ភ្ជាប់​ទៅ​គេហទំព័រ​ទាក់ទង

ហ្វីលីពីន​គ្រោង​នឹង​ដោះស្រាយ​​ជម្លោះ​ព្រំ​ដែន​ជា​មួយ​ចិន​នៅ​តុលាការ​អង្គការ​សហ​ប្រជាជាតិ


លោក​រដ្ឋ​មន្រ្តី​ការ​បរទេស​ ហ្វីលីពីន​ Del Rosario​និងលោក Ed Malaya អ្នកនាំពាក្យក្រសួងការបរទេស​ហ្វីលីពីន នៅសន្និសិទ​សារព័ត៌មាន​មួយនៅប្រទេសហ្វីលីពីន នៅថ្ងៃទី១ខែ​កក្កថា​ឆ្នាំ​២០១១។

ប្រទេស​ហ្វីលីពីន​និង​ចិន​ហាក់​ដូច​ជា​ពិបាក​នឹង​រកដោះស្រាយ​លើ​ជម្លោះ​ពួក​គេ​ពី​ការ​ទាមទារ​ពី​ដែន​ដី​នានា​នៅ​សមុទ្រ​ចិន​ខាង​ត្បូង។ បន្ទាប់​ពី​ទស្សនា​ប្រទេស​ចិន​កាល​ពី​សប្តាហ៍​មុន​ រដ្ឋ​មន្ត្រី​ការ​បរទេស​ហ្វីលីពីន​ មាន​ប្រសាសន៍​កាល​ពី​ថ្ងៃ​ចន្ទ័ថា​ ប្រទេស​របស់​គេ​មាន​បំណង​នឹង​លើក​យក​ការ​ទាមទារ​នេះ​ឲ្យ​តុលាការ​អង្គការ​សហ​ប្រជាជាតិ​ដោះស្រាយ។

ប្រទេស​ហ្វីលីពីន​បាន​ត​វ៉ា​ពី​ការ​ប្រឈម​អាវុធ​ជា​មួយ​ចិន​យ៉ាង​ហោច​ណាស់​៧​ដង​នៅ​ក្នុង​ដែន​ដី​ដែល​ហ្វីលីពីន​និយាយ​ថា​ពិត​ជា​ដែន​ដី​របស់​ខ្លួន​នៅ​សមុទ្រ​ចិន​ខាង​ត្បូង។ លោក​រដ្ឋ​មន្រ្តី​ការ​បរទេស​ ហ្វីលីពីន​ Del Rosario​ មាន​ប្រសាសន៍​ថា​ប្រទេស​ចិន​នៅ​តែ​ប្រកាន់​គោល​ជំហរ​ថា​គ្មាន​ការ​រំលោភកើត​ឡើង​ទេ។ លោក​មាន​ប្រសាសន៍​ថា​លោក​បាន​ប្រាប់​មន្ត្រី​ចិន​ជា​ច្រើន​ថា​ ប្រទេស​របស់​លោក​ត្រៀម​ខ្លួន​ជា​ស្រេច​ដើម្បី​ការពារ​ខ្លួន​តាម​មូលដ្ឋាន​ច្បាប់​អន្តរជាតិ។

«យើង​សួរ​ក្រុម​មន្រ្តី​ចិនថា​តើ​ពួក​គាត់​មាន​សុខ​ចិត្ត​ធ្វើ​ដូច​យើង​ដែរ​ ហើយ​ យើង​ក៏​បាន​ស្នើ​ថា​វេទិកា​សម​ស្រប​មួយ​នោះ​អាច​ជា​តុលាការ​អន្តរជាតិ​ស្តីពីច្បាប់​នៃ​ដែន​សមុទ្រ។ យើង​ស្នើ​ថា​ យើង​ទាំង​ពីរ​ភាគី​ទៅ​ជួប​គ្នា​នៅ​តុលាការ​អន្តរជាតិ​ស្តី​អំពី​ច្បាប់​ដែន​សមុទ្រ។ ការ​ឆ្លើយ​តប? ខ្ញុំ​មិន​ច្បាស់​ទេ​ថា​មាន​ការ​ឆ្លើយ​តប​មួយ​ទេ»។

