ក្រសួងការពារជាតិអាមេរិកបានបញ្ជាក់នូវសេចក្តីរាយការណ៍នានាអំពីការផ្ទុះយ៉ាងតិចពីរដងដែលជាលទ្ធផលនៃការ«វាយប្រហារស្មុគស្មាញ» នៅខាងក្រៅអាកាសយានដ្ឋានអន្តរជាតិនៃរដ្ឋធានីកាប៊ុលរបស់ប្រទេសអាហ្វហ្គានីស្ថាននិងថាមានចំនួនការស្លាប់និងរបួសដែលគេមិនទាន់ដឹងចំនួនច្បាស់លាស់។
អ្នកនាំពាក្យមន្ទីរបញ្ចកោណលោក John Kirby បានបញ្ជាក់ថា ការផ្ទុះនោះបានកើតឡើងកាលពីថ្ងៃព្រហស្បតិ៍នៅជិតច្រក Abby Gate នៃព្រលានយន្តហោះនោះ ទីដែលមានមនុស្សរាប់ពាន់នាក់បានធ្វើដំណើរទៅកាន់ក្នុងប៉ុន្មានថ្ងៃចុងក្រោយនេះ ដើម្បីព្យាយាមជម្លៀសចេញពីប្រទេសអាហ្វហ្គានីស្ថានក្រោយការចូលកាន់កាប់របស់ក្រុមតាលីបង់។
ប្រភពពីមន្ត្រីតាលីបង់ជាន់ខ្ពស់បានបញ្ជាក់ប្រាប់វីអូអេថា មានបុរសដាក់គ្រាប់បែកអត្តឃាតម្នាក់បានបំផ្ទុះខ្លួនឯងនៅជិតតំបន់ក្បែរច្រកចូលមួយទៅកាន់ព្រលានយន្តហោះដែលមានមនុស្សកកកុញ រួមទាំងស្ត្រីផង។
ប្រភពពីក្រុមអ្នកស៊ើបការណ៍សម្ងាត់បានប្រាប់វីអូអេថា មានការផ្ទុះទី២ទៀតបានកើតឡើងនៅជិតសណ្ឋាគារ Baron Hotel ដែលនៅចម្ងាយប្រហែល ២០០ម៉ែត្រ ពីច្រកចូលអាកាសយានដ្ឋាននោះ។
នៅមុននោះកាលពីថ្ងៃព្រហស្បតិ៍ រដ្ឋាភិបាលបស្ចិមប្រទេសបានព្រមានពីការវាយប្រហារភេរវកម្មនៅអាកាសយានដ្ឋាននោះ និងថាអ្នកដែលបានប្រមូលផ្តុំគ្នានៅទីនោះដើម្បីឱ្យគេជម្លៀសចេញ គួរចេញពីទីនោះដើម្បីទៅរកកន្លែងមានសុវត្ថិភាពវិញ។
លោក Antony Blinken រដ្ឋមន្ត្រីការបរទេសសហរដ្ឋអាមេរិកបានបញ្ជាក់ជាថ្មីកាលពីថ្ងៃពុធថា សហរដ្ឋអាមេរិកមើលឃើញពីហានិភ័យនៃការគំរាមកំហែងពីក្រុមភេរវករនៅអាហ្វហ្គានីស្ថានដែលមានសម្ព័ន្ធភាពជាមួយក្រុមរដ្ឋអ៊ីស្លាម។
សេតវិមានបាននិយាយកាលពីថ្ងៃព្រហស្បតិ៍ថា ចាប់តាំងពីថ្ងៃទី១៤ ខែសីហា មក សហរដ្ឋអាមេរិកបានជម្លៀសមនុស្សប្រមាណ៩៥.៧០០នាក់តាមជើងយន្តហោះយោធាអាមេរិកនិងប្រទេសសម្ព័ន្ធមិត្ត។
នៅពេលនេះ គេគិតថានៅមានពលរដ្ឋស៊ីវិលអាមេរិកប្រមាណ១.៥០០នាក់ដែលនៅជាប់នៅប្រទេសអាហ្វហ្គានីស្ថាននៅឡើយ។
សូមរង់ចាំព័ត៌មានបន្ថែមពីវីអូអេនៅពេលខាងមុខ។
(ព័ត៌មានខ្លះនៅក្នុងសេចក្តីរាយកាណ៍នេះបានមកពីទីភ្នាក់ងារព័ត៌មាន Associated Press, Agence France-Presse និង Reuters)
