សាលាដំបូងរាជធានីភ្នំពេញ នៅព្រឹកថ្ងៃពុធនេះ បានបន្តការសាកសួរលោក អ៊ុំ សំអាន អ្នកតំណាងរាស្ត្រមណ្ឌលសៀមរាប ក្នុងសំណុំរឿងការប្រើប្រាស់ផែនទីកម្ពុជា-វៀតណាម បន្ទាប់ពីសាលាឧទ្ធរណ៍បានច្រានចោលសំណើសុំនៅក្រៅឃុំរបស់តំណាងរាស្ត្ររូបនេះកាលពីសប្តាហ៍មុន។ នេះបើយោងតាមការបញ្ជាក់ពីក្រុមមេធាវីការពារក្តីឲ្យលោក អ៊ុំ សំអាន។
លោក សំ សុខគង់ មេធាវីការពារក្តីលោក អ៊ុំ សំអាន បានប្រាប់អ្នកសារព័ត៌មាននៅក្រៅសាលាដំបូងរាជធានីភ្នំពេញថា ចៅក្រមស៊ើបសួរលោក តុប ឈុនហេង បានសួរកូនក្តីលោកពាក់ព័ន្ធនឹងការប្រើប្រាស់បណ្តាញសង្គមហ្វេសប៊ុក ប៉ុន្តែកូនក្តីរបស់លោកបានបដិសេធមិនឆ្លើយរាល់សំណួរទាំងអស់។ លោកបញ្ជាក់ថា ក្រុមមេធាវីនឹងស្វះស្វែងរកការបកស្រាយផ្លូវច្បាប់ទៅលើមាត្រា៨០នៃច្បាប់រដ្ឋធម្មនុញ្ញដែលនិយាយពីអភ័យឯកសិទ្ធិរបស់តំណាងរាស្ត្រ។
លោក សំ សុខគង់ បញ្ជាក់ថា៖
«គោលបំណងរបស់មេធាវីចង់ស្នើទៅក្រុមប្រឹក្សាធម្មនុញ្ញ ដើម្បីបកស្រាយមាត្រា៨០ហ្នឹង ហើយនិងស្ថាប័នឧត្តមក្រុមប្រឹក្សានៃអង្គចៅក្រម ចំពោះការចាប់ខ្លួន ការឃុំខ្លួនដែលផ្ទុយទៅនឹងរដ្ឋធម្មនុញ្ញហ្នឹង»។
មេធាវីការពារក្តីលោក អ៊ុំ សំអាន ម្នាក់ទៀត គឺលោក ហែម សុជាតិ បាននិយាយស្រដៀងគ្នាប្រាប់ក្រុមអ្នកសារព័ត៌មានថា តុលាការបានសួរកូនក្តីលោក ថាតើហេតុអ្វីបានជាកូនក្តីលោកប្រើបណ្តាញសង្គមហ្វេសប៊ុករិះគន់រឿងព្រំដែន ខណៈដែលរដ្ឋាភិបាល មានគណៈកម្មការព្រំដែននិងក្រុមការងារបច្ចេកទេសសម្រាប់ពិនិត្យលើកិច្ចការព្រំដែន។ លោក ហែម សុជាតិ បន្ថែមថា កូនក្តីរបស់លោកបានរក្សាជំហរមិនឆ្លើយរាល់សំណួរទាំងអស់ ដោយសំអាងថា លោកនៅមានអភ័យឯកសិទ្ធិជាអ្នកតំណាងរាស្ត្រ។
អ្នកតំណាងរាស្ត្រ អ៊ុំ សំអាន បានបដិសេធមិនឆ្លើយរាល់សំណួររបស់ចៅក្រមស៊ើបសួរនៃសាលាដំបូងរាជធានីភ្នំពេញ ខណៈដែលលោកនៅមានអភ័យឯកសិទ្ធិជាអ្នកតំណាងរាស្រ្ត។ ក្រុមមេធាវីការពារក្តីរបស់លោក អ៊ុំ សំអាន និយាយថា ពួកគេនឹងស្នើឲ្យស្ថាប័នច្បាប់កំពូលផ្សេងទៀតពិនិត្យលើនីតិវិធីច្បាប់ទាក់ទងការចាប់ខ្លួនលោក អ៊ុំ សំអាន។
