ទីក្រុងបាំងកក៖ ក្រសួងវិទ្យាសា្រស្រ្តថៃឲ្យដឹងថា មានការជឿនលឿននៅក្នុងការអភិវឌ្ឍថ្នាំវ៉ាក់សាំងមួយសម្រាប់ការពារមេរោគគ្រុនឈាមដែលកើតមកពីសត្វមូស ហើយបានសម្លាប់មនុស្សច្រើនពាន់នាក់នៅក្នុងភូមិភាគអាស៊ីអាគ្នេយ៍។ ថៃសង្ឃឹមថានឹងអាចផលិតថ្នាំវ៉ាក់សាំងដែលមានតម្លៃថោកគួរសមសម្រាប់ផ្សារក្នុងតំបន់បាន ក្នុងពេលដប់ឆ្នាំខាងមុខ។
អង្គការសុខភាពពិភពលោកឲ្យដឹងថា មនុស្សដល់ទៅ៥០លាននាក់ក្នុងមួយឆ្នាំៗនៅក្នុងប្រទេសជាង១០០ មានឆ្លងមេរោគគ្រុនឈាមដែលបណ្តាលមកពីសត្វមូស។ ក្រុមអ្នកវិទ្យសាស្រ្តនិយាយថា ការចម្លងមេរោគនេះបានកើនចំនួនដោយសារការធ្លាក់ភ្លៀងច្រើននៅក្នុងតំបន់ត្រូពិក។
បញ្ហាសម្រាប់អ្នកវិទ្យាសាស្រ្តជាយូរមកហើយគឺនៅក្នុងការបង្កើតវ៉ាក់សាំងតែមួយ ដើម្បីទប់ទល់នឹងមេរោគគ្រុនឈាមបួនប្រភេទខុសៗគ្នា។ តែឥឡូវនេះ អ្នកវិទ្យាសាស្រ្តនិងក្រសួងសុខាភិបាលថៃនិយាយថា ការពិសោធន៍ដំបូងៗប្រកបជោគជ័យមួយឈុត បានផ្តល់សេចក្តីសង្ឃឹមថា ពួកគេនឹងអាចផលិតថ្នាំវ៉ាក់សាំងគ្រុនឈាមមួយបាន ក្នុងពេលខាងមុខដ៏ខ្លី។
កាលពីថ្ងៃច័ន្ទ ក្រសួងសុខាភិបាលបានជ្រើសរើសក្រុមហ៊ុនឯកជន បាយោណិត អេស៉្យា (Bionet-Asia) ឲ្យពិនិត្យមើលកិច្ចប្រឹងប្រែងផលិតកម្ម។
វេជ្ជបណ្ឌិត វិរ៉ាឆៃ វិរ៉ាមេទិគល់ (Virachai Virameteekul) រដ្ឋមន្រ្តីក្រសួងវិទ្យាសាស្រ្ត និងបច្ចេកវិជ្ជាថៃបានថ្លែងថា មកទល់នឹងពេលនេះ ការអភិវឌ្ឍវ៉ាក់សាំងនេះ ជាសមិទ្ធិដ៏ធំមួយ បន្ទាប់ពីមានការស្រាវជ្រាវរកថ្នាំវ៉ាក់សាំងនេះ អស់ពេលជាច្រើនទសវត្សរ៍រួចមក។ លោកមានប្រសាសន៍ថា៖
«នេះជាជំហានដ៏ធំមួយនៅក្នុងការអភិវឌ្ឍថ្នាំវ៉ាក់សាំងគ្រុនឈាម ដែលជាកម្រិតខ្ពស់បំផុតនៃចំណេះដឹងរបស់យើង និងរបស់អ្នកវិទ្យាសាស្រ្តនិងអ្នកស្រាវជ្រាវថៃក្នុងពេល ២០ ទៅ ៣០ ឆ្នាំកន្លងទៅនេះ។ អ្វីដែលធ្វើឲ្យយើងបានទទួលជោគជ័យសព្វថ្ងៃនេះ គឺយើងអាចរកដំណោះស្រាយថ្នាំវ៉ាក់សាំងមួយ ដែលអាចប្រើការបាននៅក្នុងមន្ទីរពិសោធន៍»។
ក្នុងមួយឆ្នាំៗ មានមនុស្សប្រមាណ ២សែននាក់នៅថៃបានឈឺដោយសារមេរោគនេះ។ ក្មេងៗជាអ្នកស្លាប់ច្រើនជាងគេ ពីព្រោះពួកគេនៅមិនទាន់មានប្រព័ន្ធការពារខ្លួនខ្លាំងដូចមនុស្សពេញវ័យ។
លោកស្រីវេជ្ជបណ្ឌិត ប៊ូនស៊ុក គីឡាប៉ាំង (Boonsok Keelapang) អ្នកស្រាវជ្រាវគម្រោងម្នាក់ និយាយថា ក្មេងៗជាអ្នកបានទទួលផលចំណេញច្រើនជាងគេពីថ្នាំវ៉ាក់សាំងនេះ។ លោកស្រីបន្តថា៖
«គេនឹងប្រើពេលយូរបន្តិច ពីព្រោះនេះជាថ្នាំវ៉ាក់សាំងជំនាន់ទីមួយ។ ហេតុដូច្នេះ បើយើងធ្វើការសាកពិសោធន៍ យើងប្រហែលជាត្រូវធ្វើការកែសម្រួលនៅដំណាក់ណាមួយ ដើម្បីធ្វើឲ្យវ៉ាក់សាំងនោះមានសុវត្ថិភាព។ ក៏ប៉ុន្តែវាជារឿងសំខាន់ណាស់ បើសិនជាយើងបានទទួលជោគជ័យ យើងអាចជួយកូនចៅរបស់យើងបាននៅថៃ ពីព្រោះជំងឺគ្រុនឈាមជាជំងឺដែលប៉ះពាល់មកលើប្រជាពលរដ្ឋថៃ - ប្រជាពលរដ្ឋទាំងអស់នៅក្នុងអាស៊ីអាគ្នេយ៍ - ហើយយើងត្រូវការកម្លាំងទាំងអស់ដើម្បីជួយគ្នា និងធ្វើឲ្យបានសម្រេចជោគជ័យ»។
ក្រុមអ្នកវិទ្យាសាស្រ្តនិយាយថា នៅមានការលំបាកក្នុងដំណាក់ការចុងក្រោយនៃថ្នាំវ៉ាក់សាំងនេះ។ មានមេរោគជំងឺគ្រុនឈាមចំនួនបួនប្រភេទ តែថ្នាំវ៉ាក់សាំងតែមួយម្ជុល(កម្រិត)ត្រូវតែមានប្រសិទ្ធភាពអាចទប់ទល់នឹងមេរោគគ្រប់ប្រភេទបាន ដើម្បីជៀសវាងកុំឲ្យអ្នកជំងឺមានប្រតិកម្មអាក្រក់ពីថ្នាំ៕
ប្រែសម្រួលដោយ កែរ យ៉ាន
