កូរ៉េខាងជើងបានតែងតាំងរដ្ឋមន្ត្រីក្រសួងការបរទេសថ្មីរបស់ខ្លួន នេះបើយោងតាមលិខិតផ្លូវការមួយច្បាប់ដែលបានផ្ញើទៅកាន់រដ្ឋាភិបាលអង់គ្លេស។
លោក Ri Yong Ho អតីតអនុរដ្ឋមន្ត្រីក្រសួងការបរទេសគឺជាអ្នកចរចាកំពូលរបស់កូរ៉េខាងជើងនៅក្នុងកិច្ចប្រជុំរំសាយអាវុធនុយក្លេអ៊ែរកាលពីមុន ដោយរួមបញ្ចូលទាំងកិច្ចប្រជុំជាច្រើនជាមួយនឹងសហរដ្ឋអាមេរិកកាលពីទសវត្សរ៍១៩៩០ផង។ កាលពីមុន លោកក៏ធ្វើជាឯកអគ្គរដ្ឋទូតកូរ៉េខាងជើងប្រចាំនៅប្រទេសអង់គ្លេសផងដែរ។
អ្នកវិភាគមួយចំនួននិយាយថា ការតែងតាំងលោក Ri Yong Ho ប្រហែលគឺជាការព្យាយាមស្តារទំនាក់ទំនងការទូតរវាងប្រទេសដាច់ស្រយាលមួយនេះជាមួយនឹងប្រទេសដទៃទៀតនៅទូទាំងពិភពលោក ជាពិសេសបន្ទាប់ពីមានការសាកល្បងនុយក្លេអ៊ែរកាលពីខែមករានិងការបាញ់កាំជ្រួចចម្ងាយឆ្ងាយកាលពីខែកុម្ភៈ ដែលបានធ្វើឲ្យមានការខឹងសម្បារពីបណ្តាប្រទេសនានា។
លោក Ri ក៏ប្រហែលជានឹងត្រូវឲ្យប្តឹងផ្តល់លើករណីជាមួយនឹងអង្គការសហប្រជាជាតិដែលបានដាក់ទណ្ឌកម្មយ៉ាងធ្ងន់ធ្ងរទៅលើប្រទេសរបស់ខ្លួនផងដែរ។
លិខិតនោះមិនបានបញ្ជាក់ទេថា អ្វីនឹងកើតឡើងចំពោះលោក Ri Su Yong ដែលជាអតីតរដ្ឋមន្ត្រីការបរទេសកូរ៉េខាងជើង ថ្វីត្បិតតែទីភ្នាក់ងារឈ្លបយកការណ៍របស់កូរ៉េខាងត្បូងបានឲ្យដឹងថា ពួកគេជឿថា លោក Ri Su Yong ត្រូវបានដំឡើងតំណែងឲ្យទៅជាអនុប្រធានកិច្ចការអន្តរជាតិរបស់គណបក្សពលករដែលកំពុងកាន់អំណាចនោះ៕
