អតីតមេទ័ពរបស់កម្លាំងរាជានិយមហ៊្វុនស៊ិនប៉ិច គឺ លោក ញឹក ប៊ុនឆៃ នៅថ្ងៃពុធនេះ បានប្រកាសផ្តាច់ចំណងនយោបាយជាមួយអតីតចៅហ្វាយរបស់លោក គឺព្រះអង្គម្ចាស់នរោត្តម រណឫទ្ធិ ប្រធានគណបក្សហ៊្វុនស៊ិនប៉ិច ដើម្បីទៅបង្កើតគណបក្សនយោបាយថ្មីមួយ ឈ្មោះថា «គណបក្សរួបរួមជាតិ»។
ការប្រកាសរបស់លោក ញឹក ប៊ុនឆៃ អតីតមេទ័ពស្មោះនឹងព្រះអង្គម្ចាស់ នរោត្តម រណឫទ្ធិ ធ្វើឡើងបន្ទាប់ពីមានសេចក្តីរាយការណ៍ព័ត៌មានជាបន្តបន្ទាប់កាលពីពេលថ្មីៗនេះអំពីទំនាស់ផ្ទៃក្នុងបក្សរវាងព្រះអង្គម្ចាស់ នរោត្តម រណឫទ្ធិ និងលោក ញឹក ប៊ុនឆៃ ដែលជាអនុប្រធានគណបក្សហ៊្វុនស៊ិនប៉ិច។
ថ្លែងទៅកាន់អ្នកសារព័ត៌មាន នៅឯគេហដ្ឋានរបស់លោកស្ថិតក្នុងសង្កាត់ជ្រោយចង្វារ ខ័ណ្ឌជ្រោយចង្វារ កាលពីព្រឹកថ្ងៃពុធកន្លងទៅ លោក ញឹក ប៊ុនឆៃ មានប្រសាសន៍ថា ការដឹកនាំបែបអត្តនោម័តដែលនឹងនាំទៅរកអំពើពុករលួយនិងបក្សពួកនិយមរបស់ព្រះអង្គម្ចាស់ នរោត្តម រណឫទ្ធិ បានធ្វើឲ្យលោកនិងសមាជិក សមាជិកា នៃគណបក្សហ៊្វុនស៊ិនប៉ិចមួយចំនួន មិនសប្បាយចិត្ត ហើយត្រូវដើរចេញពីគណបក្ស ដើម្បីផ្តើមផ្លូវនយោបាយថ្មីមួយដោយខ្លួនឯង។
«របៀបដឹកនាំ របៀបគណបក្សដូចសព្វថ្ងៃហ្នឹង ខ្ញុំអត់ពេញចិត្តព្រោះការដឹកនាំហ្នឹង របៀបគេហៅថា អត្តនោម័ត ការសម្រេចដោយប្រធានអីមួយ អញ្ចឹងទៅដល់អញ្ចឹងខ្ញុំតាំងពីដើម ដែលខ្ញុំកែទម្រង់ថ្ងៃ ១៨ ខែតុលា ឆ្នាំ២០០៦ ខ្ញុំកែចំណុចហ្នឹងពីអំណាចផ្តាច់មុខ ទៅលើប្រធានមកជាអំណាច ដោយសមូហភាព ដែលមានគណៈអចិន្ត្រៃយ៍គណៈនាយកតាមបែបប្រជាធិបតេយ្យ។ អញ្ចឹងហើយដែលខ្ញុំឃើញហ្នឹងចំណុចមួយ។ ចំណុចពីរ ខ្ញុំកំពុងតែឃើញថា អាចនឹងឈានទៅមានអំពើពុករលួយអញ្ចឹងដែលខ្ញុំសង្ឃឹមថា គណបក្សនយោបាយ បើយើងមានអំពើពុករលួយពីហ្នឹងហើយ បើយើងឈានទៅដឹកនាំជាតិ ក៏វាធ្វើឲ្យជាតិហ្នឹងខ្ទេចខ្ទីដែរ។ អញ្ចឹងដែលខ្ញុំអត់ពេញចិត្តទេ បក្សពួកនិយម ហើយគ្រួសារនិយមថែមទៀត»។
លោក សាយ ហាក់ អគ្គលេខាធិការគណបក្សហ៊្វុនស៊ិនប៉ិច បានឆ្លើយតបភ្លាមៗថា ព្រះអង្គម្ចាស់នរោត្តម រណឫទ្ធិ ពុំមានព្រះបំណងប្រព្រឹត្តអំពើពុករលួយនោះទេ។ លោកថ្លែងយ៉ាងដូច្នេះថា៖
«ខ្ញុំសូមជម្រាបពាក្យថា ពុករលួយនេះ លោកមកកាន់ លោកអត់ដែលបានទទួលអី ពុករលួយអីទេ។ អ្នកដែលលក់ស្នាក់ការទាំងអស់ គឺឯកឧត្តម ញឹក ប៊ុនឆៃ ជាមួយគណបក្សហ៊្វុនស៊ិនប៉ិច ចាស់នោះ ដោះដូរទាំងអស់។ លោកគ្រាន់តែចង់ដឹងថា តើមានអ្វីខ្លះដែលនៅសល់ ដើម្បីធ្វើបញ្ជីសារពើពន្ធ តែប៉ុណ្ណឹង អត់មានសើរើអីទាំងអស់»។
លោកក៏បានច្រានចោលការចោទប្រកាន់ទាក់ទិនបញ្ហាបក្សពួកនិយម ហើយអះអាងថា គណបក្សហ៊្វុនស៊ិនប៉ិច ពុំបានជួបការបែកបាក់ផ្ទៃក្នុងនោះទេ ទោះបីជាលោក ញឹក ប៊ុនឆៃ ប្រកាសបង្កើតគណបក្សថ្មីក៏ដោយ។
