ក្រុមយោធាបាគីស្ថានបាននិយាយថាកាលពីថ្ងៃសៅរ៍កងយន្តហោះប្រយុទ្ធរបស់ពួកគេបានទម្លាក់គ្រាប់បែកនិងបានបំផ្លាញ «កន្លែងលាក់ខ្លួនរបស់ក្រុមភេរវជន» មួយចំនួននៅជិតព្រំដែននៃប្រទេសអាហ្វហ្គីស្ថានបណ្តាលឱ្យជនសកម្មប្រយុទ្ធយ៉ាងតិចណាស់៣១នាក់ស្លាប់។
ផ្នែកទំនាក់ទំនងសាធារណៈនៃអន្តរសេវាកម្មហៅកាត់ថា ISPR ដែលជាសាខាបណ្តាញផ្សាយព័ត៌មាននៃក្រុមយោធាបាគីស្ថានបាននិយាយថា «ការវាយប្រហារតាមអាកាសត្រូវចំគោលដៅ» នៅក្នុងជ្រលងភ្នំ Tirrah នៃស្រុកកុលសម្ព័ន្ធ Khyber ហើយថាវាក៏បានបំផ្លាញ «មជ្ឈមណ្ឌលហ្វឹកហ្វឺនក្រុមអ្នកដាក់គ្រាប់បែកអត្តឃាតមួយ»។ ផ្នែកទំនាក់ទំនងសាធារណៈនេះនិយាយថា «អ្នកដាក់គ្រាប់បែកអត្តឃាតខ្លះ» ស្ថិតនៅក្នុងចំណោមក្រុមជនដែលបានត្រូវសម្លាប់។
អាជ្ញាធរបាគីស្ថានបានបង្កើនកិច្ចប្រតិបត្តិការយោធាប្រឆាំងនឹងជនសកម្មប្រយុទ្ធនៅក្នុងតំបន់កុលសម្ព័ន្ធនៅតាមព្រំដែនជាមួយប្រទេសអាហ្វហ្គានីស្ថានចាប់តាំងពីពេលដែលក្រុមជនសកម្មប្រយុទ្ធបានឆ្មក់ធ្វើការវាយប្រហារមួយប្រឆាំងនឹងសាលារៀនមួយកន្លែងដែលចាត់ចែងដោយក្រុមយោធានៅក្នុងក្រុង Peshawar កាលពីថ្ងៃទី១៦ខែធ្នូដែលបានបណ្តាលឱ្យមនុស្ស១៥០នាក់ស្លាប់ដោយសឹងតែទាំងអស់ជាកុមារៗ។
ក្រុមតាលីបានបាគីស្ថានបានអះអាងទាមទារការទទួលខុសត្រូវដល់ការសម្លាប់រង្គាលនេះ។
កាលពីថ្ងៃសៅរ៍សេចក្តីព្រាងច្បាប់ថ្មីមួយបានត្រូវដាក់ស្នើក្នុងសភាជាតិដើម្បីស្វះស្វែងបង្កើតតុលាការចាត់ចែងដោយក្រុមយោធាដើម្បីកាត់ទោសជនជាប់សង្ស័យថាមានទាក់ទិននឹងការវាយប្រហារភេរវកម្ម។ សមាជិកសភានឹងពិភាក្សាគ្នាអំពីសេចក្តីព្រាងច្បាប់ដែលបានត្រូវដាក់ស្នើនេះនៅថ្ងៃចន្ទហើយគេរំពឹងថាសេចក្តីព្រាងច្បាប់នេះនឹងទទួលបានការអនុម័តនៅថ្ងៃនោះដែរ។ សេចក្តីព្រាងច្បាប់នេះនិយាយថាតុលាការទាំងនេះនឹងត្រូវបង្កើតទ្បើងសម្រាប់រយៈពេលពីរឆ្នាំ៕
