នៅក្នុងសុន្ទរកថាស្តីពីស្ថានភាពសហព័ន្ធចុងក្រោយបង្អស់របស់លោកប្រធានាធិបតីស.រ.អា. បារ៉ាក់ អូបាម៉ា មានប្រសាសន៍ថាលោកចង់បង្ហាញទស្សនវិស័យសុទិដ្ឋិនិយមរបស់លោកសម្រាប់ស.រ.អា. មិនមែនសម្រាប់តែរយៈពេលពេលប៉ុន្មានខែទៀតដែលលោកស្ថិតនៅក្នុងតំណែងប៉ុណ្ណោះទេ ក៏ប៉ុន្តែសម្រាប់រយៈពេលច្រើនឆ្នាំតទៅទៀត។
លោក Aru Pande អ្នកឆ្លើយឆ្លងព័ត៌មានរបស់ VOA ប្រចាំសេតវិមានមានសេចក្តីល្អិតល្អន់បន្ថែមអំពីអ្វីដែលសាធារណជនអាមេរិកាំងអាចរំពឹងពីសុន្ទរកថានៅថ្ងៃអង្គាររបស់អគ្គមេបញ្ជាការកំពូលរបស់ពួកគេ។
លោកប្រធានាធិបតីមានប្រសាសន៍ថា «ចាប់តាំងពីពេលដែលខ្ញុំបានចូលកាន់តំណែងកាលពី៧ឆ្នាំមុននេះនៅពេលប្រទេសអាមេរិកមានវិបត្តិ ខ្ញុំមិនបានគិតថាខ្ញុំមានសុទិដ្ឋិនិយមជាងមុនអំពីពេលមួយឆ្នាំទៅមុខទៀតជាងនៅពេលនេះទេ។»
នេះជាសុទិដ្ឋិនិយមមិនមែនសម្រាប់តែឆ្នាំ២០១៦ទេ ក៏ប៉ុន្តែសម្រាប់ពេលច្រើនឆ្នាំតទៅមុខទៀតដែលក្រុមមន្ត្រីសេតវិមាននិយាយថានឹងត្រូវបង្ហាញនៅពេលលោកប្រធានាធិបតីអូបាម៉ាថ្លែងសុន្ទរកថាទៅកាន់ប្រទេសជាតិនៅក្នុងសារចុងក្រោយបង្អស់របស់លោកអំពីស្ថានភាពសហព័ន្ធនៅថ្ងៃអង្គារ។
មិនដូចកាលពីឆ្នាំទៅមិញទេ នៅពេលដែលលោកអូបាម៉ាបានដាក់សំណើជាក់លាក់ រួមបញ្ចូលការផ្តល់ការសិក្សាដោយសេរីនៅក្នុងមហាវិទ្យាល័យសហគមន៍ និងបង្កើនកិច្ចការពារនៃបណ្តាញអ៊ីនធឺណិត។
លោក Josh Earnest អ្នកនាំពាក្យសេតវិមាននិយាយថា នៅឆ្នាំនេះលោកប្រធានាធិបតីនឹងផ្តោតការយកចិត្តទុកដាក់លើទស្សនវិស័យក្នុងរយៈពេលយូររបស់លោកសម្រាប់ប្រទេសជាតិ ហើយក៏ប្រឆាំងនឹងទុទិដ្ឋនិយមដែលគេបានឮនៅពេលឃោសនាបោះឆ្នោតប្រធានាធិបតីនិងដែលត្រូវបានឆ្លុះបញ្ចាំងនៅក្នុងការស្ទង់មតិសាធារណជន។
លោក Earnest និយាយថា «មានវោហាសាស្ត្រច្រើនដែលយើងបានឮពីភាគីម្ខាងទៀតដែលផ្តោតការយកចិត្តទុកដាក់លើការភ័យខ្លាចអំពីអនាគតនិងមានការព្រួយបារម្ភនិងការមានអសន្តិសុខអំពីពិភពលោកដែលមានការផ្លាស់ប្តូរ។ការពិតជាក់ស្តែងគឺថាស.រ.អា.មានគោលជំហរល្អប្រសើរជាងប្រទេសជាតិឯទៀតៗនៅក្នុងពិភពលោកក្នុងការទាញយកអត្ថប្រយោជន៍ច្រើនបំផុតពីឱកាសដែលមាននៅពីមុខយើង។»
ការណ៍នេះមិនមែនមានន័យថាលោកប្រធានាធិបតីមិនចង្អុលបង្ហាញក្នុងសុន្ទរកថារបស់លោកអំពីអ្វីដែលលោកបានធ្វើឱ្យសម្រេចចាប់តាំងពីពេលដែលលោកចូលកាន់តំណែងក្នុងឆ្នាំ២០០៩នោះទេ ដូចដែលលោកបានលាតត្រដាងនៅក្នុងសុន្ទរកថាប្រចាំសប្តាហ៍របស់លោកកាលពីពេលថ្មីៗបំផុតនេះ។
ស្តីពីស្ថានភាពក្នុងសាកលលោក លោកអូបាម៉ាទំនងជានឹងមានប្រសាសន៍អំពីជោគជ័យខាងការទូតកាលពីពេលថ្មីៗនេះរបស់លោកនៅក្នុងការធ្វើឱ្យមានចំណងទាក់ទងគ្នាជាធម្មតាប្រក្រតីវិញជាមួយប្រទេសគុយបា (Cuba) ការសម្រេចកិច្ចព្រមព្រៀងបរមាណូមួយជាមួយប្រទេសអ៊ីរ៉ង់ និងការធ្វើឱ្យមានក៏ប៉ុន្តែលោកសាស្ត្រាចារ្យ Matthew Dallek នៃសាកលវិទ្យាល័យ George Washington និយាយថាលោកអូបាម៉ាក៏ទំនងជានឹងមានប្រសាសន៍ដែរអំពីបញ្ហាប្រឈមនឹងភេរវកម្មដែលកំពុងតែមាននិងការប្រយុទ្ធប្រឆាំងនឹងក្រុមជនសកម្មប្រយុទ្ធរដ្ឋឥស្លាម។
ទោះណាជាមានកង្វល់របស់សាធារណជនអំពីសន្តិសុខជាតិក៏ដោយ ក៏ពួកមន្ត្រីសេតវិមាននិយាយថាលោកប្រធានាធិបតីមិនដែលមានការទុកចិត្តច្រើនដល់សមត្ថភាពរបស់ប្រទេសក្នុងការទប់ទល់នឹងឧបសគ្គនានាដូចក្នុងពេលនេះទេ ដែលជាសារមួយលោកអូបាម៉ានឹងមានប្រសាសន៍ទៅកាន់ប្រជារាស្ត្រអាមេរិកាំងនៅថ្ងៃអង្គារ៕