«គណបក្សហ៊្វុនស៊ីនប៉ិចអត់មានបែកបាក់គ្នាទេ ព្រះអង្គក៏មិនដែលដេញអ្នកណាចេញពីគណបក្សហ៊្វុនស៊ិនប៉ិចដែរ។ សិទ្ធិរបស់បុគ្គលមួយៗចង់ធ្វើនយោបាយ ចង់ចេញ អាហ្នឹងជាសិទ្ធិរបស់គាត់ ក៏ប៉ុន្តែកុំយកឈ្មោះគណបក្សហ៊្វុនស៊ិនប៉ិច logo ហ៊្វុនស៊ិនប៉ិច ទៅធ្វើជារបស់បុគ្គលផ្សេងអត់បានទេ»។
លោក អ៊ូ វីរៈ អ្នកវិភាគនយោបាយកម្ពុជា និងជាប្រធានវេទិកាអនាគត ដែលជាមជ្ឈមណ្ឌលសិក្សាស្រាវជ្រាវគោលនយោបាយក្នុងស្រុក ថ្លែងថា គណបក្សរាជានិយមហ៊្វុនស៊ិនប៉ិច ពុំមានសារនយោបាយថ្មី ឬគោលគំនិតថ្មីសម្រាប់ទាញការគាំទ្រពីអ្នកបោះឆ្នោតនោះឡើយ។ លោកថា បើទោះជាគណបក្សនេះ មិនជួបការបែកបាក់គ្នាក៏ដោយ ក៏គណបក្សនេះ មិនអាចមានឱកាសនឹងទទួលបានការគាំទ្រនោះដែរ ហើយគណបក្សនេះរង់ចាំតែពេលវេលាសម្រាប់បិទបញ្ចប់ជីវិតនយោបាយរបស់ខ្លួនតែប៉ុណ្ណោះ។
លោក អ៊ូ វីរៈ ថ្លែងថា៖
«នយោបាយពួកគាត់តាំងពីដើមមកនយោបាយស៊ីកេរ្តិ៍។ ពីដើមមក គាត់ស៊ីកេរ្តិ៍សម្តេចតា ហើយក្រោយមកស៊ីកេរ្តិ៍គណបក្សប្រជាជន ឱបជើងគណបក្សប្រជាជន ហើយធ្វើគណបក្សនយោបាយមួយ ប៉ុន្តែទៅសុំអង្វរ ហើយនិងស្តាប់បញ្ជានៃគណបក្សនយោបាយមួយទៀត អាហ្នឹងគឺខ្ញុំមើលទៅគ្មានឱកាសមានការគាំទ្រពីប្រជាពលរដ្ឋទាល់តែសោះ។ ហើយអញ្ចឹងបានខ្ញុំថា មិនមែនគឺទោះបីគាត់បែកគ្នាក៏ដោយ មិនបែកគ្នាក៏ដោយ ក៏ខ្ញុំមើលពួកគាត់ទាំងពីរនាក់គឺប្រហែលជាបញ្ចប់ជីវិតនយោបាយហើយ»។
ព្រះអង្គម្ចាស់ នរោត្តម រណឫទ្ធិ ព្រះជន្ម៧២វស្សា ធ្លាប់ធ្វើជានាយករដ្ឋមន្ត្រីទី១ នៅក្រោយការបោះឆ្នោតឆ្នាំ១៩៩៣ និងជាគូប្រជែងកម្លាំងយោធារបស់លោកនាយករដ្ឋមន្ត្រី ហ៊ុន សែន ដែលជានាយករដ្ឋមន្ត្រីទី២នាពេលនោះ។
គណបក្សហ៊្វុនស៊ិនប៉ិចទទួលបានការគាំទ្រដោយសំឡេងច្រើនលើសលប់នៅក្នុងការបោះឆ្នោត ដែលរៀបចំដោយអង្គការសហប្រជាជាតិកាលពីឆ្នាំ១៩៩៣ ដោយទទួលបានអាសនៈចំនួន៥៨។ អាសនៈរបស់គណបក្សនយោបាយរាជានិយមមួយនេះបានថយចុះជាបន្តបន្ទាប់រហូតដល់សូន្យ នៅក្នុងការបោះឆ្នោតនាឆ្នាំ២០១៣ ដោយសារគណបក្សនេះបានបែកបាក់ផ្ទៃក្នុងយ៉ាងធ្ងន់ធ្ងរ។
លោក ញឹក ប៊ុនឆៃ ថ្លែងនៅចំពោះអ្នកសារព័ត៌មាន កាលពីថ្ងៃពុធដដែលថា គណបក្សនយោបាយរបស់លោកនឹងអាចរកបានកៅអីពីការបោះឆ្នោតឆ្នាំ២០១៨។ លោកបានអះអាងផងដែរថា ប្រភពថវិកាគណបក្សថ្មីរបស់លោកនឹងចេញមកពីការចូលរួមចំណែករបស់សមាជិកសមាជិកាដែលបានដើរចេញពីគណបក្សហ៊្វុនស៊ិនប៉ិច។ លោកក៏បានបញ្ជាក់ផងដែរថា គណបក្សប្រជាជនកម្ពុជា ពុំនៅពីក្រោយការបង្កើតគណបក្សរួបរួមជាតិរបស់លោកនោះទេ។ លោកថា គោលនយោបាយរបស់គណបក្សរួបរួមជាតិរបស់លោកនឹងផ្តោតទៅលើវិបត្តិសង្គមដែលប្រជាជនខ្មែរកំពុងជួបសព្វថ្ងៃ ដូចជាវិបត្តិដីធ្លី និងអំពើពុករលួយជាដើម៕
