ភ្ជាប់​ទៅ​គេហទំព័រ​ទាក់ទង

លោក​ភែរី​មាន​ឥទ្ធិពល​ក្នុង​ការ​ប្រកួត​តំណែង​ប្រធានាធិបតី​អាមេរិក


លោក​ភែរី​មាន​ឥទ្ធិពល​ក្នុង​ការ​ប្រកួត​តំណែង​ប្រធានាធិបតី​អាមេរិក

នៅ​ក្នុង​នយោបាយ​អាមេរិក​ លោក​ រិក​ ភែរី​ (Rick Perry)​ ​អភិបាល​រដ្ឋ តិចសាស់​ (Texas)​ ដែល​ទើប​តែបាន​ចូល​ក្នុង​ការ​ប្រកួត​តំណែង​ប្រធានាធិតី​នៃ​គណបក្ស​សាធារណរដ្ឋមាន​ឥទ្ធិពលយ៉ាង​ខ្លាំង​លើ​យុទ្ធនាការ​ឃោសនា​បោះឆ្នោត​ប្រធានាធិបតី។ លោក​ ភែរី​ ក៏​បាន​ការពារ​សេចក្តី​អធិប្បាយ​ចម្រួង​ចម្រាសមួយ​ចំនួន​ដែល​លោក​បាន​ធ្វើ​អំពី​នាយក​ធនាគារ​កណ្តាល​របស់​សហរដ្ឋ​អាមេរិកដែរ។

លោក​ ភែរី​ បាន​នាំ​យក​យុទ្ធនាការ​ឃោសនាដើម្បី​តំណែង​ប្រធានាធិបតី​របស់​លោកទៅរដ្ឋ​ញូហាំស្ស៊ើរ​ (New Hampshire)​ ដែល​ធ្វើ​ការ​បោះ​ឆ្នោត​សាក​ល្បង​មុន​គេ ហើយ​ជា​ថ្មី​ម្តង​ទៀត​ លោក​បាន​និយាយ​រិះ​គន់​នយោបាយ​សេដ្ឋកិច្ច​របស់​លោក​ប្រធានាធិបតី​ បារ៉ាក់​ អូបាម៉ា។ លោក​ភែរី​ថ្លែង​ថា៖

«លោក​ប្រធានាធិបតី​ សកម្មភាព​ទទួល​បាន​ផល​ជាង​ពាក្យ​សម្តី ហើយ​សកម្មភាព​របស់​ខ្ញុំ​ក្នុង​ឋានៈ​ជា​អភិបាល​រដ្ឋ​ កំពុង​ជួយ​បង្កើត​ការ​ងារ​នៅ​ក្នុង​ប្រទេស​នេះ។​ សកម្មភាព​របស់​លោក​ប្រធានាធិបតីកំពុង​តែ​បំបាត់​ការ​ងារ​នៅ​ក្នុង​ប្រទេស​នេះ»។

នៅ​ក្នុង​សេចក្តី​ថ្លែង​របស់​លោក​នៅ​រដ្ឋ​ ញូហាំស្ស៊ើរ​ លោក​ ភែរី​ ក៏​បាន​សម្តែងមន្ទិល​សង្ស័យ​ចំពោះការ​ឡើង​កំដៅ​សាកលលោក​ដែរ​ ហើយ​និយាយ​ថា លោក​មិន​គាំទ្រ​កិច្ច​ព្រម​ព្រៀង​សម្រុះ​សម្រួល​គ្នា​ដើម្បី​តម្លើង​កម្រិត​អតិបរិមា​នៃ​ប្រាក់​បំណុល​ជាតិ​ ដែល​លោក​ប្រធានាធិបតី​និង​សមាជិក​សភា​នៃ​គណបក្ស​សាធារណរដ្ឋ​បានយល់​ព្រម​កាល​ពី​ខែ​មុន​នោះ​ទេ។

លោក​ ភែរី​ ក៏​បាន​ត្រូវ​សួរ​អំពីសេចក្តីអត្ថាធិប្បាយ​ចម្រួង​ចម្រាស​ដែល​លោក​បាន​ធ្វើ​កាល​ពី​មួយ​ថ្ងៃ​មុន​នៅ​រដ្ឋ​ អាយអួវ៉ា​ ដែរ ដោយលោក​បាន​រិះ​គន់លោក​ បិន បឺរណាន់គី​ (Ben Bernanke)​ នាយក​ធនាគារ​កណ្តាលរបស់​សហរដ្ឋ​អាមេរិក ដោយ​ពោល​ថា៖

