ភ្ជាប់​ទៅ​គេហទំព័រ​ទាក់ទង

អ្នក​ធាត់​ដុះ​ពោះ​មិនមែន​ជា​អ្នក​គ្មាន​សុខភាព​ល្អ​ទាំង​អស់​នោះ​ទេ


អង្គការសុខភាពពិភពលោក​និយាយថា​​ដល់ឆ្នាំ២០១៥​មនុស្ស​ជាង​ពីរពាន់លាន​នាក់នឹងធាត់លើស​ទម្ងន់​ ហើយ៧០០​លាន​នាក់​នឹង​ធាត់ដុះពោះ។

ច្រើន​ឆ្នាំ​មក​ហើយ​ យើង​បាន​ឮ​អំពី​គ្រោះថ្នាក់​នៃ​ការ​ធាត់​ដុះ​ពោះ។​ ក្រុម​អ្នក​ជំនាញ​និយាយ​ថា​ មនុស្ស​ធាត់​ដុះ​ពោះ​ទំនង​មាន​គ្រោះ​ថ្នាក់​ច្រើន​នឹង​ជំងឺ​គាំង​បេះដូង​ ជំងឺ​ដាច់​សរសៃ​ឈាម​ក្នុង​ខួរ​ក្បាល​ និង​ជំងឺ​ទឹក​នោម​ផ្អែម​ ហើយ​អ្នក​ទាំងនោះ​គួរ​ព្យាយាម​សម្រក​ទម្ងន់។​ ប៉ុន្តែ​ឥឡូវនេះ​ ការ​សិក្សា​ថ្មី​មួយ​រកឃើញ​ថា​ មនុស្ស​ធាត់​ដុះ​ពោះ​ក៏​អាច​មាន​សុខភាព​ល្អ​បាន​ដែរ។

ក្រុម​វេជ្ជបណ្ឌិត​ប្រើ​វិធី​មួយ​មាន​ឈ្មោះ​ថា​ BMI​ អក្សរ​កាត់​នៃ​ពាក្យ​ body​ mass​ index​ គឺ​តារាង​ថ្លឹង​ទម្ងន់​ខ្លួន​ និង​វាស់​កំពស់​មនុស្ស​ ដើម្បី​វាស់​កម្រិត​នៃ​ការ​ធាត់​ដុះ​ពោះ។​ ជា​ការ​គិត​លេខ​ងាយ​ស្រួល​មួយ​យោង​តាម​កំពស់​និង​ទម្ងន់​ ហើយ​ប្រសិន​បើ​តារាង​ BMI​ របស់​លោក​អ្នក​លើស​ពី​លេខ​៣០​ នោះ​លោក​អ្នក​ចាត់​ទុក​ថា​ជា​អ្នក​ធាត់​ដុះ​ពោះ​ហើយ។

កាល​ពី​ពីរ​ឬ​បី​ឆ្នាំ​មុន​ ក្រុម​អ្នក​ស្រាវជ្រាវ​ជាតិ​កាណាដា​បាន​រកឃើញ​វិធី​វាស់​ដ៏​ជឿនលឿន​ជាង​នេះ​មួយ​ មាន​ឈ្មោះ​ថា​ Edmonton​ Obesity​ Staging​ System​ ហៅ​កាត់​ថា​ EOSS។​ គឺ​ជា​ប្រព័ន្ធ​មួយ​ដែល​ចាត់​ក្រុម​មនុស្ស​ធាត់​ជា​៥​ជំពូក​ ឬ​៥​ដំណាក់​យោង​តាម​កត្តា​គ្រោះថ្នាក់​ទាំងឡាយ​ដូច​ជា​ក្រុម​អ្នក​មាន​សម្ពាធ​ឈាម​ ក្រុម​អ្នក​ឈឺ​ទ្រូង​និង​ក្រុម​អ្នក​ហត់​អស់​កម្លាំង។

ដើម្បី​ស្ទង់​តាម​ប្រព័ន្ធ​ EOSS​ លោកស្រី​Jennifer​ Kuk​ នៃ​សាកល​វិទ្យាល័យ​ York​ University​ នៅ​ទីក្រុង​Toronto​ ព្រម​ទាំង​សហសេវិក​បាន​ពិនិត្យ​ប្រវត្តិ​អ្នក​ជំងឺ​ច្រើន​ពាន់​នាក់​នៅ​មន្ទីរ​ព្យាបាលរោគ​មួយ​នៅ​ក្នុង​រដ្ឋ​តិចសាស់។​ អ្នក​ជំងឺ​ម្នាក់ៗ​បាន​ចាត់​ចូល​ក្នុង​ក្រុម​អ្នក​មាន​គ្រោះថ្នាក់​នៅ​ក្នុង​ប្រព័ន្ធ​ Edmonton​ យោង​តាម​ប្រវត្តិ​ជំងឺ​ជា​មធ្យម​១៦​ឆ្នាំ។