លោក អ៊ុំ សំអាន តំណាងរាស្ត្រគណបក្សសង្គ្រោះជាតិ ដែលមានសញ្ជាតិអាមេរិកាំងត្រូវបានចាប់ខ្លួននៅខេត្តសៀមរាប នៅយប់ថ្ងៃអាទិត្យទី៩ខែមេសា ឆ្នាំ២០១៦ គឺមិនបានប៉ុន្មានម៉ោងផង ក្រោយពីលោកត្រឡប់មកពីស.រ.អា.វិញ។ លោកត្រូវបានបញ្ជូនខ្លួនទៅតុលាការក្រុងភ្នំពេញភ្លាមៗនៅព្រឹកថ្ងៃច័ន្ទ ទី១០ ខែមេសា ហើយត្រូវតុលាការចោទប្រកាន់ពីបទ «ញុះញង់ឱ្យប្រព្រឹត្តបទឧក្រិដ្ឋជាអាទិ» និង«ញុះញង់ឱ្យមានការរើសអើង»។
នៅមុនពេលតុលាការធ្វើការចោទប្រកាន់រូបលោក លោក អ៊ុំ សំអាន ត្រូវបានអាជ្ញាធរចោទប្រកាន់ថា បានប្រព្រឹត្តបទល្មើសជាក់ស្តែងក្នុងការរិះគន់រដ្ឋាភិបាលទាក់ទងនឹងការប្រើប្រាស់ផែនទី និងការបោះបង្គោលព្រំដែនកម្ពុជាវៀតណាម។
បន្ទាប់ពីលោក អ៊ុំ សំអាន ត្រូវបានចាប់ និងឃុំខ្លួន សភាដែលមានតែតំណាងរាស្រ្ត៦៣រូបមកពីគណបក្សប្រជាជនកម្ពុជា កាលពីថ្ងៃអង្គារទី១២ ខែមេសា បានសម្រេចអនុញ្ញាតឲ្យតុលាការបន្តនីតិវិធីឃុំខ្លួនលោក អ៊ុំ សំអាន។ ក្នុងថ្ងៃដដែលនោះ លោក តុប ឈុនហេង ចៅក្រមស៊ើបសួរនៃតុលាការក្រុងភ្នំពេញ បានចេញដីកាសម្រេចឃុំខ្លួនលោក អ៊ុំ សំអាន ជាបណ្តោះអាសន្នរយៈពេលអតិបរមា៤ខែ។
VOA ព្យាយាមសុំការអធិប្បាយពីលោក តុប ឈុនហេង ចៅក្រមស៊ើបសួរនៃតុលាការក្រុងភ្នំពេញ ដើម្បីសុំការអធិប្បាយទៅលើការបដិសេធមិនឆ្លើយសំណួរ ដែលធ្វើឡើងដោយ លោក អ៊ុំ សំអាន តែនៅមិនទាន់អាចទាក់ទងបានទេនៅថ្ងៃពុធនេះ។
ប៉ុន្តែលោក លី សុផាន់ណា អ្នកនាំពាក្យសាលាដំបូងរាជធានីភ្នំពេញបានប្រាប់ VOA ថា លោក អ៊ុំ សំអាន បានធ្វើឲ្យបាត់ឱកាសក្នុងការឆ្លើយដោះបន្ទុកលើខ្លួនលោក នៅពេលលោកមិនព្រមឆ្លើយសំណួររបស់ចៅក្រមស៊ើបសួរ។
អ្នកនាំពាក្យរូបនេះបញ្ជាក់ថា៖
«ជនត្រូវចោទ អ៊ុំ សំអាន ហ្នឹងដែលគាត់មិនឆ្លើយទាំងអស់ចំពោះសំណួរដែលចៅក្រមស៊ើបសួរបាន សួរ មិនបានប៉ះពាល់ទៅដល់នីតិវិធីនៃកិច្ចស៊ើបសួររបស់ចៅក្រមស៊ើបសួរទេ ហើយវាធ្វើឲ្យជនជាប់ចោទខ្លួនឯងហ្នឹង បាត់បង់នូវប្រយោជន៍ ដោយសារតែគាត់អត់បានឆ្លើយដោះបន្ទុកទៅលើខ្លួនគាត់ នៅចំពោះមុខចៅក្រមស៊ើបសួរ»។