«យើង​នឹង​ពិន័យ​លោក​យ៉ាង​ធ្ងន់​នៅ​ក្នុង​រដ្ឋ​តិចសាស់។​ ខ្ញុំចង់​និយាយ​ថា​ ការ​បោះពុម្ព​លុយ​បន្ថែម​ដើម្បី​លេង​ល្បែងនយោបាយនៅ​ក្នុង​កាលៈទេសៈ​ពិសេស​នៃ​ប្រវត្តិសាស្រ្ត​របស់​អាមេរិក​គឺ​ស្ទើរ​តែ​ជា​អំពើ​ដ៏​មាន​គ្រោះថ្នាក់​ និងក្បត់​ជាតិ»។

ធនាគារ​កណ្តាល​បាន​បញ្ចេញលុយ​ជា​ច្រើន​ពាន់​លាន​ដុល្លារ​បញ្ចូល​ទៅ​ក្នុង​សេដ្ឋកិច្ច​សហរដ្ឋ​អាមេរិកក្នុង​ពេល​ប៉ុន្មាន​ឆ្នាំ​កន្លង​ទៅ​នេះ​ដើម្បី​ជំរុញ​ឲ្យ​សេដ្ឋកិច្ច​និង​ការ​ងារ​បាន​លូត​លាស់​ឡើង​វិញ។

លោក​ ភែរី​ មិន​បាន​និយាយ​ឡើង​វិញ​ ឬ​ដក​ថយ​ពី​សេចក្តី​អធិប្បាយ​របស់​លោក​នៅ​រដ្ឋ​ញូហាំស្ស៊ើរ​ ទេ​ ហើយ​លោក​បាន​និយាយ​កំប្លែង​ជា​មួយ​អ្នកទៅ​ស្តាប់​លោក​ថា​ សេចក្តី​អត្ថាធិប្បាយ​របស់​លោក​បាន​ធ្វើ​ឲ្យ​លោក​មាន​ការ​លំបាក។

សេចក្តី​អត្ថាធិប្បាយ​របស់​លោក​ភែរី​ មិន​គ្រាន់​តែ​ធ្វើ​ឲ្យពួក​ប្រជាធិបតេយ្យ​ខឹង​សម្បា​ប៉ុណ្ណោះ​ទេ​ ក៏​ប៉ុន្តែពួក​សាធារណរដ្ឋ​សំខាន់ៗ​មួយ​ចំនួន​ក៏​ខឹង​ដែរ​ ដែល​ក្នុង​នោះ​រួម​មាន​ទាំង​លោក​ ខាល​ រ៉ូវ (Karl Rove)។​ អតិត​ទី​ប្រឹក្សា​កំពូល​របស់​លោក​ប្រធានាធិបតី​ ចច​ ដិបបិលយូ​ ប៊ុស្ស (George W. Bush)​ បាន​ប្រាប់​ទូរទស្សន៍​ ព័ត៌មាន​ ហ្វក់ស៍​ (Fox News)​ថា​ សេចក្តី​អត្ថាធិប្បាយរបស់​លោក​ ភែរី​ ធ្វើ​ឲ្យ​លោក​មិន​សាក​សម​ជា​ប្រធានាធិបតី​ទេ។

ការ​ចូល​ប្រកួត​ដើម្បី​តំណែង​ប្រធានាធិបតី​របស់​លោក​ ភែរី​ បាន​ធ្វើ​ឲ្យ​អ្នក​អភិរក្ស​និយម​មាន​ការ​រំភើប​ចិត្ត​ ហើយ​ហាក់​ដូច​ជាមាន​ប្រៀប​ជាបេក្ខជន​កំពូល​ពីរ​រូប​ទៀត​នៃ​គណបក្ស​សាធារណរដ្ឋនៅ​ក្នុង​ការ​ស្ទង់​មតិ​សាធារណៈ​ គឺ​លោក​ មីត្ត រ៉មនី​ (Mitt Romney)​ អតីត​អភិបាល​រដ្ឋ​ ម៉ាស្សាជូស្ស៊ែត្តស៍ (Massachusetts)​ និង​លោក​ស្រី​ មីស្ស៊ែល​ បាកម៉ាន់​ (Michele Bachman)​ អ្នក​តំណាង​រាស្រ្ត​ពី​រដ្ឋ​ មីន្នេសូតា​ (Minnesota)។

