មន្រ្តីក្រសួងមហាផ្ទៃឲ្យដឹងថា សមត្ថកិច្ចបន្តស្វែងរកក្រុមមនុស្សដែលពួកគេថាជាមេខ្លោងក្នុងការបំពុលព័ត៌មានទាក់ទងនឹងការរឹតបន្តឹងច្បាប់ចរាចរណ៍ ដែលមានការផាកពិន័យច្រើន ហើយដែលត្រូវបានអនុវត្តចាប់តាំងពីខែឧសភា ឆ្នាំ២០២០នេះ។
ក្នុងពេលអនុវត្តការរឹតបន្តឹងនេះ ប្រជាពលរដ្ឋមួយចំនួនបានរិះគន់ ដោយសារការផាកពិន័យច្រើន ខណៈប្រជាពលរដ្ឋកំពុងប្រឈមនឹងវិបត្តិជំងឺកូវីដ១៩។ កន្លងទៅ សមត្ថកិច្ចបានឃាត់ខ្លួនមនុស្សមួយចំនួន ពាក់ព័ន្ធនឹងការរិះគន់ការរឹតបន្តឹងច្បាប់ចរាចរណ៍ ដោយចាត់ទុកថាការរិះគន់នោះមានលក្ខណៈជេរប្រមាថកម្លាំងសមត្ថកិច្ច។ ពួកគេត្រូវបានឲ្យធ្វើកិច្ចសន្យា ហើយសារភាពក្នុងវីដេអូ និងបង្ហោះលើវេបសាយរបស់អគ្គស្នងការដ្ឋាននគរបាលជាតិ។
ក្នុងកិច្ចប្រជុំស្តីពីការបូកសរុបរបាយការណ៍ ៦ខែ ដែលធ្វើឡើងនៅទីស្តីការក្រសួងមហាផ្ទៃ លោកស្រី មិន ម៉ាណវី អគ្គលេខាធិការជាតិសុវត្ថិភាពចរាចរណ៍ផ្លូវគោក បានថ្លែងថា ការរឹតបន្តឹងបទល្មើសចរាចរណ៍កន្លងមកមានប្រតិកម្មពីប្រជាជន ហើយលោកស្រីចាត់ទុកថា ក្នុងចំណោមប្រតិកម្មនោះក៏មាន «ទស្សនៈទុទិដ្ឋិនិយមបែបអគតិ និងមាននិន្នាការលម្អៀងទៅផ្នែកនយោបាយ ក្នុងបំណងញុះញង់បំពុលបរិយាកាសសង្គម» ប្រឆាំងនឹងចំណាត់ការរបស់សមត្ថកិច្ច និងរដ្ឋាភិបាល។
លោកស្រីបន្តថា ក្នុងនោះមានការបំផុសគំនិតប្រឆាំងការអនុវត្តច្បាប់ ក្រោមហេតុផលប៉ះពាល់អ្នកក្រីក្រ ក្នុងពេលមានវិបត្តិកូវីដ១៩។
បើតាមលោកស្រី មិន ម៉ាណវី ចាប់តាំងពីខែឧសភាមក ប៉ូលិសបានហៅមនុស្ស៩នាក់ មកសាកសួរ ហើយពួកគេបានសារភាពកំហុសក្នុងនោះមាន ៤នាក់ នៅភ្នំពេញ ២នាក់ នៅកំពង់ស្ពឺ ១នាក់នៅបាត់ដំបង ១នាក់នៅខេត្តកំពត និង១នាក់នៅស្ទឹងត្រែង។ លោកស្រីបន្តថា អាជ្ញាធរកំពុងបន្តស្វែងរកមេខ្លោងនៃការបង្កើតព័ត៌មានទាំងនោះ។
លោកស្រីមានប្រសាសន៍ថា៖ «បច្ចុប្បន្នសមត្ថកិច្ចជំនាញកំពុងបន្តរកប្រភព និងមេខ្លោងដឹកនាំបញ្ជាក្នុងការប្រឌិតព័ត៌មានក្លែងក្លាយទាំងនោះ។ ទន្ទឹមនឹងនេះ សមត្ថកិច្ចនៅតែបន្តយកចិត្តទុកដាក់តាមដានក្តាប់ និងចាត់វិធានការតាមផ្លូវច្បាប់ជាបន្តទៀត ចំពោះការប្រឌិតព័ត៌មានក្លែងក្លាយបំពុលបរិយាកាសសង្គម»។
អគ្គស្នងការនគរបាលជាតិលោក នេត សាវឿន បានថ្លែងក្នុងកិច្ចប្រជុំនោះថា ក្នុងរយៈពេល ៦ខែ ឆ្នាំ២០២០នេះ ករណីគ្រោះថ្នាក់ចរាចរណ៍បានធ្លាក់ចុះ ២៥ភាគរយ បើធៀបនឹងឆ្នាំ ២០១៩ ហើយចំនួនអ្នកស្លាប់បានថយចុះ ១៧ភាគរយ គឺកាត់បន្ថយជាង ១៧០នាក់ស្លាប់។
