ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

មនុស្ស​៩នាក់​ត្រូវ​បាន​រកឃើញ​ស្លាប់​នៅ​ក្នុង​ករណី​ជួញដូរ​មនុស្ស​ដ៏​គួរ​ឲ្យ​តក់​ស្លុត​នៅ​រដ្ឋ ​Texas


ប៉ូលិស​ក្នុង​ទីក្រុង​ San Antonio កំពុង​ស៊ើប​អង្កេត​នៅ​កន្លែង​កើត​ហេតុ​ដែល​មាន​មនុស្ស​៨​នាក់​ត្រូវ​បាន​គេ​រក​ឃើញ​ស្លាប់​ក្នុង​រថយន្ត​ដែល​មាន​មនុស្ស​សរុប​៣០​នាក់ កាល​ពី​ថ្ងៃ​អាទិត្យ។
ប៉ូលិស​ក្នុង​ទីក្រុង​ San Antonio កំពុង​ស៊ើប​អង្កេត​នៅ​កន្លែង​កើត​ហេតុ​ដែល​មាន​មនុស្ស​៨​នាក់​ត្រូវ​បាន​គេ​រក​ឃើញ​ស្លាប់​ក្នុង​រថយន្ត​ដែល​មាន​មនុស្ស​សរុប​៣០​នាក់ កាល​ពី​ថ្ងៃ​អាទិត្យ។

ប៉ូលិស​នៅ​រដ្ឋTexas ដែល​ស្ថិត​នៅ​ប៉ែក​ខាង​ត្បូង​នៃ​សហរដ្ឋអាមេរិក​និយាយ​ថា មនុស្ស​ចំនួន​៨​នាក់​ត្រូវ​បាន​រក​ឃើញ​ថា​ស្លាប់​នៅ​ក្នុង​ឃ្លុប​ខាង​ក្រោយ​នៃ​រថយន្ត​ដឹក​ទំនិញ​ធុន​ធ្ងន់​មួយ​គ្រឿង នៅ​ក្នុង​ហេតុការណ៍​មួយ​ដែល​ប៉ូលិស​ហៅ​ថា ជា​ករណី​ជួញ​ដូរ​ជនអន្តោប្រវេសន៍​ដ៏​គួរ​ឲ្យ​តក់ស្លុត។ ​ជន​រង់គ្រោះ​ម្នាក់​ទៀត​បាន​ស្លាប់​នៅ​មន្ទីរ​ពេទ្យ។

លោក ​William McManus ស្នងការ​ប៉ូលិស​ក្នុង​ទីក្រុង San Antonio បាន​ឲ្យ​ដឹង​ថា អ្នក​នៅ​រស់​រាន​មាន​ជីវិត​យ៉ាង​ហោច​ណាស់​២៨​នាក់​ដោយ​ក្នុង​នោះ​ក៏​រួម​មាន​ទាំង​កុមារ​តូច​២​នាក់​ផង​នោះ ត្រូវ​បាន​បញ្ជូន​ទៅ​ទទួល​ការ​ព្យាបាល​នៅ​មន្ទីរពេទ្យ​កាល​ពី​ព្រឹក​ថ្ងៃ​អាទិត្យ ហើយ​២០​នាក់​ផ្សេង​ទៀត​កំពុង​ស្ថិត​ក្នុង​ស្ថានភាព​គំរាម​កំហែង​ដល់​អាយុជីវិត។ លោក McManus បាន​ហៅ​ហេតុការណ៍​នេះ «ថា​ជា​ឧក្រិដ្ឋកម្ម​ជួញដូរ​មនុស្ស»។

លោក ​Charles Hood​ ប្រធាន​ផ្នែក​ពន្លត់​អគ្គីភ័យ​នៃ​ទីក្រុង San Antonio បាន​ថ្លែង​ថា ​អ្នក​នៅ​រស់​រាន​មាន​ជីវិត​ទាំង​នេះ​អាច​នឹង​ត្រូវ​បាត់បង់​ជីវិត​ប្រសិន​បើ​ពួកគេ​នៅតែ​ស្នាក់​នៅ​ក្នុង​ឃ្លុប​រថយន្ត​នោះ​មួយ​យប់​ទៀត​ ដោយ​សីតុណ្ហភាព​នៅ​ក្នុង​ទីក្រុង​នេះ​កាល​ពី​ថ្ងៃ​សៅរ៍​បាន​ឡើង​ដល់​៣៨​អង្សាសេ។

លោក​ Hood ​បាន​មាន​ប្រសាសន៍​ទៀត​ថា អ្នក​បើកបរ​រថយន្ត​ដឹក​ទំនិញ​ធុន​ធ្ងន់​នោះ ត្រូវ​បាន​ចាប់​ខ្លួន ប៉ុន្តែ​ប៉ូលិស​នៅ​មិន​ទាន់​បញ្ចេញ​អត្តសញ្ញាណ​របស់​ជន​នោះ​នៅ​ឡើយ​ទេ។ ប៉ូលិស​ក៏​មិន​ទាន់​បាន​បញ្ចេញ​សញ្ជាតិ​របស់​ជន​រង​គ្រោះ​នៅ​ឡើយ​ដែរ៕

XS
SM
MD
LG