ក្នុង​ឋានៈ​ជា​អភិបាល​រដ្ឋ​ តិចសាស់​ អស់​រយៈពេល​ជា​យូរ​មក​ហើយ​ លោក​ ភែរី​ ធ្លាប់​បាន​ធ្វើ​សេចក្តី​ថ្លែងដ៏ចម្រូង​ចម្រាស​ជាច្រើនលើក។​ ក៏​ប៉ុន្តែ​របៀប​និយាយ​ដោយ​ចំៗ​របស់​លោក​បាន​ធ្វើ​ឲ្យ​លោក​មាន​ការ​និយម​ច្រើន​ក្នុង​ចំណោម​សកម្មជន​ក្រុម ធី​ ផាធី (Tea Party) ដែល​ខំ​ស្វះ​ស្វែង​រក​ការ​កាត់​បន្ថយទំហំ​របស់​រដ្ឋាភិបាល​សហព័ន្ធ។​ លោក ភែរី​ថ្លែង​ថា៖

«ហើយ​ខ្ញុំ​នឹង​សន្យា​ជា​មួយ​លោក​អ្នក​យ៉ាង​ដូច្នេះ​ ថា​ខ្ញុំ​នឹង​ខំ​ធ្វើ​ការ​រាល់​ថ្ងៃ​ ឲ្យ​អស់​ពី​សមត្ថភាព​ដើម្បី​ធ្វើ​ឲ្យ​រដ្ឋធានី​វ៉ាស៊ីនតោន​ឥត​សំខាន់ទាល់​តែ​សោះ​នៅ​ក្នុងជីវិត​រស់​នៅ​របស់​លោក​អ្នក»។

លោក​ប្រថានាធិបតី​ អូបាម៉ា​ បាន​ប្រាប់​បណ្តាញ​ទូរទស្សន៍​ ស៊ីអិនអិន​ (CNN)​ ថា​ បេក្ខជន​ប្រធានាធិបតី​គួរ​តែប្រយ័ត្នប្រយែង​ជាង​នេះ​បន្តិច​អំពី​អ្វី​ដែល​ពួក​គេ​និយាយ​នៅ​ក្នុង​យុទ្ធនាការ​ឃោសនា​ជាតិ​ ក៏​ប៉ុន្តែ​លោក​បាន​បដិសេធ​មិន​ព្រម​រិះ​គន់លោក​ ភែរី​ ដោយ​ផ្ទាល់​ចំពោះ​សេចក្តី​អត្ថាធិប្បាយរបស់​លោក​អំពី​ធនាគារ​កណ្តាលទេ​ ដោយ​គ្រាន់​តែ​ថា លោក​ទើបនឹងចូល​ក្នុងការ​ប្រកួត​បាន​ប៉ុន្មាន​ថ្ងៃ​ប៉ុណ្ណោះ។

សមាជិក​គណបក្ស​ប្រជាធិបតេយ្យប្រញាប់​ប្រញាល ​ភ្ជាប់​លោក​ ភែរី​ ទៅ​នឹង​ចលនាក្រុម ធី ផាធី (Tea Party)​ ដែល​កំពុងត្រូវ​បានឃើញ​ប្រជាប្រិយភាពរបស់​ក្រុម​នេះ​ធ្លាក់​ចុះ​ក្នុង​ពេល​ប៉ុន្មាន​សប្តាហ៍​កន្លង​ទៅ​នេះ។

លោក​ រ៉បឺត​ ហ្គិប​ (Robert Gibbs)​ អតីត​អ្នក​នាំ​ពាក្យ​ប្រធានាធិបតីលោក​ អូបាម៉ា​ បាន​និយាយ​នៅ​ក្នុង​កម្មវិធី​ថ្ងៃ​នេះ​ (Today Program)​ របស់​បណ្តាញ​ទូរទស្សន៍​ អិនប៊ីស៊ី​ (NBC)។