«នៅ​ពេល​យើង​ធ្វើ​យ៉ាង​ដូច្នោះ​ យើង​បាន​ឃើញ​ថា​ក្រុម​អ្នក​ធាត់​ដុះពោះ​ដែល​បាន​បញ្ចូល​នៅក្នុង​ក្រុម​គ្រោះថ្នាក់​ទាប​នៃ​ប្រព័ន្ធ​ Edmonton​ Staging​ System​ នោះ​ ពួក​គេ​មាន​គ្រោះថ្នាក់​ស្លាប់​ដូច​គ្នា​ បើ​ប្រៀបធៀប​ទៅ​មនុស្ស​ដែល​មាន​ទម្ងន់​ធម្មតា​នៅ​ក្នុង​ការ​សាកល្បង​នោះ។​ ហើយ​តាម​ការ​ពិត​ ពួកគេ​មាន​គ្រោះថ្នាក់​ទាប​ជាង​នេះ​ទៀត​ ពី​ការ​ស្លាប់​ដោយ​ជំងឺ​សរសៃ​ឈាម​បេះដូង»។

អ្នក​ធាត់​ដុះ​ពោះ​ប៉ុន្តែ​មាន​សុខភាព​ល្អ​ទាំងនេះ​ជា​ច្រើន​នាក់​បាន​ព្យាយាម​តស៊ូ​ធ្វើ​ឲ្យ​ទម្ងន់​ចុះ​ទាប​ ប៉ុន្តែ​លោកស្រី​ Kuk​ និយាយ​ថា​រឿង​នោះ​ប្រហែល​មិនមែន​ជា​មធ្យោបាយ​ប្រសើរ​បំផុត​ទេ​ចំពោះ​អ្នក​ណា​ម្នាក់​ដែល​ទទួលទាន​អាហារ​ច្រើន​និង​ជា​អ្នក​មាន​សកម្មភាព​រហ័ស​រហួន​នោះ​ ទោះបី​ជា​ពួក​គេ​មាន​ទម្ងន់​លើស​បន្តិច​បន្តួច​ក៏​ដោយ។

«មាន​មនុស្ស​ធាត់​ដុះ​ពោះ​និង​មាន​សុខភាព​ល្អ​ ហើយ​មនុស្ស​ធាត់​ដុះ​ពោះ​ដែល​មាន​សុខភាព​ល្អ​ទាំងនេះ​អាច​មិន​ប្រាកដ​ជា​បាន​ទទួល​ផល​ប្រយោជន៍​ពី​ការ​សម្រក​ទម្ងន់​ទេ។​ ជា​ជំនួស​យើង​គួរ​ផ្តោត​ការ​យក​ចិត្ត​ទុក​ដាក់​ទៅ​លើ​ការ​រស់នៅ​មាន​សុខភាព​ល្អ​វិញ​ ដែល​រួម​មាន​ការ​ហាត់ប្រាណ​និង​ការ​ទទួលទាន​អាហារ​មាន​សុខភាព​ល្អ​ ហើយ​ថា​មនុស្ស​មាន​សុខភាព​ល្អ​ទាំងនេះ​គួរតែ​ឈប់​យក​ចិត្ត​ទុក​ដាក់​ខ្លាំង​ពេក​តែ​ទៅ​លើ​ការ​សម្រក​ទម្ងន់​ គ្រាន់​តែ​យក​ចិត្ត​ទុក​ដាក់​កុំ​ឲ្យ​ទម្ងន់​នោះ​វា​ឡើង​ថែម​ទៀត​ទៅ​បាន​ហើយ»។

ប្រព័ន្ធ​ Edmonton​ System​ បាន​បង្កើត​ឡើង​ដោយ​ក្រុម​អ្នក​ស្រាវជ្រាវ​នៅ​សាកលវិទ្យាល័យ​ក្រុង​អាល់ប៊ែកតា​ (University​ of​ Alberta)​ ហើយ​ប្រព័ន្ធ​នេះ​នឹង​ត្រូវ​ប្រើ​អែប​ជាមួយ​វិធី​វាស់​កម្រិត​ធាត់​ BMI។​ ប៉ុន្តែ​ប្រហែល​ដោយសារ​ប្រព័ន្ធ​នេះ​មាន​ភាព​ស្មុគស្មាញ​ជាង​ការ​ប្រើ​វិធី​ BMI​ ដូច្នេះ​បាន​ជា​ប្រព័ន្ធ​ EOSS​ មាន​ដំណើរ​យឺត​ដើម្បី​ឲ្យ​បាន​ទទួល​ការ​ចាប់អារម្មណ៍។

ការ​សិក្សារ​របស់​លោក​ស្រី​ Jennifer​ Kuk​ មាន​បោះពុម្ភ​ផ្សាយ​នៅ​ក្នុង​ទស្សនាវដ្តី​ឈ្មោះ​ “Applied​ Physiology,​ Nutrition,​ and​ Metabolism”។

ប្រែ​សម្រួល​ដោយ​ នុច សារីតា

XS
SM
MD
LG