ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

លោក​អូបាម៉ា​ទទួល​​បាន​ការ​គាំទ្រ​ពី​អារ៉ាប៊ី សាអូឌីត​លើ​កិច្ចព្រមព្រៀង​នុយក្លេអ៊ែរ​អ៊ីរ៉ង់​


ប្រធានាធិបតី​អាមេរិក​លោក បារ៉ាក់ អូបាម៉ា ជួប​ពិភាក្សា​ជាមួយ​នឹង​សេ្តច​ Salman នៃ​ប្រទេស​អារ៉ាប៊ី សាអូឌីត​នៅ​សេតវិមាន​នៅ​ថ្ងៃ​ទី០៤ ខែ​កញ្ញា ឆ្នាំ​២០១៥។
ប្រធានាធិបតី​អាមេរិក​លោក បារ៉ាក់ អូបាម៉ា ជួប​ពិភាក្សា​ជាមួយ​នឹង​សេ្តច​ Salman នៃ​ប្រទេស​អារ៉ាប៊ី សាអូឌីត​នៅ​សេតវិមាន​នៅ​ថ្ងៃ​ទី០៤ ខែ​កញ្ញា ឆ្នាំ​២០១៥។

ក្រុម​មេដឹកនាំ​ប្រទេស​អារ៉ាប៊ី ​សាអូឌីត​បាន​គាំទ្រ​កិច្ច​ព្រម​ព្រៀង​នុយក្លេអ៊ែរ​ជាមួយ​អ៊ីរ៉ង់​ដែល​ត្រូវ​បាន​ចរចា​ដោយ​ស.រ.អា និង​មហាអំណាច​សំខាន់ៗ​ផ្សេង​ទៀត​បាន​និយាយ​ថា ​ពួក​លោក​ជឿ​ជាក់​ថា ​កិច្ច​ព្រម​ព្រៀង​នោះ​នឹង​រួម​វិភាគ​ទាន​ដល់​សន្តិសុខ​ និង​ស្ថេរភាព​នៅ​ក្នុង​តំបន់​មជ្ឈិម​បូព៌ា។

ក្រុម​មន្រ្តី​សេតវិមាន​បាន​ប្រកាសជំហរ​ប្រទេស​អារ៉ាប៊ី ​សាអូឌីត ​បន្ទាប់​ពី​ការ​ចរចា​កាល​ពី​រសៀល​ថ្ងៃ​ត្រង់​នៅ​ឯ​វិមាន​ប្រតិបត្តិ​រវាង​លោក​ប្រធានា​ធិបតី​បារ៉ាក់ ​អូបាម៉ា​និង​ព្រះ​មហាក្សត្រ Salman។ លោក Adel al-Jubier រដ្ឋមន្រ្តី​ការ​បរទេស​នៃ​ប្រទេស​អារ៉ាប៊ី ​សាអូឌីត​បាន​ប្រើ​ប្រាស់​ភាសា​ប្រហាក់​ប្រហែល​គ្នា​នៅ​ក្នុង​ការ​គាំទ្រ​កិច្ច​ព្រមព្រៀង​ក្នុង​អំឡុងពេល​ប្រារព្ធ​ពិធី​មួយ​នៅ​ឯ​ស្ថានទូត​អារ៉ាប់ប៊ី​សាអូឌីត​ក្នុង​រដ្ឋ​ធានី​វ៉ាស៊ីនតោន។

អារ៉ាប៊ី​ សា​អូឌីត​មាន​ការព្រួយ​កង្វល់​យ៉ាង​ខ្លាំង​អំពី​កិច្ច​ព្រម​ព្រៀង​នេះ ​ដែល​នឹង​លុប​ចោល​ការ​ដាក់​ទណ្ឌកម្ម​សេដ្ឋ​កិច្ចលើ​ប្រទេស​អ៊ីរ៉ង់​ដែល​ជាគូ​ប្រកួត​ប្រ​ជែង​ក្នុង​តំបន់​នៅ​ក្នុង​ការ​ដោះ​ដូរ​ការ​កម្រិត​សមត្ថភាព​របស់​អ៊ី​រ៉ង់​ដើម្បី​អភិវឌ្ឍ​អាវុធ​នុយក្លេអ៊ែរ។​ ក៏​ប៉ុន្តែ ​សេចក្តី​ថ្លែងការណ៍​របស់​សេតវិមាន​បាន​ប្រាប់​ឲ្យ​ដឹង​ថា ​ក្រុម​មេដឹកនាំ​បាន​ព្រមព្រៀង​គ្នា​ថា ​កិច្ច​ព្រម​ព្រៀង​នោះ​នឹង​រារាំង​ប្រទេស​អ៊ីរ៉ង់​មិន​ឲ្យ​ទទួល​បាន​អាវុធ​នុយក្លេអ៊ែរ ដោយ​ធ្វើ​ឲ្យ​ប្រសើរ​ឡើង​នូវ​សន្តិសុខ។

នេះ​ជា​ដំណើរ​យាង​ទស្សនកិច្ច​លើកទី​មួយ​របស់​មេដឹកនាំ​អារ៉ាប់​ទៅ​កាន់​ស.រ.អា ​បន្ទាប់​ពី​ឡើង​សោយ​រាជ្យ​នៅ​ខែ​មករា ​ក្រោយ​ពី​ការ​ចូល​ទី​វង្គត​ព្រះ​មហាក្សត្រ Abdullah។ ថ្វី​បើ​មានការ​តាន​តឹង​នៅ​ក្នុង​ទំនាក់​ទំនង​នេះ​ក៏​ដោយ សេចក្តី​ថ្លែងការណ៍​របស់​សេតវិមាន​បាន​ពណ៌នា​ការចរចា​ថា ប្រកប​ដោយ​ផ្លែ​ផ្កា ​និង​វិជ្ជមាន ហើយ​បាន​សង្កត់​ធ្ងន់​ពី​សារៈ​សំខាន់​នៃ​ការ​ធ្វើ​ឲ្យ​ទំនាក់​ទំនង​យុទ្ធសាស្រ្ត​របស់​ប្រទេស​ទាំង​ពីរ​កាន់​តែ​ប្រសើរ​ឡើង៕

XS
SM
MD
LG