«ក្រុម​សាធារណរដ្ឋ​ត្រូវ​តែ​ជ្រើស​រើស។​ តើ​ពួក​គេ​នឹង​ធ្វើ​សច្ចាប្រណិធាន​ចំពោះ​ក្រុមធី ផាធី ឬ​ក៏​ពួក​គេ​នឹង​ធ្វើ​ការ​ដើម្បី​សហរដ្ឋ​អាមេរិក។​ ខ្ញុំគិត​ថា​ នេះគឺ​ជា​សំណួរ​ដ៏​សំខាន់​បំផុត​នៅ​ពេល​ដែលសមាជិករដ្ឋសភាត្រឡប់​មក​ធ្វើ​ការ​វិញ»។

អ្នក​វិភាគ​ខ្លះ​ជឿ​ថា​ លក្ខណៈ​និយាយ​ឥត​សំច័យ​របស់​លោក​ ភែរី​ នឹង​ជួយ​លោក​នៅ​ក្នុង​ការ​ប្រកួត​ឲ្យ​បាន​ទទួល​ការ​តែង​តាំង​ជា​បេក្ខជន​ប្រធានាធិបតីនៃ​គណបក្ស​សាធារណរដ្ឋ​ ពីព្រោះ​អ្នក​បោះ​ឆ្នោត​ជា​ច្រើន​របស់​គណបក្សនេះ​ចង់​បាន​បេក្ខជន​អភិរក្យ​និយម​ម្នាក់​ដែល​អាច​ឈ្នះ​លោក​ អូបាម៉ា បាន​នៅ​ក្នុង​ឆ្នាំ​ ២០១២។

អ្នក​វិភាគ​នៃ​បណ្តាញ​ទូរទស្សន៍​ អេប៊ីស៊ី​ (ABC) លោក​ ម៉ាធ្យូ​ ដោវដ៍​ (Matthew Dowd)​ និយាយ​ថា​ បេក្ខជន​និយាយ​ឥត​សំច័យ​ ដូច​ជា​លោក​ រិក​ ភែរី​ និង​ លោក​ស្រី​ មីស្ហែល​ បាកម៉ាន់​ កំពុង​ធ្វើ​ឲ្យ​អ្នក​បោះ​ឆ្នោត​គណបក្ស​សាធារណរដ្ឋ​មាន​ការ​រំភើប​ចិត្ត។

«នេះ​គឺ​ជា​ក្រុម​អ្នក​បោះឆ្នោត​នៃ​គណបក្ស​សាធារណរដ្ឋ​ដែល​កំពុង​តែ​ខឹង​សម្បា ហើយ​ពួក​គេ​មិន​ចង់​បាន​បេក្ខជនចិត្ត​ត្រជាក់​ទេ។ នេះ​គឺ​ជា​ក្រុម​អ្នក​បោះ​ឆ្នោត​ដែល​ពិត​ជា​ចង់បាន​ការ​រំជើប​រំជួល»។

គូ​ប្រជែង​ខាង​គណបក្ស​សាធារណរដ្ឋ​នឹង​ចូល​រួម​នៅ​ក្នុង​ការ​ពិភាក្សា​ដេញ​ដោល​យោបល់គ្នា​រវាង​បេក្ខជន​ និង​យុទ្ធនាការ​ឃោសនា​នៅ​ក្នុង​រដ្ឋ​ដែល​ធ្វើ​ការ​បោះ​ឆ្នោត​សាកល្បង​ដំបូងៗ​គេ​ នៅ​ក្នុង​រយៈ​ពេល​ប៉ុន្មាន​ខែ​ខាង​មុខ​នេះ​ ​មុន​ពេល​ដែល​ដំណើរការ​តែង​តាំង​បេក្ខជន​នឹង​ចាប់​ផ្តើមធ្វើ​នៅ​ក្នុង​រដ្ឋ​ អាយយ៉ូវ៉ា និង​រដ្ឋ​ នូ​ ហាំស្ហឺរ​ នៅ​ដើម​ឆ្នាំ​ក្រោយ៕

ប្រែសម្រួដោយ​កែ យ៉ាន

XS
SM
MD
LG