វិធានការ២ដែលបានស្នើឡើងដោយប្រធានាធិបតីហ្វីលីពីនលោក Rodrigo Duterte នៅសប្តាហ៍នេះ នឹងធ្វើឲ្យមានប្រសិទ្ធិភាពខ្លះក្នុងការដោះស្រាយអំពើពុករលួយយ៉ាងធ្ងន់ធ្ងរបំផុតក្នុងប្រទេសនៅតំបន់អាស៊ីនោះ ក៏ប៉ុន្តែ មិនដោះស្រាយបញ្ហានោះបានទេ។ នេះបើតាមក្រុមអ្នកជំនាញ។
ប្រធានាធិបតីហ្វីលីពីនលោក Rodrigo Duterte បានស្នើកាលពីថ្ងៃចន្ទសប្តាហ៍មុននូវវិធីយកពន្ធគយថ្មីមួយរួមជាមួយការលុបបំបាត់ឈ្មួញកណ្តាលដែលជាមនុស្សជួយពួកពាណិជ្ជករដឹកទំនិញចូល ឬចេញពីប្រទេស។ លោកប្រធានាធិបតី Duterte បានយកបញ្ហាពុករលួយជាអាទិភាពចាប់តាំងពីចូលកាន់តំណែងនៅឆ្នាំ២០១៦មក។
ប្រទេសហ្វីលីពីន មានចំណាត់ថ្នាក់ទី៩៩នៃប្រទេស១៨០នៅលើបញ្ជីពុករលួយឆ្នាំ២០១៨របស់អង្គការតម្លាភាពអន្តរជាតិដែលពិន្ទុខ្ពស់ជាប្រទេសមិនសូវមានអំពើពុករលួយ។
ថ្វីបើ មានការធ្លាក់ចុះក៏ដោយ អំពើពុករលួយ នៅតែពិបាកដោះស្រាយនៅក្នុងប្រទេសហ្វីលីពីន ពីព្រោះតែ ពួកពាណិជ្ជករនិងមន្រ្តីចាប់តាំងពីក្រសួងថ្នាក់មូលដ្ឋានរហូតដល់រដ្ឋាភិបាលកណ្តាលបានចូលរួមក្នុងការប្រព្រឹត្តអំពើពុករលួយនោះ។
លោក Eduardo Araral ជាសាស្រ្តាចារ្យជំនួយនៅឯសាលាគោលនយោបាយសាធារ ណៈនៃសាកលវិទ្យាល័យជាតិសិង្ហបុរីនិយាយថា៖ «មិនមានប្រព័ន្ធណាមួយដែលមនុស្សជាតិ មិនអាចរកវិធីផ្សេងបានទេ។ តែងតែ មានចន្លោះប្រហោងខ្លះ ដូច្នេះអ្វីដែលសំខាន់គឺថា តើប្រព័ន្ធផ្សេងទៀត មានភាពប្រសើរជាងប្រព័ន្ធចាស់ដែរឬទេ»។
លោក Araral មានប្រសាសន៍ទៀតថា អំពើពុករលួយក្នុងប្រទេសហ្វីលីពីន បានលេចធ្លោពីព្រោះតែវាមាន «ការស៊ុមគ្រលំ» ហើយទាក់ទិននឹងពួកអ្នកមានផលប្រយោជន៍តាមរយៈទំនាក់ទំនងរវាងពាណិជ្ជករនឹងរដ្ឋាភិបាល។
បញ្ហាដែលមានអាយុរាប់ទសវត្សរ៍មកហើយនោះ បានត្រូវគេស្តីបន្ទោសថាកើតឡើងដោយសារមានភាពក្រីក្រយ៉ាងខ្លាំងដែលប៉ះពាល់ជនជាតិហ្វីលីពីនប្រហែល២០ភាគ រយ ដោយបានបង្វែរប្រភពធនធានដែលអាចជួយជនក្រីក្រ។ អំពើពុករលួយ ក៏ធ្វើឲ្យពួកអ្នកវិនិយោគទុនបរទេសមានការប្រយ័ត្នប្រយែងចំពោះការសូកប៉ាន់ និងការអនុគ្រោះនិយម។ ហ្វីលីពីន មានចំណាត់ថ្នាក់ទី១២៤នៃប្រទេសទាំងអស់ចំនួន១៩០នៅលើតារាងនៃប្រទេសងាយស្រួលក្នុងការធ្វើពាណិជ្ជកម្មរបស់ធនាគារពិភពលោកនៅឆ្នាំនេះ។
