ទីផ្សារភាគហ៊ុនទីក្រុងញូយ៉ក បានឲ្យដឹងថា ខ្លួននឹងមិនអនុវត្តតាមគម្រោងផែនការ ក្នុងការដកចេញក្រុមហ៊ុនទូរគមនាគមន៍របស់ចិនចំនួន៣ ពីបញ្ជីផ្សារភាគហ៊ុន តាមបទបញ្ជាប្រតិបត្តិដែលចេញដោយប្រធានាធិបតីអាមេរិក លោក Donald Trump ទេ។
ទីផ្សារភាគហ៊ុននេះ បានផ្សព្វផ្សាយនៅលើគេហទំព័ររបស់ខ្លួនកាលពីថ្ងៃចន្ទថា ខ្លួនបានផ្លាស់ប្តូរសេចក្តីសម្រេចរបស់ខ្លួនកាលពីលើកមុន «បន្ទាប់ពីពិគ្រោះយោបល់ថែមទៀត»ជាមួយនិយ័តករជាច្រើននាក់រួចមក។
កាលពីថ្ងៃព្រហ្បតិ៍សប្តាហ៍មុន ផ្សារភាគហ៊ុនទីក្រុងញូយ៉កបាននិយាយថាខ្លួននឹងដកចេញក្រុមហ៊ុន Telecom Corp Limited ក្រុមហ៊ុន China Mobile Limited និងក្រុមហ៊ុន China Unicom Hong Kong Limited ដែលគ្រប់គ្រងដោយរដ្ឋាភិបាលចិន តាមបទបញ្ជាដែលបានដាក់ចេញដោយលោកត្រាំកាលពីខែវិច្ឆិកាកន្លងទៅដែលបានហាមប្រាមក្រុមហ៊ុនអាមេរិក និងពលរដ្ឋអាមេរិកនានា មិនឲ្យបណ្តាក់ទុនរកស៊ីជាមួយក្រុមហ៊ុនចិនយ៉ាងតិចចំនួន៣១ ដែលត្រូវបានជឿជាក់ថា មានជាប់ពាក់ព័ន្ធនឹងយោធាចិន។
ក្រសួងពាណិជ្ជកម្មចិន បានព្រមានកាលពីថ្ងៃសៅរ៍កន្លងទៅថា រដ្ឋាភិបាលទីក្រុងប៉េកាំង «នឹងចាត់វិធានការចាំបាច់ប្រឆាំងតបវិញ» ដើម្បីការពារក្រុមហ៊ុនរបស់ខ្លួន៕