ប្រទេស​ហ្វីលីពីន​បាន​ទាមទារ​ឲ្យ​ប្រទេស​ចិន​បាន​ប្រកាន់​ខ្ជាប់​នូវ​សន្ធិសញ្ញា​របស់​អង្គការ​សហ​ប្រជាជាតិ​លើ​ច្បាប់​ស្តី​អំពី​សមុទ្រ​ដែល​ផ្តល់​ឲ្យ​ប្រទេស​នានា​នូវតំបន់​សេដ្ឋកិច្ច​ចម្ងាយ​២០០​ ម៉ាល​ពី​តំបន់​ដី​គោក​របស់​ពួក​គេ។ ប្រទេស​ហ្វីលីពីន​បាន​ឲ្យ​ដឹង​ថា ​ការ​លុក​លុយ​របស់​ចិន​ក្នុង​ពេល​ថ្មី​ៗ​នេះ​គឺ​ធ្វើ​ឡើង​នៅ​ក្នុង​តំបន់​សេដ្ឋកិច្ច​របស់​ខ្លួន។ ប្រទេស​ចិន​បាន​ប្រកាន់​ថា​ខ្លួន​មាន​អធិបតេយ្យភាព​លើ​ដែន​ដី​នៅ​ទូទាំង​សមុទ្រ​ចិន​ខាង​ត្បូង​អស់​ពេល​ជា​ច្រើន​សតវត្សរ៍​មក​ហើយ។

តំបន់​ជម្លោះ​Spratlys​ ដែល​គេ​ជឿ​ថា​មានអណ្តូង​ប្រេង​និង​ឧស្ម័ន​យ៉ាង​ច្រើន​នោះ​ត្រូវ​បាន​ប្រទេស​ចិន​ ហ្វីលីពីន​ វៀតណាម​ ម៉ាឡេស៊ី​ ព្រុយនេ​ និង​តៃវ៉ាន់​បាន​ទាម​ទារ​ផ្នែក​ទាំង​អស់​ឬ​ផ្នែក​ខ្លះ។

នៅ​ក្នុង​សន្និសីទ​សារព័ត៌មាន​កាល​ថ្ងៃ​ច័ន្ទ លោក​ Del ​Rossario​ មាន​ប្រសាសន៍​ថា​លោក​នៅ​តែ​សង្ឃឹម​ថា​ ទោះ​ជា​មាន​ភាព​តាន​តឹង​អំ​ពី​តំបន់​ជម្លោះ​នោះ​ក៏​ដោយ​ក៏​ការ​ទាក់ទង​ជា​មួយ​ប្រទេស​ចិន​ នឹង​មាន​សភាពធម្មតា​ជាង​មុន។ លោក​មាន​ប្រសាសន៍​ថា​ លោក​សង្ឃឹម​ថា​នឹង​លែង​មាន​ការ​ប៉ះ​ទង្គិច​គ្នា​រវាង​នាវា​ហ្វីលីពីន​និង​នាវា​យាម​ល្បាត​ចិន​ទៀត​ហើយ។

«យើងចង់​បាន​ដំណោះ​ស្រាយ​សន្តិភាព។ យើង​ចង់​ដោះស្រាយ​តាម​មូលដ្ឋាន​ច្បាប់​អន្តរជាតិ។ យើង​ចង់​ឲ្យ​មាន​វិធីសាស្រ្ត​ដោះស្រាយ​ពហុភាគី​មួយ​ ហើយ​យើង​មាន​សេចក្តី​ប្រកាស​ពី​ក្រម​សីលធម៌​របស់​ភាគី​ទាំង​អស់​នៅ​សមុទ្រ​ចិន​ខាង​ត្បូង​ដើម្បី​ដោះស្រាយ​បញ្ហា​នេះ»។

លោក​ Del ​Rossario​ មាន​ប្រសាសន៍​ថា​ប្រទេស​ចិន​នៅ​តែប្រកាន់​ខ្ជាប់​ថា​ ប្រទេស​ចិន​ពេញ​ចិត្ត​នឹង​ដោះស្រាយ​បញ្ហា​ជម្លោះ​ព្រំ​ដែន​មួយ​ទល់​នឹង​មួយ​តាម​រយៈ​ការ​ពិភាក្សា​ទ្វេ​ភាគី​ដោយ​គ្មាន​ទាក់ទង​នឹង​ភាគី​ផ្សេង​ទៀត​ដូច​ជា​តុលាការ​អង្គការ​សហ​ប្រជាជាតិ​ទេ។

ដំណើរ​ទស្សនកិច្ច​របស់រដ្ឋ​មន្រ្តី​ការ​បរទេស​ហ្វីលីពីនទៅ​កាន់​ប្រទេស​ចិន​បាន​ត្រួសត្រាយ​ផ្លូវ​ដល់​ទស្សនកិច្ច​របស់​ប្រធានាធិបតី​ Benigno Aquino ដែល​រំពឹង​ថា​នឹង​ធ្វើ​ឡើង​នៅ​ចុង​ខែ​សីហា​ឬ​ដើម​ខែ​កញ្ញា។

ប្រែសម្រួលដោយ ហ៊ុយ សម្ភស្ស

XS
SM
MD
LG