ចាប់តាំងពីដើមឆ្នាំមក មនុស្សជាង ៣០០ នាក់បានកើតជំងឺកញ្ជ្រិលនៅក្នុងរដ្ឋចំនួន ១៥ នៅសហរដ្ឋអាមេរិក។ អ្នកកើតជំងឺកញ្ជ្រិលជិតពាក់កណ្តាល គឺជាអ្នករស់នៅក្នុងស្រុក Rockland នៃរដ្ឋញូវយ៉ក។ ឥឡូវនេះមន្ត្រីស្រុកកំពុងដាក់បម្រាមមិនឲ្យអ្នកដែលមិនបានចាក់ថ្នាំបង្ការចេញទៅក្រៅតាមទីសាធារណៈ។
ការផ្ទុះឆ្លងរាលដាលជំងឺកញ្ជ្រិលរយៈពេលជិតមួយខែចុងក្រោយនេះ បានធ្វើឲ្យស្រុក Rockland នៃរដ្ឋញូវយ៉កប្រកាសដាក់រដ្ឋក្នុងស្ថានភាពអាសន្ន។
លោក Ed Day គឺជាថ្នាក់ដឹកនាំស្រុកបាននិយាយថា៖
«អ្នកដែលមានអាយុក្រោម ១៨ឆ្នាំ និងមិនទាន់បានចាក់ថ្នាំបង្ការជំងឺកញ្ជ្រិលនឹងត្រូវហាមឃាត់មិនឲ្យចេញតាមទីសាធារណៈ រហូតទាល់តែការប្រកាសអាសន្ននេះផុតកំណត់រយៈពេល ៣០ ថ្ងៃ ឬរហូតដល់ពេលដែលពួកគេបានចាក់ថ្នាំវ៉ាក់ស៊ាំង MMR ការពារជំងឺកញ្ជ្រិលរួចហើយ»។
កន្លែងសាធារណៈទាំងនោះរួមមានផ្សារទំនើប ភោជនីយដ្ឋាន តាមរថយន្តក្រុងនិងរថភ្លើងជាដើម។ ប៉ូលិសនឹងមិនសួររកឯកសារចាក់ថ្នាំបង្ការទេ ប៉ុន្តែឳពុកម្តាយអាចប្រឈមនឹងការផាកពិន័យ ៥០០ដុល្លារ និងត្រូវជាប់ពន្ធនាគាររហូតដល់ ៦ខែប្រសិនបើពួកគេមិនព្រមយកកូនទៅចាក់ថ្នាំបង្ការ។
ការផ្ទុះរាលដាលនេះបានកើតឡើងធ្ងន់ធ្ងរនៅក្នុងសហគមន៍ជនជាតិជ្វីហ្វកាន់សាសនាគ្រិស្តអូស្សូដក់។
លោក Ed Day ដែលជាថ្នាក់ដឹកនាំស្រុកបាននិយាយថា បញ្ហាសំខាន់គឺត្រូវធ្វើឲ្យឳពុកម្តាយដឹងពីគ្រោះថ្នាក់នៃជំងឺកញ្ជ្រិល។
លោក Ed Day បានថ្លែងថា៖ «ករណីឆ្លងនីមួយៗសុទ្ធតែបង្កផលប៉ះពាល់។ វាអាចបណ្តាលឲ្យរលាកសួត រលាកខួរក្បាល និងធ្វើឲ្យហើមខួរក្បាល ឬបណ្តាលឲ្យសម្រាលកូនមុនពេលកំណត់ ដែលអាចបង្កឲ្យមានភាពស្មុគស្មាញ និងអាចស្លាប់បាត់បង់ជីវិត»។
សូមមើលវីដេអូ៖ រដ្ឋញូវយ៉កប្រកាសស្ថានភាពអាសន្ននៃការរីករាលដាលនៃជំងឺកញ្ជ្រិល
