ្ងៃពុធនេះ ក្រសួងសុខាភិបាលឲ្យដឹងថាករណីឆ្លងជំងឺកូវីដ១៩ មានចំនួន៧២៩នាក់ និងស្លាប់១១នាក់ ដែលនាំឲ្យចំនួនអ្នកស្លាប់សរុបកើនឡើងដល់២៨៩នាក់៕