របាយការណ៍បណ្តាញព័ត៌មាន Online របស់ហ្វីលីពីនមានឈ្មោះថា Rappler.com ប្រាប់ឲ្យដឹងថា ហ្វីលីពីនបានបាត់បង់ប្រាក់ ៤១០,៥ពាន់លានដុល្លាររវាងឆ្នាំ១៩៦០ដល់ឆ្នាំ២០១១ «ទៅក្នុងលំហូរហិរញ្ញវត្ថុខុសច្បាប់»។ លោក Rajiv Biswas ប្រធានសេដ្ឋវិទូតំបន់អាស៊ីប៉ាស៊ីហ្វិកនៅឯក្រុមហ៊ុនស្រាវជ្រាវទីផ្សារ IHS Markit ក្នុងប្រទេសសិង្ហបុរី បាននិយាយថា៖ «ខ្ញុំគិតថា ប្រសិនបើយើងក្រឡេកមើលរូបភាពធំឡើងនូវប្រសិទ្ធិភាពរបស់រដ្ឋាភិបាលនិងច្បាប់ទម្លាប់ ហ្វីលីពីននៅមិនទាន់អាចប្រកួតប្រជែងជាមួយប្រទេសខ្លះក្នុងតំបន់អាស៊ីអាគ្នេយ៍»។
ប្រធានាធិបតី Duterte បានសន្យាក្នុងអំឡុងយុទ្ធនាការឃោសនាបោះឆ្នោតរបស់លោកនៅឆ្នាំ២០១៦ថា នឹងបញ្ឈប់អំពើពុករលួយហើយនៅខែធ្នូក្នុងឆ្នាំនោះ បាននិយាយថា លោកនឹងពន្យារពេលដោះស្រាយបញ្ហានោះ។
គេហទំព័រ Reppler.com ប្រាប់ឲ្យដឹងថា «លោក បានស្នើកាលពីថ្ងៃចន្ទសប្តាហ៍មុន ឲ្យលុបចោលកម្រៃជើងសារ «ដែលជាប្រភពពុករលួយដ៏ខ្លាំង»។ គេហទំព័រនោះបានដកស្រង់សម្តីរបស់លោក Duterte មកចុះផ្សាយថា «បើយើងលុបចោលកម្រៃជើងសារ យើង នឹងកាត់បន្ថយអំពើពុករលួយភ្លាម។ វិធានការនេះមិនត្រូវការការអនុម័តពីសភាទេ»។
លោកសាស្រ្តាចារ្យ Araral និយាយថា ប្រធានាធិបតី Duterte ប្រហែលចង់បញ្ឈប់កម្រៃជើងសារដើម្បីបញ្ចៀសការសូកប៉ាន់នៅឯកន្លែងឆែកឆេរការដឹកជញ្ជូន។
ភ្នាក់ងារគយ បានអនុញ្ញាតឲ្យថ្នាំញៀន Mathamphetamine រាប់តោនមកពីបរទេសចូលក្នុងប្រទេស ខណៈដែលប្រធានាធិបតី កំពុងធ្វើសង្គ្រាមប្រឆាំងថ្នាំញៀនរបស់លោកហើយកំពុងចាប់អ្នកប្រើប្រាស់គ្រឿងញៀន។
លោកប្រធានាធិបតី Duterte ត្រូវបានគេស្គាល់ទូទាំងពិភពលោកចំពោះការបង្ក្រាបដ៏ប្រល័យរបស់លោកលើការជួញដូរថ្នាំញៀននៅក្នុងប្រទេសហ្វីលីពីន។ កាលពីសប្តាហ៍មុន លោក បានប្រកាសថា លោក នឹងបណ្តេញបុគ្គលិកគយចំនួន៦៤នាក់ដែលទាក់ទិននឹងអំពើពុករលួយ និងការរំលោភផ្សេងៗទៀត។ គេហទ័ព័ររបស់ប្រធានាធិបតី បានប្រាប់ឲ្យដឹងថា ប្រព័ន្ធ «ពន្ធលើប្រាក់ចំណូលសរុប» ជំនួសឲ្យ «ពន្ធលើប្រាក់ចំណេញ» និងជួយបញ្ឈប់អំពើពុករលួយ។