លោក Ed Day បាននិយាយបន្តទៀតថា ការណ៍សំខាន់គឺត្រូវរក្សាសុវត្ថិភាពសម្រាប់អ្នកដែលមិនបានចាក់ថ្នាំបង្ការ។ លោក Ed Day ថ្លែងបន្ថែមថា៖ «ចុះចំណែកទារកតូចៗ ដែលចេញក្រៅជាមួយឳពុកម្តាយពួកគេវិញ? ចៅប្រុសរបស់ខ្ញុំទើបនឹងកើត។ ចុះចំណែកស្ត្រីមានផ្ទៃពោះ និងអ្នកដែលមានប្រព័ន្ធការពាររាងកាយខ្សោយដូចអ្នកកើតជំងឺមហារីក និងអ្នកដែលទើបជាសះស្បើយពីជំងឺវិញ? ពួកគេទាំងនេះ គឺជាមនុស្សដែលយើងទាំងអស់គ្នាត្រូវជួយការពារ»។
អត្រាអ្នកចាក់ថ្នាំបង្ការនៅសហរដ្ឋអាមេរិកនៅតែមានកម្រិតខ្ពស់។ ការសិក្សាស្រាវជ្រាវរបស់មជ្ឈមណ្ឌលគ្រប់គ្រង និងទប់ស្កាត់ជំងឺឆ្លងហៅកាត់ថា CDC បានរកឃើញថា កុមារ ៩៤ភាគរយ នៅសហរដ្ឋអាមេរិកបានចាក់ថ្នាំបង្ការលើកទីមួយសម្រាប់ការពារជំងឺកញ្ជ្រិល ជំងឺស្រឡទែន ស្អូច និងថ្នាំវ៉ាក់ស៊ាំងបង្ការជំងឺឆ្លងផ្សេងៗទៀត។ ប៉ុន្តែថ្នាំវ៉ាក់ស៊ាំងដែលតម្រូវឲ្យចាក់រំឭកឡើងវិញ រួមទាំងថ្នាំវ៉ាក់ស៊ាំងការពារជំងឺកញ្ជ្រិលមានអត្រាទាប។
រដ្ឋមួយចំនួនអនុញ្ញាតឲ្យឳពុកម្តាយ ដែលប្រឆាំងនឹងការចាក់ថ្នាំបង្ការឲ្យកូនៗរបស់ពួកគេ ដោយសារបញ្ហាសាសនា ឬដោយទស្សនៈផ្សេងៗទៀតនោះ មានសិទ្ធិមិនយកកូនទៅចាក់ថ្នាំបង្ការបាន។ ចំនួនអ្នកចាក់ថ្នាំបង្ការនៅតាមរដ្ឋទាំងនេះបានធ្លាក់ចុះយ៉ាងគំហុក។ ហើយដោយសារការធ្លាក់ចុះនេះហើយ បានធ្វើឲ្យករណីឆ្លងជំងឺកញ្ជ្រិលបានកើនឡើង។ ឳពុកម្តាយមួយចំនួនបានជឿទាំងខុសថា ថ្នាំវ៉ាក់ស៊ាំងអាចបង្កឲ្យកុមារកើតជំងឺខ្សោយបញ្ញា ឬ Autism។
ការសិក្សាស្រាវជ្រាវផ្ទួនគ្នាៗបានបង្ហាញថា នេះមិនមែនជាការពិតទេ។ លោក Frank Esper គ្រូពេទ្យកុមារនៅមន្ទីរព្យាបាល Cleveland បាននិយាយការពារកុមារដែលបានចាក់ថ្នាំវ៉ាក់ស៊ាំង។
លោក Frank Esper បានថ្លែងថា៖ «ថ្នាំវ៉ាក់ស៊ាំងទាំងនេះត្រូវបានបង្ហាញថាមានសុវត្ថិភាព។ យើងបានធ្វើតេស្តថ្នាំទាំងនោះ។ យើងបានតាមដានកុមារដែលបានទទួលថ្នាំវ៉ាក់ស៊ាំង។ យើងដឹងថាថ្នាំនេះមានសុវត្ថិភាពកម្រិតណា»។
ឳពុកម្តាយមួយចំនួននៅតែគ្មានជំនឿលើថ្នាំវ៉ាក់ស៊ាំងទាំងនេះ។ សង្កាត់ Rockland កំពុងផ្តល់ថ្នាំវ៉ាក់ស៊ាំងដោយឥតគិតថ្លៃដើម្បីជួយបញ្ឈប់ការរីករាលជំងឺកញ្ជ្រិល៕
ប្រែសម្រួលដោយ ស៊ូ ពេជ្រចិន្តា
