ព្រះអាជ្ញាសហព័ន្ធបានចេញសេចក្ដីប្រកាសមួយកាលពីថ្ងៃព្រហស្បតិ៍ថា អាជ្ញាធរបែលហ្ស៊ិកបានចោទប្រកាន់ជនសង្ស័យទី៩ដែលជាប់ពាក់ព័ន្ធនឹងការវាយប្រហារភេរវកម្មនៅក្នុងទីក្រុងប៉ារីសកាលពីថ្ងៃទី១៣ខែវិច្ឆិកា។
សេចក្ដីប្រកាសនោះបានបញ្ជាក់ថា ជនសង្ស័យនោះត្រូវបានកំណត់អត្តសញ្ញាណថាឈ្មោះ Abdoullah ដើមកំណើតបែលហ្ស៊ិក កើតនៅឆ្នាំ១៩៨៥ ហើយត្រូវបានចាប់ខ្លួនកាលពីថ្ងៃអង្គារនៅក្នុងរដ្ឋធានីព្រុចសែល (Brussels) ពីបទចោទឧក្រិដ្ឋកម្មភេរវកម្ម និងចូលរួមក្នុងសកម្មភាពនានារបស់ក្រុមភេរវកម្មមួយក្រុម។ ការចាប់ខ្លួននេះត្រូវបានធ្វើឡើងដោយសម្ងាត់ដើម្បីចៀសវាងការផ្តល់ដំណឹងដល់ជនឃុបឃិតដទៃទៀត។
សេចក្ដីប្រកាសនោះក៏បានបញ្ជាក់ថា Abdoullah ត្រូវបានសង្ស័យថាបានទាក់ទងជាមួយនឹងបងប្អូនជីដូនមួយរបស់ជនដែលសង្ស័យថាជាមេខ្លោងនៃការវាយប្រហារឈ្មោះ Abdelhamid Abaaoud ចំនួន២ ឬ៣ដងតាមរយៈទូរស័ព្ទ។ Abaaoud និងបងប្អូនជីដូនមួយរបស់គេ ដែលមានឈ្មោះថា Hasna Ait Boulahcen ត្រូវបានសម្លាប់នៅក្នុងការវាយឆ្មក់របស់ប៉ូលិសនៅក្នុងតំបន់ Saint Denis ប្រទេសបារាំង ប៉ុន្មានថ្ងៃបន្ទាប់ពីការវាយប្រហារនោះ។
ប៉ូលិសក្នុងប្រទេសបែលហ្ស៊ិកបានឃុំខ្លួនមនុស្សចំនួន៥នាក់ ដោយរួមមានទាំងបងប្អូនប្រុសចំនួន២នាក់ ក្នុងអំឡុងពេលនៃការវាយឆ្មក់កាលពីថ្ងៃច័ន្ទដែលជាប់ពាក់ព័ន្ធទៅនឹងការវាយប្រហារនៅទីក្រុងប៉ារីស។ អាជ្ញាធរមិនបានបញ្ជាក់អត្តសញ្ញាណរបស់ជនដែលត្រូវបានឃុំខ្លួនទាំងអស់នោះទេ ប៉ុន្តែពួកគេមិនបានរកឃើញគ្រឿងផ្ទុះ ឬសព្វាវុធអ្វីនៅក្នុងការវាយឆ្មក់របស់ប៉ូលិសនោះឡើយ៕