គេហទំព័ររបស់ប្រធានាធិបតី បានប្រាប់ឲ្យដឹងទៀតថា «ពន្ធលើប្រាក់ចំណូលសរុប» មានន័យថា ការយកពន្ធលើប្រាក់ចំណូលនិងថវិកាដែលមាននៅក្នុងអចលនទ្រព្យនិងសញ្ញាប័ណ្ណ។ «ពន្ធលើប្រាក់ចំណេញ» សំដៅលើការយកពន្ធលើផលិតកម្មក្រោយការឧបត្ថម្ភពីរដ្ឋ និងការផ្ទេរប្រាក់សំណង។
លោក Christian de Guzman អនុប្រធាននិងជាមន្រ្តីជាន់ខ្ពស់ឥណទាននៅអង្គការ Moody’s Sovereign Risk Group បាននិយាយថា «ការបង់ពន្ធស្ថិតនៅក្រោមការត្រួត ត្រារបស់អង្គភាពប្រឆាំងអំពើពុករលួយ។
លោក de Guzman និយាយទៀតថា៖ «ការណ៍នេះប្រាកដអំពីការបង់អ្វីដែលយើងជំពាក់។ យើងមានតម្លាភាពខ្លះអំពីអ្វីដែលក្រុមហ៊ុនទាំងនោះ ធ្វើអាជីវកម្មនៅទីផ្សារ។ហេតុអ្វីបានពួកគេត្រូវបង្ហាញអ្វីដែលផ្សេងពីនេះទៅអាជ្ញាធរពន្ធគយ?»។
អំពើពុក រលួយបានបង្ហាញនូវសញ្ញាធូរស្រាលនៅក្រោមលោកស្រី Benigno Aquino ប្រធានាធិបតីកាន់តំណែងមុនរបស់ប្រធានាធិបតី Duterte ដែលបានព្យាយាមបំបាត់អំពើពុករលួយតាមរយៈឲ្យមានតម្លាភាពឡើងនិងច្បាប់តឹងតែងឡើងលើកិច្ចការជំនួញរបស់រដ្ឋាភិបាល។ ក្នុងអាណត្តិរបស់លោក មុនឆ្នាំ២០១៦ ពលរដ្ឋដែលមានទូរស័ព្ទមានម៉ាស៊ីនថតរូប ក៏អាចចុះផ្សាយពីសកម្មភាពពុករលួយដ៏ខ្លាំងនៅលើបណ្តាញព័ត៌មានសង្គមដែរ។
ចំណាត់ថ្នាក់នៃការងាយស្រួលក្នុងការធ្វើពាណិជ្ជកម្មក្នុងប្រទេសហ្វីលីពីន មានភាពប្រសើរជាងមុនដែលមានលេខ១៣៤នៅឆ្នាំ២០១០។ចំណាត់ថ្នាក់ពុករលួយក្នុងអង្គការតម្លាភាពអន្តរជាតិរបស់ហ្វីលីពីនមានភាពប្រសើរជាងមុនដែលកាលពីឆ្នាំទៅមានចំណាត់លេខ១១១។ លោក de Guzman បាននិយាយទៀតថា ការប្រមូលពន្ធ ត្រូវបានគេមើលឃើញមានភាពប្រសើរឡើងនៅក្រោមប្រធានាធិបតី Duterte។ លោកបង្ហាញពីការកើនឡើងនូវប្រាក់ចំណូលក្នុងរយៈពេលជាង២ឆ្នាំកន្លងមកនេះមកពីការប្រមូលពន្ធលើប្រេងឥន្ធនៈនិងថ្នាំជក់។
លោក Araral និយាយទៀតថា ការខំប្រឹងប្រែងក្នុងរយៈពេលយូរដើម្បីបញ្ឈប់អំពើពុក រលួយ នឹងតម្រូវឲ្យមានការសម្របសម្រួលនិងការប្រតិបត្តិ ដោយមានប៉ូលិសពាក់ព័ន្ធ។ បើពុំដូច្នេះទេ ការណ៍នេះ នឹងមានការលំបាកដើម្បីបញ្ឈប់អ្វីដែលហៅថា បញ្ហាពុករលួយដ៏វិនាសបំផុតនៅក្នុងតំបន់អាស៊ី៕
ប្រែសម្រួលដោយជឹង ប៉ូជីន
