ភ្ជាប់​ទៅ​គេហទំព័រ​ទាក់ទង

ប្រទេស​ប៉េរូ​បោះឆ្នោត ជ្រើសរើស​ប្រធានាធិបតី​ថ្មី


ប្រជាជនរង់ចាំនៅស្ថានីយរថភ្លើងជាមួយរូបភាពជាច្រើនរបស់បេក្ខនារីប្រធានាធីបតី លោកស្រី Keiko Fujimori

អ្នក​បោះឆ្នោត នៅ​ក្នុង​ប្រទេស​ប៉េរូ កំពុង​ជ្រើសរើស​ប្រធានាធិបតី​ថ្មី​មួយ​នៅ​ថ្ងៃ​អាទិត្យ​នេះ។

ការ​ស្ទង់​មតិ​ជា​សាធារណៈ​ចុងក្រោយ​បំផុត បង្ហាញ​ថា បេក្ខនារី Keiko Fujimori និង​បេក្ខជន Pedro Kuczynski មាន​ការ​គាំទ្រ​ប្រកៀកប្រកិត​គ្នា​នៅ​ក្នុង​ការ​បោះឆ្នោត​នេះ។

បេក្ខនារី Fujimori វ័យ​៤១​ឆ្នាំ គឺ​ជា​កូន​ស្រី​របស់​អតីត​ប្រធានាធិបតី​ដែល​មាន​ឈ្មោះ​អាស្រូវ​គឺ​លោក Alberto Fujimori ។ អតីត​ប្រធានាធិបតី​រូប​នេះ កំពុង​ជាប់​ទោស​២៥​ឆ្នាំ ពី​បទ​រំលោភ​សិទ្ធិមនុស្ស​និង​ការ​ប្រព្រឹត្ត​អំពើ​ពុករលួយ​ក្នុង​អាណត្តិ​របស់​លោក។

ចំណែក​ បេក្ខជន Kuczynski វិញ គឺ​ជា​អតីត​សេដ្ឋវិទូ​នៃ​ធនាគារ​ពិភពលោក។ លោក មាន​អាយុ​៧៧​ឆ្នាំ។

បេក្ខភាព​ទាំង​ពីរ សុទ្ធ​តែ​ជា​អ្នក​អភិរក្ស​និយម​លម្អៀង​ស្តាំ។ លោក Kuczynski បាន​គាំទ្រ លោកស្រី Fujimori នៅ​ពេល​ដែល​បេក្ខនារី​រូប​នេះ បាន​ឈរឈ្មោះ​ប្រកួតប្រជែង​យក​តំណែង​ប្រធានាធិបតី​កាល​ពី​ឆ្នាំ​២០១១ ទល់​នឹង​ប្រធានាធិបតី ដែល​នឹង​ចេញ​ពី​តំណែង​គឺ​លោក Ollanta Humala ។

បេក្ខនារី Fujimori បាន​នាំ​មុខ​នៅ​ក្នុង​ការ​ស្ទង់​មតិ​ជា​សាធារណៈ​ថ្មី​បំផុត ប៉ុន្តែ រឿង​អាស្រូវ​ជុំវិញ​ការ​ចោទប្រកាន់​ទាក់ទង​នឹង​ការ​លាង​លុយ​កង្វក់ ប្រឆាំង​នឹង​ជំនួយ​ការ​ជាន់​ខ្ពស់​ម្នាក់​របស់​លោកស្រី បានបង្ក​ឲ្យ​មាន​ផល​ប៉ះពាល់​យ៉ាង​ខ្លាំង​ដល់​បេក្ខនារី​រូប​នេះ ដោយ​បាន​ធ្វើ​ឲ្យ​ការ​ប្រកួត​នេះ ងាយ​ទៅ​រក​បទ​ពិសោធ​របស់​លោកស្រី កាល​ពី​ឆ្នាំ​២០១១ ដែល​នៅ​ពេល​នោះ បេក្ខនារី​រូប​នេះ បាន​ចាញ់​លោក Humala តែ​បន្តិច​ប៉ុណ្ណោះ។

ជាងនេះ​ទៅ​ទៀត ពលរដ្ឋ​ប៉េរូ​ជាច្រើន បាន​ប្តេជ្ញា​ថា នឹង​មិន​បោះឆ្នោត​ឲ្យ​នរណា​ក៏​ដោយ ដែល​ជាប់​ពាក់ព័ន្ធ​នឹង​ឪពុក​របស់​លោកស្រី។

លោកស្រី Fujimori បាន​ព្យាយាម ដាក់​ខ្លួន​ឯង​នៅ​ឲ្យ​ឆ្ងាយ​ពី​ការ​គ្រប់គ្រង​តាមបែបផ្តាច់ការ​របស់​ឪពុក​របស់​លោកស្រី នៅ​ចន្លោះ​ឆ្នាំ​១៩៩០ ដល់​ឆ្នាំ​២០០០។

ប្រសិន​បើ​លោក​ស្រី Fujimori ឈ្នះ​ការ​បោះឆ្នោត​នៅ​ថ្ងៃ​អាទិត្យ​នេះ លោកស្រី នឹង​ក្លាយ​ជា​ប្រធានាធិបតី​ស្រ្តី​ដំបូង​គេ​របស់​ប្រទេស​ប៉េរូ៕

XS
SM
MD
LG