កាលពីសប្ដាហ៍មុន បន្ទាប់ពីដើរចេញពីអង្គសវនាការនៅសាលាឧទ្ធរណ៍លោក អ៊ុំ សំអាន បានប្រាប់ក្រុមអ្នកសារព័ត៌មានថា លោកមិនមានសង្ឃឹមថានឹងបាននៅក្រៅឃុំទេ ហើយបានចោទតុលាការថា បានរំលោភអភ័យឯកសិទ្ធិតំណាងរាស្ត្ររបស់លោក។ លោកបានស្នើឲ្យលោកនាយករដ្ឋមន្ត្រី ហ៊ុន សែន ទៅបំភ្លឺនៅរដ្ឋសភាដោយលោកបានចោទលោកនាយករដ្ឋមន្ត្រីថា បានរំលោភទៅលើមាត្រា ៨០នៃរដ្ឋធម្មនុញ្ញ។
យ៉ាងណាក៏ដោយលោក ហ៊ុន សែន បានថ្លែងខ្លាំងៗនៅក្នុងរដ្ឋសភាកាលពីខែមេសាថា លោកនឹងចាប់ខ្លួនអ្នកទាំងឡាយណាដែលនិយាយថា រដ្ឋាភិបាលប្រើផែនទីក្លែងក្លាយ។
លោក សុខ ឥសាន អ្នកនាំពាក្យគណបក្សប្រជាជនកម្ពុជារបស់លោកនាយករដ្ឋមន្រ្តី ហ៊ុន សែន បានបញ្ជាក់សារជាថ្មីថា ការចាប់ឃុំខ្លួនលោក អ៊ុំ សំអាន គឺធ្វើឡើងដោយតំណាងរាស្ត្ររូបនេះ បានប្រព្រឹត្តបទល្មើសជាក់ស្តែង។ លោកបន្ថែមថា សកម្មភាពរបស់លោក អ៊ុំ សំអាន នៅលើបណ្តាញសង្គមហ្វេសប៊ុក មិនមែនជាការសម្តែងមតិនោះទេ ហើយថា ការចោទប្រកាន់របស់លោក អ៊ុំ សំអានដែលថា រដ្ឋាភិបាលបានប្រើផែនទីក្លែងក្លាយ គឺជាការប្រមាថស្ថាប័នកំពូលរបស់ជាតិ។
លោក សុខ ឥសាន ថ្លែងថា៖
«ផែនទីដែលរដ្ឋាភិបាលប្រើគឺអនុម័តដោយរដ្ឋសភា ព្រឹទ្ធសភា ហើយមានព្រះមហាក្សត្រឡាយព្រះហស្ថលេខា លើព្រះរាជក្រមប្រកាសឲ្យប្រើ ហើយបើ អ៊ុំ សំអាន ថាផែនទីក្លែងក្លាយ អាហ្នឹងមានព្រះមហាក្សត្រក្លែងក្លាយ សភាក្លែងក្លាយ ព្រឹទ្ធសភាក្លែងក្លាយ អាហ្នឹងហើយជាការប្រមាថស្ថាប័នរបស់ជាតិ»។
បច្ចុប្បន្ននេះ មានសមាជិក និងសកម្មជនគណបក្សសង្គ្រោះជាតិចំនួន១៦រូបហើយ បានជាប់ឃុំឃាំង ក្នុងនោះក៏មានលោក ហុង សុខហួរ សមាជិកព្រឹទ្ធសភា ដែលជាប់ចោទក្នុងរឿងផែនទី និងរឿងព្រំដែនកម្ពុជាវៀតណាមដូចលោក អ៊ុំ សំអានដែរ។ ក្រុមមេធាវីការពារក្តីលោក អ៊ុំ សំអាន បានបញ្ជាក់ថា ពួកគេបានដាក់ពាក្យប្តឹងទៅតុលាការកំពូលកាលពីថ្ងៃច័ន្ទ ដើម្បីសុំឲ្យលោក អ៊ុំ សំអានបានស្ថិតនៅក្រៅឃុំ៕
