ភ្ជាប់​ទៅ​គេហទំព័រ​ទាក់ទង

បាគីស្ថាន​ធ្វើការ​វាយប្រហារ​លើ​ជនសកម្មប្រយុទ្ធ​ជិត​ព្រំដែន​អាហ្វហ្គានីស្ថាន


ផែន​ទី​ប្រទេស​បាគីស្ថាន។ រដ្ឋាភិបាលបាគីស្ថាន​ធ្វើការ​វាយប្រហារ​លើ​ជនសកម្មប្រយុទ្ធ​ជិត​ព្រំដែន​អាហ្វហ្គានីស្ថាន។

កង​យោធា​នៃ​ប្រទេស​បាគីស្ថាន​បាន​និយាយ​ថា​ ការ​វាយ​ប្រហារ​តាម​អាកាស​បាន​បណ្តាល​ឲ្យ​ជន​សកម្មប្រយុទ្ធ​២៣​នាក់​ស្លាប់​នៅ​ក្នុង​តំបន់​កុលសម្ព័ន្ធ​នា​ប៉ែក​ពាយ័ព្យ​ប្រទេស​នៅ​ជិត​ព្រំដែន​នៃ​ប្រទេសអាហ្វហ្គានីស្ថាន។​

សេចក្តី​ថ្លែងការណ៍​យោធា​មួយ​កាល​ពី​ថ្ងៃអាទិត្យ​បាន​ចែង​ថា​ កង​ទ័ព​អាកាស​របស់​រដ្ឋាភិបាលបាគីស្ថាន​បាន​វាយប្រហារ​លើ​ឃ្លាំង​គ្រាប់រំសេវ​ធំមួយ​នៅ​ក្នុង​ស្រុក​ Khyber និង​ស្រុក​ Waziristan ខាង​ជើង។​ សេចក្តីថ្លែងការណ៍នេះ​ក៏​បាន​និយាយ​ផង​ដែរ​ថា ​មានជន​បរទេស​ខ្លះ​បាន​ត្រូវសម្លាប់​ ក៏​ប៉ុន្តែ​មិន​បាន​ប្រាប់​ឈ្មោះ​ជន​ទាំង​នោះ ​ឬ​មិនបាន​ប្រាប់​ឲ្យ​ដឹង​ទេ​ថា​តើជន​បរទេស​ទាំង​នេះ​ប្រយុទ្ធ​ឲ្យ​ក្រុម​ណា​ឡើយ។​

គេបានដឹង​ជា​យូរមក​ហើយ​ថា ​តំបន់​ Khyber ​ជា​សំបុក​មួយ​របស់​ជន​សកម្មប្រយុទ្ធ​នៅ​ក្នុង​ក្រុម​តាលីបង់​នៅ​បាគីស្ថាន និង​ក្រុម​ Lashkar-e-Islam។​

ក្រុម​យោធាបាគីស្ថាន​បាន​ចាប់ផ្តើម​ធ្វើការ​វាយ​លុក​មួយ​នៅ​ក្នុង​តំបន់ Khyber កាល​ពី​ខែតុលា​ឆ្នាំ២០១៤​ ដោយ​បាន​ធ្វើការ​វាយ​ប្រហារ​តាម​អាកាស និង​ប្រើប្រាស់​កាំភ្លើងធំ ​កាំភ្លើងត្បាល់ ​និង​ក្រុម​ទាហានថ្មើរជើង។​

អាជ្ញាធរ​មិន​បើក​ឲ្យ​ពួក​អ្នកកាសែត​ទៅ​យក​ព័ត៌មាន​ក្នុង​តំបន់​នោះ​ទេ​ ដូច្នេះ​គេ​មិន​អាច​បញ្ជាក់​ដោយ​ឯករាជ្យ​ថា​តើ​ការអះអាង​របស់​ពួក​យោធា​ជា​ការ​ត្រឹមត្រូវ​ឬ​បែបណា​ឡើយ៕

XS
SM
MD
LG