លោក នេត សាវឿន ក៏បានបន្ទរបន្ថែមលើការថ្លែងរបស់លោកស្រី មិន ម៉ាណវី អគ្គលេខាធិការជាតិសុវត្ថិភាពចរាចរណ៍ផ្លូវគោក ។ លោកថា មានការញុះញង់មូលបង្កាច់មកលើសមត្ថកិច្ច។ ប៉ុន្តែអាជ្ញាធរបានទប់ស្កាត់ដោយជោគជ័យ។
លោកមានប្រសាសន៍ថា៖ «ឧបាយកលរបស់អមិត្តក្នុងការប្រឆាំងក្នុងការអនុវត្តរឹតបន្តឹងចរាចរណ៍ផ្លូវគោកនេះ មិនមែនជារឿងសាមញ្ញទេ រហូតដល់ប្រើគ្រប់វិធីល្បិចកល ប្រឌិតមូលបង្កាច់ញុះញង់ដើម្បីឲ្យមានការប្រឆាំងតប»។
នៅក្នុងពិធីនោះរដ្ឋមន្រ្តីក្រសួងមហាផ្ទៃលោក ស ខេង មានប្រសាសន៍ថា ការរិះគន់ក្នុងសង្គមប្រជាធិបតេយ្យជារឿងធម្មតា ប៉ុន្តែលោកថា នេះជាមតិក្រុមប្រឆាំងដែលពុំបានគិតពិចារណាត្រឹមត្រូវ ព្រោះរដ្ឋាភិបាលចង់ការពារជីវិតរបស់ប្រជាពលរដ្ឋ។ លោកពន្យល់ថា រដ្ឋាភិបាលមិនមែនរឹតបន្តឹងចរាចរណ៍ដើម្បីបង្កើនប្រាក់ចំណូលរដ្ឋនោះទេ។
លោក អំ សំអាត នាយករងទទួលបន្ទុកឃ្លាំមើលសិទ្ធិមនុស្សនៃអង្គការលីកាដូ ថ្លែងប្រាប់ VOA ថា លោកគាំទ្រសេរីភាពនៃការបញ្ចេញមតិជាការរិះគន់ស្ថាបនា។ លោកបន្តថា លោកក៏មិនគាំទ្រការផ្សព្វផ្សាយព័ត៌មានមិនពិតនោះដែរ។ ប៉ុន្តែ លោកជំរុញឲ្យអាជ្ញាធរបន្តផ្សព្វផ្សាយព័ត៌មានពិតរបស់ខ្លួន ដើម្បីបន្សាបព័ត៌មានក្លែងក្លាយ ហើយត្រូវអត់ធ្មត់ចំពោះការបញ្ចេញមតិរបស់ប្រជាពលរដ្ឋ។
លោកមានប្រសាសន៍ថា៖ «បើសិនជាការបញ្ចេញមតិទៅប្រជាពលរដ្ឋមើលឃើញមានការនាំខ្លួន ឬក៏យកមកអប់រំច្រើន។ អាហ្នឹងបើសិនពួកគេទទួលព័ត៌មានមិនច្បាស់លាស់ទេ គាត់គិតថាគាត់មិនហ៊ានបញ្ចេញមតិ ពីព្រោះខ្លាចមានការប៉ះពាល់ ឬមានការចាប់ខ្លួន»។
លោក គង់ រតនៈ ប្រធានវិទ្យាស្ថានសុវត្ថិភាពចរាចរណ៍ផ្លូវគោក ប្រាប់ VOA ថា ការរឹតបន្តឹងនេះបានផ្តល់នូវផលវិជ្ជមាន ហើយលោកជំរុញឲ្យអាជ្ញាធរបន្តអនុវត្តទៀត។ លោកបន្តថា ការផាកពិន័យច្រើនពិតជាប៉ះពាល់ប្រជាពលរដ្ឋមួយចំនួន នៅក្នុងកាលៈទេសៈនៃវិបត្តិជំងឺកូវីដ១៩នេះ។
ក្រៅពីការរឹតបន្តឹងនេះ លោក គង់ រតនៈ ក៏ជំរុញឲ្យមានការអប់រំបន្ថែមទៀត និងកែលម្អផ្លូវថ្នល់ឲ្យបានល្អផងដែរ។
លោកមានប្រសាសន៍ថា៖ «ខ្ញុំលើកទឹកចិត្ត បើសិនជារដ្ឋាភិបាលគាត់អាចបញ្ចូលកម្មវិធីសុវត្ថិភាពចរាចរណ៍ទៅក្នុងថ្នាក់រៀន ចាប់ពីថ្នាក់ទីពីរ ទីបីអីហ្នឹង គឺជារឿងល្អប្រសើរបំផុតបាទ»៕