បន្ទាប់ពីគ្រាប់បែកមួយគ្រាប់ត្រូវបានផ្ទុះនៅកណ្តាលរាជធានីភ្នំពេញកាលពីយប់ថ្ងៃទី៦ ខែកញ្ញា ដោយមិនទាន់មានការបញ្ជាក់ពីមូលហេតុ ឬតម្រុយនោះ នៅព្រឹកនេះ អ្នកឃ្លាំមើលស្ថានការណ៍សង្គមយល់ឃើញថា រដ្ឋាភិបាលអសមត្ថភាពក្នុងការគ្រប់គ្រងសន្តិសុខ ប៉ុន្តែបែរជាមានកម្លាំងបង្ហាញសាច់ដុំក្នុងការបង្រ្កាបអ្នកប្រឆាំង។
អ្នកឃ្លាំមើលស្ថានការណ៍សង្គមលើកឡើងថា ករណីផ្ទុះគ្រាប់បែកកាលពីយប់ថ្ងៃទី១៦ ខែកញ្ញា បង្ហាញពីកម្សោយរបស់រដ្ឋាភិបាលក្នុងការការពារសន្តិសុខ តែថា រដ្ឋាភិបាលនេះ មានកម្លាំងក្នុងការបង្ក្រាបគណបក្សប្រឆាំង។
កាលពីយប់ថ្ងៃទី៦ ខែកញ្ញាមានហេតុការណ៍ផ្ទុះគ្រាប់បែកមួយគ្រាប់នៅតាមបណ្ដោយផ្លូវលេខ១៦៣ សង្កាត់បឹងកេងកង៣ ខណ្ឌចំការមន នាម៉ោងប្រមាណ៧និង៤០នាទីយប់ បណ្តាលឲ្យមនុស្សចំនួន៤នាក់រងរបួស និងខូចខាតរថយន្តចំនួន៤គ្រឿង រួមនឹងសម្ភារៈមួយចំនួន។
លោកជួន សុវណ្ណ ស្នងការប៉ូលិសរាជធានីភ្នំពេញ និងមន្រ្តីជំនាញបានចុះទៅដល់ទីកន្លែងកើតហេតុភ្លាមៗ ប៉ុន្តែមិនមានការឲ្យដឹងពីមូលហេតុ ឬព័ត៌មាននៃការផ្ទុះនោះឡើយ។
ក្រោយការផ្ទុះតែប៉ុន្មានម៉ោង គេឃើញវីដេអូឃ្លីបមួយមានរយៈពេលជាង៣០វិនាទីត្រូវបានបង្ហោះលើបណ្តាញសង្គម Facebook (ហ្វេសប៊ុក) ដោយបង្ហាញជនមិនស្គាល់អត្តសញ្ញាណពីរនាក់ ជិះម៉ូតូមួយគ្រឿង បានទម្លាក់គ្រាប់បែកមួយគ្រាប់លើផ្លូវ ស្របពេលដែលប្រជាពលរដ្ឋកំពុងធ្វើដំណើរ។ ក្រោយទម្លាក់គ្រាប់បែករួច ជនមិនស្គាល់អត្តសញ្ញាណទាំងពីរនាក់នោះបានជិះម៉ូតូគេចខ្លួនបាត់។
លោកអំ សំអាត អ្នកគ្រប់គ្រងបច្ចេកទេសឃ្លាំមើលការរំលោភសិទ្ធិមនុស្សនៃអង្គការលីកាដូ យល់ថា សមត្ថកិច្ចមានភាពទន់ខ្សោយក្នុងការគ្រប់គ្រង និងការពារសន្តិសុខក្នុងសង្គម។ លោកថ្លែងថា ការផ្ទុះគ្រាប់បែកនេះនឹងធ្វើឲ្យស្ថានភាពនយោបាយកាន់តែមានភាពតានតឹង និងធ្វើឲ្យប្រជាពលរដ្ឋកាន់តែមានការព្រួយបារម្ភអំពីសុវត្ថិភាពរបស់ពួកគេ បន្ទាប់ពីមានឧទ្ធម្ភាគចក្រ អូប័រយោធា និងកម្លាំងសមត្ថកិច្ចនៅក្បែរស្នាក់ការកណ្តាលគណបក្សសង្គ្រោះជាតិកាលពីប៉ុន្មានថ្ងៃកន្លងមក ដែលរដ្ឋាភិបាលអះអាងថា ជាការហ្វឹកហាត់របស់កងទ័ព។
លោកបញ្ជាក់ថា៖
«ប្រជាពលរដ្ឋគេនឹងរិះគន់ទាក់ទងនឹងកង្វះសមត្ថភាព និងកិច្ចការការពារសន្តិសុខ និងសុវត្ថិភាពជូនប្រជាពលរដ្ឋ តែផ្ទុយទៅវិញ យើងឃើញថា កម្លាំងដ៏ច្រើនបានបង្ហាញសាច់ដុំ ដែលទំនងថា អាចនឹងការពារប្រជាពលរដ្ឋយើងបានគ្រប់ពេលវេលា តែផ្ទុយទៅវិញគឺមានការផ្ទុះគ្រាប់បែកផ្ទុះអី ធ្វើឲ្យប្រជាពលរដ្ឋមានការភិតភ័យទៅវិញ»។
