ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

ការប្រជែង​អាសនៈ​ព្រឹទ្ធសភា​អាមេរិក​តំណាង​រដ្ឋ Pennsylvania អាច​កំណត់​ជោគ​វាសនា​របៀបវារៈ​របស់​លោក Biden


រូបផ្គុំ៖ បេក្ខជន​ព្រឹទ្ធសភា​អាមេរិក​តំណាង​រដ្ឋ Pennsylvania ខាង​គណបក្ស​ប្រជាធិបតេយ្យ​លោក John Fetterman (ឆ្វេង) និង​បេក្ខជន​ព្រឹទ្ធសភា​មកពី​គណបក្ស​សាធារណរដ្ឋ​លោក Mehmet Oz។
រូបផ្គុំ៖ បេក្ខជន​ព្រឹទ្ធសភា​អាមេរិក​តំណាង​រដ្ឋ Pennsylvania ខាង​គណបក្ស​ប្រជាធិបតេយ្យ​លោក John Fetterman (ឆ្វេង) និង​បេក្ខជន​ព្រឹទ្ធសភា​មកពី​គណបក្ស​សាធារណរដ្ឋ​លោក Mehmet Oz។

ប្រសិនបើ​គណបក្ស​សាធារណរដ្ឋ​អាច​ដណ្ដើម​គ្រប់គ្រង​ទាំង​រដ្ឋសភា​និង​ព្រឹទ្ធសភា​នៅ​ក្នុង​ការ​បោះឆ្នោត​ពាក់​កណ្ដាល​អាណត្តិ​ប្រធានាធិបតី​នៅ​សហរដ្ឋ​អាមេរិក​នៅ​ថ្ងៃ​ទី ៨ ខែ​វិច្ឆិកា​ខាង​មុខ របៀបវារៈ​ផ្សេងៗ​របស់​លោក​ប្រធានាធិបតី Joe Biden នឹង​ត្រូវ​បាន​បង្អាក់។

ការ​ប្រកួត​ប្រជែង​ដ៏​ប្រកៀកប្រកិត​បំផុត​និង​មាន​ការ​ចាប់​អារម្មណ៍​ខ្លាំង​បំផុត​មួយ​គឺ​ការ​ប្រជែង​ដណ្ដើម​អាសនៈ​ព្រឹទ្ធសភា​តំណាង​រដ្ឋ Pennsylvania។ នៅ​ក្នុង​ការ​ប្រជែង​នេះ បេក្ខជន​ខាង​គណបក្ស​សាធារណរដ្ឋ​លោក Mehmet Oz តទល់​ជាមួយ​នឹង​បេក្ខជន​ខាង​គណបក្ស​ប្រជាធិបតេយ្យ​លោក John Fetterman ដែល​បច្ចុប្បន្ន​គឺ​ជា​អភិបាល​រង​នៃ​រដ្ឋ Pennsylvania នេះ។

យុទ្ធនាការ​ឃោសនា​បោះឆ្នោត​របស់​លោក Fetterman បាន​ផ្សព្វផ្សាយ​វីដេអូ​កំប្លែង​ធ្វើ​ត្រាប់​នៅ​លើ​បណ្ដាញ​សង្គម​អនឡាញ​ដោយ​ចំអក​ឱ្យ​លោក Oz ថា​ខ្វះ​ចំណេះដឹង​អំពី​រដ្ឋ Pennsylvania ដោយ​បង្ហាញ​ថា​លោក​គឺ​ជា​ជន​ឱកាស​និយម​ដែល​ជា​អ្នក​មាន​ទ្រព្យ​ធន​ខ្វះ​ចំណេះដឹង​អំពី​ស្ថានការណ៍​បច្ចុប្បន្ន​មកពី​រដ្ឋ New Jersey ដែល​ជា​រដ្ឋ​នៅ​ជាប់​រដ្ឋ Pennsylvania។

លោក Oz ដែល​ជា​អ្នក​ទើប​ប្រឡូក​នៅ​ក្នុង​ផ្នែក​វេជ្ជសាស្ត្រ​និង​នយោបាយ បាន​ស្វះស្វែង​ធ្វើ​យ៉ាង​ណា​ឱ្យ​អ្នក​បោះឆ្នោត​នៅ​ក្នុង​រដ្ឋ Pennsylvania គិត​ពិចារណា​ថា​តើ​លោក Fetterman អាច​សក្ដិសម​ធ្វើជា​សមាជិក​ព្រឹទ្ធសភា​បាន​ដែរ​ឬ​ក៏​អត់ ដោយសារតែ​លោក Fetterman ទើបតែ​រងគ្រោះ​ដោយសារ​ជំងឺ​ស្ទះ​សរសៃ​ឈាម​ខួរ​ក្បាល​កាលពី​ខែ​ឧសភា គឺ​ក្នុង​រយៈពេល​មិន​យូរ​ប៉ុន្មាន​ក្រោយ​មក​បន្ទាប់ពី​លោក​ត្រូវ​បាន​តែងតាំង​ជា​បេក្ខជន​ឈរ​ឈ្មោះ​បោះឆ្នោត​ខាង​គណបក្ស​ប្រជាធិបតេយ្យ។

សន្លឹក​ឆ្នោត​ដែល​បោះ​មុន​ថ្ងៃ​កំណត់​ចំនួន​ជាង ៦៨៦.០០០ សន្លឹក​នៅ​ក្នុង​រដ្ឋ Pennsylvania ត្រូវ​បាន​បោះ​រួច​ហើយ​គិត​ត្រឹម​ថ្ងៃ​ពុធ។ នេះ​បើ​យោង​តាម​ទិន្នន័យ​របស់​មន្ទីរ​កិច្ចការ​រដ្ឋ​នៃ​រដ្ឋ Pennsylvania។

នៅ​ក្នុង​ការ​ស្ទង់មតិ​មួយ​របស់​បណ្ដាញ​ព័ត៌មាន CNN ដែល​បាន​ធ្វើ​ឡើង​ដោយ​ក្រុមហ៊ុន SSRS ដែល​ជា​ក្រុមហ៊ុន​ស្ទង់មតិ​និង​ស្រាវជ្រាវ​ទីផ្សារ កាលពី​ពាក់​កណ្ដាល​ខែ​តុលា​និង​បាន​ចេញផ្សាយ​កាលពី​ថ្ងៃ​ចន្ទ​កន្លង​ទៅ​នេះ អ្នក​ចូលរួម​នៅ​ក្នុង​ការ​ស្ទង់មតិ​នេះ​ចំនួន ៥១% បាន​និយាយ​ថា​ពួកគេ​គាំទ្រ​លោក Fetterman ចំណែក​ឯ​អ្នក​ចូលរួម​ចំនួន ៤៥% ថា​ពួកគេ​គាំទ្រ​លោក Oz។ ប៉ុន្តែ ការ​ស្ទង់មតិ​ផ្សេងៗ​ទៀត​បាន​បង្ហាញ​ថា ការ​បោះឆ្នោត​នៅ​រដ្ឋ Pennsylvania នេះ មាន​លក្ខណៈ​ប្រកៀកប្រកិត​គ្នា៕

អត្ថបទ​ទាក់ទង

XS
SM
MD
LG