មន្ដ្រីជប៉ុនមានការសង្ស័យថា ការរលាយផ្នែកខ្លះនៃបំពុងដែកនៃប្រេងឥន្ទនៈនុយក្លេអែរ ជាមូលហេតុធ្វើឲ្យកើនកម្រិតវិទ្យុសកម្មឆ្លងចូលទៅក្នុងទឹក នៃរោងចក្រអគ្គីសនី នុយក្លេអែរ ហ្វ៊ូគុស្ស៊ីម៉ា (Fukushima) ក្នុងប្រទេសជប៉ុន។ នៅថ្ងៃច័ន្ទអ្នកធ្វើការក្នុងរោងចក្របានចាប់ផ្ដើមបូមទឹកចេញ ហើយនិយាយថា វិទ្យុសកម្មបានត្រូវរកឃើញថាមាននៅក្នុងទឹកសមុទ្រជិតខាង។
ជាច្រើនថ្ងៃមកហើយ ក្រុមហ៊ុនភ្លើង ថាមពលអគ្គិសនីតូក្យូ (Tokyo Electric Power) បានដឹងថា អាងទឹកនៅក្នុងអគាររបស់ម៉ាស៊ីនតូរប៊ិន ជាប់នឹងម៉ាស៊ីន រ៉េអាក់ទ័រ ទី២ មានវិទ្យុសកម្មដែលមានកម្រិតខ្ពស់។
ទឹកនោះ មានជាតិពុល ១ សែនដង លើសពីទឹកនៅក្នុងស្នូលរបស់ម៉ាស៊ីនរ៉េអាកទ័រមួយ តែ គេមិនដឹងច្បាស់ថា ហេតុម្ដេចបានជាវាទៅជាបែបនេះទេ។
កាលពីថ្ងៃច័ន្ទ អគ្គលេខាធិការនាយកនៃ គណរដ្ឋមន្ដ្រី លោក យូគីអូ អេដាណូ (Yukio Edano) ថ្លែងថា រដ្ឋាភិបាលគិតឃើញថា ខ្លួនបានរកឃើញចម្លើយ។
លោក អេដាណូថ្លែងថា រដ្ឋាភិបាលមានជំនឿថា ទឹកបានទៅប៉ះជាមួយបំពុងដែកឥន្ទនៈនុយក្លេអ៊ែរ ដែលរលាយ ហើយ ប្រព័ន្ធទឹករបស់រោងចក្រ លេចចេញទៅផ្ដុំនៅជាន់ក្រោមអគារ។
ការរៀបចំបូមចេញនូវទឹកដែលមានវិទ្យុសកម្មនៅក្នុងអគារទាំងបីកំពុងដំណើរការ។
ការរៀបចំរិតតែមានសភាពបន្ទាន់ថែមទៀត នៅថ្ងៃច័ន្ទ នៅពេលដែលអ្នកធ្វើការបានរកឃើញទឹកមានវិទ្យុសកម្មដ៏ខ្ពស់ នៅក្នុងផ្លូវរូងដី ឋឹតនៅក្រៅអគារ។ វត្ដមានរបស់ទឹកមានវិទ្យុសកម្មនៅក្នុងផ្លូវរូងដី បង្កើនឱកាសដែលវាអាចលេចចូលទៅក្នុងសមុទ្រដែលឋឹតនៅ ចំងាយបុន្ម៉ានម៉ែត្រប៉ុណ្ណោះ។
ខណៈដែលទឹកមានវិទ្យុសកម្មស្ថិតនៅក្នុងអគារ វាបានកាត់បន្ថយចំនួនម៉ោងធ្វើការរបស់អ្នកធ្វើការនៅក្នុងអគារដោយមានការភ័យខ្លាចថា អាចធ្វើឲ្យគ្រោះថ្នាក់ឆ្លងដល់មនុស្ស។ ការីធ្វើការក្នុងរោងចក្រ សង្ឃឹមដែរថា ពួកគេចៀសវាងមិនឲ្យទឹកនោះឆ្លងចូលទៅក្នុងសមុទ្រដែលអាចបណ្ដាលឲ្យបរិដ្ឋានមានភាពកខ្វក់។
កម្រិតវិទ្យុសកម្មជាតិ Iodine 131 នៅក្នុងទឹកសមុទ្រភាគខាងត្បូងរោងចក្រ មានកំពស់ ១ពាន់ដងលើសពីធម្មតា កាលពីបុន្ម៉ានថ្ងៃកន្លងទៅនេះ។
នៅថ្ងៃច័ន្ទ លោក ហ៊ីដឺហ៊ីកូ នីស្ស៊ីយ៉ាម៉ា (Hidehiko Nishiyama) នាយករងទីភ្នាក់ងារសុវត្ថិភាពនុយក្លេអ៊ែរ និងឧស្សហកម្ម បានផ្ដល់ព័ត៌មានថ្មីៗ។ លោកថ្លែងថា ទិន្នន័យចុងក្រោយបង្ហាញថា ជាតិ Iodine 131 មានកម្រិត១១៥០ ដង នៃកម្រិតស្របច្បាប់ បានត្រូវរកឃើញ នៅចម្ងាយ មួយគីឡូម៉ែត្រកន្លះភាគជើងរោងចក្រ។ លោកថ្លែងថា មិនមានគ្រោះថ្នាក់ដល់សុខភាពសាធារណទេ នៅពេលនេះ។
ក្នុងចម្ងាយ២០គីឡូម៉ែត្រជុំវិញរោងចក្រអគ្គីសនី ដែលត្រូវជម្លៀសមនុស្សចេញ កម្រិតវិទ្យុសកម្មក្នុងអាកាសធាតុ បានចុះទាបជាបន្ដបន្ទាប់ កាលពីថ្ងៃច័ន្ន។ ប្រជាពលរដ្ឋមួយចំនួន ដែលរស់នៅទីនោះបានចូលទៅក្នុងតំបន់វិញ ដើម្បីពិនិត្យមើលគេហដ្ឋានរបស់ខ្លួន ហើយ យកទ្រព្យសម្បត្ដិរបស់ខ្លួនខ្លះ។ រដ្ឋាភិបាលអំពាវនាវសុំឲ្យប្រជាពលរដ្ឋនៅឲ្យឆ្ងាយពីទីនោះ ហើយព្រមានថា តំបន់នោះនៅមានគ្រោះថ្នាក់ដល់សុខភាពនៅឡើយ។
ក្នុងពេលនោះដែរ តំបន់នោះ នៅតែប្រឈមនឹងរលកនៃការរញ្ជួយដីខ្លះៗ។ ការរញ្ជួយដី តាមកម្រិត៦,៥ បានធ្វើឲ្យរង្គើរខ្លាំងដល់ខ័ណ្ឌ មីយ៉ាហ្គី (Miyagi) កាលពីព្រឹកថ្ងៃច័ន្ទនេះ។
ប្រែសម្រួលដោយ អ៊ូ ធួក
