មន្ត្រីយោធាប្រទេសកូរ៉េខាងត្បូង បាននិយាយថា ប្រទេសកូរ៉េខាងជើងបានបាញ់គ្រាប់ផ្លោងមីស៊ីលចូលទៅក្នុងមហាសមុទ្រភាគខាងកើតនៃប្រទេសកូរ៉េខាងជើង ដែលនេះជាការបាញ់ថ្មីបំផុតមួយនៅក្នុងការសាកល្បងបាញ់គ្រាប់ផ្លោងមីស៊ីលជាបន្តបន្ទាប់របស់កូរ៉េខាងជើង។
យោធាសហរដ្ឋអាមេរិកបាននិយាយថា ខ្លួនចាប់ភស្តុតាងបានថា ប្រទេសកូរ៉េខាងជើងបានបាញ់គ្រាប់ផ្លោងមីស៊ីលចំនួនពីរគ្រាប់ក្នុងពេលដំណាលគ្នា ដែលមីស៊ីលមួយគ្រាប់ត្រូវបានបាញ់បានដោយជោគជ័យ ឬឯមួយគ្រាប់ទៀត មិនបានជោគជ័យទេ ដោយវាបានផ្ទុះភ្លាមៗ បន្ទាប់ពីបានបាញ់រួមមក។
ក្រុមមន្ត្រីបាននិយាយថា គ្រាប់មីស៊ីលនេះ ដែលគេជឿជាក់ថាជាគ្រាប់មីស៊ីល Rodong ដែលបាញ់បានចម្ងាយមធ្យម ត្រូវបានបាញ់មុនម៉ោង ៨ ព្រឹក នាថ្ងៃពុធនេះ ចេញពីតំបន់ Unyul ស្ថិតនៅក្នុងខេត្ត Hwanghae ភាគខាងលិចប្រទេសកូរ៉េខាងជើង ហើយវាហោះបានចម្ងាយប្រហែលមួយពាន់ គីឡូម៉ែត្រ មុនពេលដែលវាធ្លាក់ចូលក្នុង ឬក៏ក្បែរដែនសមុទ្រប្រទេសជប៉ុន។
របាយការណ៍របស់ក្រុមមន្ត្រីជាន់ខ្ពស់នៃក្រសួងការពារជាតិសហរដ្ឋអាមេរិកបានបញ្ជាក់ថា ការបាញ់គ្រាប់មីស៊ីលនេះបង្ហាញពីមហិច្ឆតារបស់ប្រទេសកូរ៉េខាងជើងក្នុងការគំរាមកំហែងប្រទេសជិតខាងខ្លួន។
លោកនាយករដ្ឋមន្ត្រីជប៉ុន Shinzo Abe បានហៅការបាញ់គ្រាប់មីស៊ីលនេះថាជា «ការគំរាមកំហែងដ៏ធ្ងន់ធ្ងរមួយ» ដល់សន្តិសុខប្រទេសជប៉ុន និងបានបញ្ជាក់ពីការប្រឆាំងយ៉ាងខ្លាំងក្លាចំពោះគោលបំណងបន្តបាញ់គ្រាប់ផ្លោងមីស៊ីលរបស់ប្រទេសកូរ៉េខាងជើងនេះ។
សហរដ្ឋអាមេរិកបានឆ្លើយតបភ្លាមៗចំពោះការសាកល្បងបាញ់គ្រាប់មីស៊ីលរបស់ប្រទេសកូរ៉េខាងជើងនៅថ្ងៃពុធនេះ ដោយព្រមានប្រទេសកូរ៉េខាងជើងថា សហរដ្ឋអាមេរិកប្រុងប្រៀបរួចជាស្រេចក្នុងការការពារខ្លួន និងសម្ព័ន្ធមិត្តរបស់ខ្លួនពីការវាយប្រហារ ឬការបង្កហេតុណាមួយកើតឡើង។
ការបាញ់គ្រាប់ផ្លោងមីស៊ីលចុងក្រោយនេះ គឺជាការបាញ់លើកទី ៤ ដែលធ្វើឡើងក្នុងរយៈពេលប្រហែល ២ សប្ដាហ៍។ ការបាញ់ទាំងអស់នេះគឺប្រឆាំងនឹងសេចក្តីសម្រេចរបស់អង្គការសហប្រជាជាតិ ដែលរារាំងរដ្ឋាភិបាលក្រុងព្យុងយ៉ាងមិនឲ្យផលិតគ្រាប់ផ្លោងមីស៊ីល៕
