ក្រុមបាតុករគាំទ្រលទ្ធិប្រជាធិបតេយ្យក្នុងទីក្រុងហុងកុងនិយាយថា ពួកគេបានទទួលការលើកទឹកចិត្តដោយមិនបានរំពឹងទុកជាមុនមួយដោយសារចលនាតស៊ូរបស់ពួកគេនៅឯពិធីប្រគល់រង្វាន់ Academy Award លើកទី៨៧នៅសប្តាហ៍នេះ។
លោក Tommy Cheung ជាអ្នករៀបចំចាត់ចែងចលនានោះនិងជាមេដឹកនាំនិស្សិតបានប្រាប់វីអូអេថា រង្វាន់នេះប្រាកដជាលើកទឹកចិត្តដល់ក្រុមបាតុករនៅក្នុងទីក្រុងហុងកុង ពិសេសខណៈដែលចលនានេះស្ថិតនៅក្នុងដំណាក់កាលមិនជឿនលឿនទៅមុខបន្ទាប់ពីការបញ្ចប់ចលនា Occupy Movement កាលពីឆ្នាំទៅមក។
លោក Tommy និយាយថា «នេះជាការលើកទឹកចិត្តយើងធ្វើការប្រយុទ្ធដើម្បីលទ្ធិប្រជាធិបតេយ្យ ជាពិសេសសម្រាប់ក្រុមអ្នកគាំទ្ររបស់យើងនៅខាងក្រៅទីក្រុងហុងកុង។ លោកនិយាយទៀតថា បន្ទាប់ពីចលនាឆ័ត្រនោះមកមនុស្សក្នុងទីក្រុងហុងកុងក៏ត្រូវការអ្វីដែលស៊ីជម្រៅនិងជាក់លាក់ជាងមុនសម្រាប់ការរស់នៅរបស់ខ្លួន។ រង្វាន់នេះបង្ហាញថា បន្ទាប់ពីចលនានោះមនុស្សក្នុងទីក្រុងហុងកុងនៅតែមានជំនឿយ៉ាងខ្លាំងទៅលើលទ្ធិប្រជាធិបតេយ្យ»។
ក្នុងអំឡុងនៃពិធីទទួលពានរង្វាន់ Oscar ក្នុងទីក្រុង Los Angeles កាលពីថ្ងៃអាទិត្យអ្នកចម្រៀង Common បានសម្តែងនូវការគាំទ្របាតុករលទ្ធិប្រជាធិបតេយ្យនៅក្នុងក្រុងហុងកុងក្នុងអំឡុងពេលនៃសុន្ទរកថាទទួលយករង្វាន់សម្រាប់ចម្រៀងដ៏ល្អបំផុតនៅក្នុងខ្សែភាពយន្ត។ លោកនិងអ្នកចម្រៀង John Legend បានទទួលរង្វាន់ Glory មកពីខ្សែភាពយន្តមានឈ្មោះថា Selma។ ខ្សែភាពយន្តនោះរៀបរាប់ពីចលនាសិទ្ធិពលរដ្ឋក្នុងទសវត្សរ៍១៩៦០៕