លោកបន្ថែមថា ប្រសិនជាបញ្ហាអសន្តិសុខនៅតែបន្តកើតមាននោះ វានឹងធ្វើឲ្យប៉ះពាល់ដល់ដំណើរការនៃការចុះឈ្មោះបោះឆ្នោត និងការបោះឆ្នោតក្នុងពេលខាងមុខ។
អ្នកវិភាគពីការអភិវឌ្ឍសង្គមគឺលោកមាស នីលើកឡើងថា រដ្ឋាភិបាលតែងបង្ហាញកងកម្លាំងសម្រាប់ការពារសន្តិសុខ ប៉ុន្តែការប្រើប្រាស់អាវុធជាតិផ្ទុះ និងអសន្តិសុខក្នុងសង្គមនៅតែកើតមាន។
លោកមានប្រសាសន៍ថា៖
«នៅពេលដែលយើងចាប់ផ្ដើមបញ្ចេញកងកម្លាំងប្រដាប់អាវុធសម្រាប់ចាត់វិធានការផ្សេងៗ ឬសម្រាប់សណ្តាប់ធ្នាប់ វាគួរណាតែបញ្ហាទាំងអស់ហ្នឹងថយចុះ។ តែមិនថយចុះ វាបែរជាកើនឡើង។ ហើយរឿងផ្ទុះគ្រាប់បែកនេះក៏ជារឿងមួយដែលគួរឲ្យព្រួយបារម្ភដែរ។ វាអាចនឹងមានរឿងអីក្រៅពីគំនុំផ្ទាល់ខ្លួន ឬក៏យ៉ាងម៉េច ដែលរដ្ឋាភិបាលបានប្ដេជ្ញាថា នឹងរក តែយើងពិបាកជឿត្រង់ថា បើសិនជារដ្ឋាភិបាលនៅតែអនុវត្តស្តង់ដារពីរ។ បើរឿងនេះជារឿងនយោបាយប្រហែលជានៅតែរកអត់ឃើញទៀត ដូចករណីលោកកែម ឡី»។
លោកបន្ថែមថា ការផ្ទុះអាវុធ និងអសន្តិសុខផ្សេងៗដែលកើតឡើងគឺបណ្តាលមកពីភាពទន់ខ្សោយក្នុងការគ្រប់គ្រងរបស់រដ្ឋាភិបាល។ លោកពន្យល់ថា ប្រសិនបើអសន្តិសុខនេះនៅតែបន្តនោះ វានឹងធ្វើឲ្យប្រជាពលរដ្ឋមានការភ័យខ្លាច ហើយនឹងធ្វើឲ្យប៉ះពាល់ដល់សេដ្ឋកិច្ច និងសង្គមកាន់តែធ្ងន់ធ្ងរ។
VOA បានព្យាយាមទាក់ទងសុំការអធិប្បាយពីលោកខៀវ សុភ័គ អ្នកនាំពាក្យក្រសួងមហាផ្ទៃ លោកជួន សុវណ្ណ ស្នងការប៉ូលិសក្រុង និងលោកគៀត ច័ន្ទថារិទ្ធ អ្នកនាំពាក្យអគ្គស្នងការដ្ឋាននគរបាលជាតិ ប៉ុន្តែមិនអាចបានទេ។
ក្រសួងមហាផ្ទៃ នៅព្រឹកថ្ងៃពុធនេះ បានចេញសេចក្តីថ្លែងការណ៍ថ្កោលទោសការផ្ទុះគ្រាប់បែកនេះ ហើយថា វាជាចេតនាធ្វើឲ្យសាធារណជនយល់ច្រឡំចំពោះស្ថានការណ៍សន្តិសុខរបស់កម្ពុជា។ សេចក្តីថ្លែងការណ៍នេះបន្តថា កម្លាំងសមត្ថកិច្ចបាននិងកំពុងបន្តចាត់វិធានការស្រាវជ្រាវ ស៊ើបអង្កេត និងអំពាវនាវឲ្យសាធារណជនសហការជាមួយកម្លំាងសមត្ថកិច្ចដើម្បីចាប់ជនល្មើសមកផ្តន្ទាទោសតាមច្បាប់។
ការផ្ទុះគ្រាប់បែកនេះបានកើតឡើង៣ថ្ងៃមុនការរៀបចំពិធីជួបសំណេះសំណាលរវាងថ្នាក់ដឹកនាំគណបក្សសង្គ្រោះជាតិ និងមហាជន និងចំពេលដែលតុលាការបើកសវនាការលោកកឹម សុខា ប្រធានស្តីទីគណបក្សសង្គ្រោះជាតិ និងមួយថ្ងៃក្រោយពីអាជ្ញាធររាជធានីភ្នំពេញបានដាក់កម្លាំងរាប់រយនាក់រារាំងការដង្ហែញត្តិរបស់គណបក្សសង្គ្រោះជាតិទៅដាក់តាមស្ថានទូតនានា ដើម្បីស្នើឲ្យជួយការពារសិទ្ធិមនុស្ស និងលទ្ធិប្រជាធិបតេយ្យនៅកម្ពុជា៕
