កាលពីថ្ងៃសៅរ៍ប្រទេសកូរ៉េខាងជើងបានរិះគន់យ៉ាងខ្លាំងចំពោះការចោទប្រកាន់ថ្មីៗរបស់ក្រសួងការបរទេសសហរដ្ឋអាមេរិកអំពីកំណត់ត្រាសិទ្ធិមនុស្សរបស់ប្រទេសនេះ ដោយព្រមានថា រដ្ឋាភិបាលក្រុងវ៉ាស៊ីនតោននឹងត្រូវខាតបង់ច្រើនចំពោះអ្វីដែលប្រទេសកម្មុយនិស្តនេះហៅថា «សម្តីផ្តេសផ្តាស»។
ក្រសួងការបរទេសកូរ៉េខាងជើងបានលើកឡើងយ៉ាងពិសេសអំពីបទសម្ភាសន៍របស់វីអូអេនាពេលថ្មីៗនេះជាមួយមន្រ្តីក្រសួងការបរទេសជាន់ខ្ពស់មួយរូបដែលបាននិយាយថា សហរដ្ឋអាមេរិកនៅតែព្រួយបារម្ភយ៉ាងខ្លាំងអំពីការរំលោភសិទ្ធិមនុស្សនៅកូរ៉េខាងជើង។
ការអត្ថាធិប្បាយបានកើតឡើងនៅពេលមានភាពដ៏តានតឹង។ កូរ៉េខាងជើងដែលបានសន្យាជូនអំណោយប្រផ្នូលមិនល្អដល់អាមេរិកសម្រាប់បុណ្យគ្រីស្ទម៉ាស់ បានគំរាមដើរចេញពីកិច្ចចរចានុយក្លេអ៊ែរនិងបន្តបង្កហេតុធំៗ ដូចជាការសាកល្បងនុយក្លេអ៊ែរ ឬការបាញ់មីស៊ីលរយៈចម្ងាយឆ្ងាយ។ សហរដ្ឋអាមេរិកក៏កំពុងបង្កើនសម្ពាធបន្តិចម្តងៗទៅលើកូរ៉េខាងជើង។
ក្រសួងការបរទេសកាលពីថ្ងៃសុក្របានឲ្យចំណាត់ថ្នាក់ជាថ្មីថា កូរ៉េខាងជើងជាប្រទេសរំលោភសេរីភាពសាសនា។ នៅថ្ងៃដដែលនោះ ប្រធានាធិបតីអាមេរិកលោក ដូណាល់ ត្រាំ ក៏បានចុះហត្ថលេខាលើច្បាប់រឹតបន្តឹងការដាក់ទណ្ឌកម្មលើរដ្ឋាភិបាលក្រុងព្យុងយ៉ាងដែរ។
កូរ៉េខាងជើងមិនបានធ្វើអត្ថាធិប្បាយលើវិធានការចុងក្រោយទាំងនេះទេ។ ផ្ទុយទៅវិញ ប្រទេសនេះបានជំទាស់នឹងបទសម្ភាសន៍កាលពីថ្ងៃព្រហស្បតិ៍ដែលលោក Nike Ching អ្នកឆ្លើយឆ្លងព័ត៌មានវីអូអេនៅក្រសួងការបរទេស បានសម្ភាសលោក Robert Destro ឧបការីរដ្ឋមន្ត្រីក្រសួងការបរទេសសហរដ្ឋអាមេរិកទទួលបន្ទុកលទ្ធិប្រជាធិបតេយ្យសិទ្ធិមនុស្សនិងការងារ៕
