អង្គការសុខភាពពិភពលោក WHO ឲ្យដឹងថាមនុស្សរាប់លាននាក់ស្លាប់ និងឈឺរាល់ឆ្នាំ ដោយការទទួលអាហារមិនគ្រប់គ្រាន់ ដែលរួមមាន ការខ្វះអាហារូបត្ថម្ភ ជាតិវីតាមីន និងការខ្វះខនិជ (mineral) ហើយនិងបញ្ហាលើសទម្ងន់និងការធាត់ដុះពោះ។ អង្គការ WHO កំពុងចាប់ផ្តើមដំណើរការ បង្កើតគេហទំព័រ (Website) ដ៏មានឥទ្ធិពលថ្មីមួយ ហៅ electronic Library of Evidence for Nutrition Actions ឬហៅកាត់ថា eLENA គឺជាបណ្ណាល័យអេឡិចត្រូនិចសម្រាប់ទុកភស្តុតាងនៃកិច្ចការទាក់ទងនឹងម្ហូបអាហារដែលធ្វើឲ្យខ្លួនធំធាត់។ Website នោះមានផ្តល់គោលការណ៍ណែនាំ ដល់រដ្ឋាភិបាលនិងក្រុមអ្នកថែទាំសុខភាព អំពីអន្តរាគមន៍ទាំងឡាយទាក់ទងនិងអាហារដែលមានជីវជាតិសម្រាប់ជួយសង្គ្រោះជីវិតមនុស្ស។
អង្គការសុខភាពពិភពលោកនិយាយថា មានព័ត៌មានដែលអាចរកបានមួយចំនួនធំ អំពីរបៀបព្យាបាលការខ្វះអាហាររូបត្ថម្ភនៅក្នុងទ្រង់ទ្រាយផ្សេងៗជាច្រើន។ បញ្ហាគឺថា ការណែនាំដ៏ច្រើនអំពីអន្តរាគមន៍ខាងអាហារមានជីវជាតិល្អ ដើម្បីធ្វើការទប់ស្កាត់និងព្យាបាលរោគនោះ មានការនិយាយផ្ទុយគ្នា។
នេះគឺថា វាមិនត្រឹមតែពិបាកយល់ទេ ប៉ុន្តែវាអាចបណ្តាលឲ្យស្លាប់បាន។ អង្គការ WHO និយាយថា Website ថ្មីរបស់ខ្លួនអាចជួយប្រទេសនានាលៃលកដោះស្រាយជាមួយនឹងការគំរាមសុខភាពដ៏គួរឲ្យខ្លាច ដែលបណ្តាលមកពីការខ្វះអាហារូបត្ថម្ភ។ អង្គការ WHO និយាយថា គម្រោងថ្មីបង្ហាញពីការណែនាំចុងក្រោយបង្អស់ អំពីអន្តរាគមន៍ណាមួយដែលអាចដោះស្រាយបញ្ហាចម្បងនៃការខ្វះអាហារូបត្ថម្ភបានប្រសើរជាងគេ។ ទាំងនេះរួមមានការអត់អាហារ ការខ្វះវីតាមីននិងខ្វះខនិជ និងបញ្ហាលើសទម្ងន់និងការធាត់ដុះពោះ។
លោក ហ្វ្រានសេស្កូ ប្រង់ក៍ (Francesco Branc) នាយកខាងផ្នែកសុខភាពនិងការអភិវឌ្ឍន៍របស់អង្គការ WHO មានប្រសាសន៍ថា ប្រទេសពាសពេញពិភពលោកកំពុងដោះស្រាយបញ្ហាផ្គួបបញ្ចូលគ្នានៃការខ្វះនិងការលើសអាហារដែលមានជីវជាតិ។ លោកនិយាយថា ប្រទេសកំពុងអភិវឌ្ឍន៍ កំពុងទទួលការប៉ះពាល់ខ្លាំងជាងគេពីបញ្ហាទាំងពីរនេះ។
«យើងអាចនិយាយថាបញ្ហាទាំងឡាយ មានដូចជាក្មេងមានទម្ងន់មិនគ្រប់ ការខ្វះអាហារមានជីវជាតិ និងការបំបៅដោះកូនដ៏ខ្សត់ខ្សោយ ដែលជាបញ្ហាចម្បងនៃការខ្វះអាហារយ៉ាងជាក់ស្តែងនោះ បានបណ្តាលឲ្យកុមារក្រោមអាយុ៥ឆ្នាំ ចំនួន៧ភាគរយស្លាប់ជារៀងរាល់ឆ្នាំ គឺស្មើនិងចំនួនប្រហែល៤លាននាក់បានស្លាប់ដោយបញ្ហានេះ។ នេះគឺស្មើនិងចំនួន១០ភាគរយនៃចំនួនមនុស្សស្លាប់ដោយសារជំងឺនេះនៅក្នុងសកលលោក»។
ការខ្វះអាហារមានជីវជាតិចាំបាច់ដើម្បីរស់ រួមមានការខ្វះជាតិអ៊ីយ៉ូដ (iodine) ដែលជាការងាយស្រួលនឹងទប់ស្កាត់បាន តែជាមូលហេតុចម្បងបំផុតនៃការធ្ចើឲ្យខូចខួរក្បាលនៅក្នុងពិភពលោក។ វាក៏បណ្តាលឲ្យកើតជំងឺខ្វះឈាមក្រហមដែរ ដែលប៉ះពាល់ដល់មនុស្សចំនួន ១ពាន់៦រយលាននាក់ ពីការខ្វះវីតាមីន A និង Zinc ដែលប៉ះពាល់ដល់កុមារតូចៗរាប់រយលាននាក់។
បញ្ហាទី៣នៃការខ្វះអាហារូបត្ថម្ភ គឺការលើសទម្ងន់និងការធាត់ដុះពោះ។ អង្គការ WHO រាយការណ៍ថា មនុស្សពេញវ័យអាយុលើស២០ឆ្នាំ ប្រមាណ ១ពាន់៥រយលាននាក់ ជាមនុស្សលើសទម្ងន់ ឬធាត់ដុះពោះ។ ហើយ ការប៉ាន់ស្មានទាំងឡាយផ្តល់យោបល់ថា កុមារដែលមានអាយុតិចជាង៥ឆ្នាំ ចំនួនជាង៤០លាននាក់នៅក្នុងសកលលោក ជាក្មេងលើសទម្ងន់និងធាត់ដុះពោះ ជាស្រេចទៅហើយ។
លោក Branca ប្រាប់វីអូអេថា មានកិច្ចការជាច្រើនដែលត្រូវធ្វើនៅក្នុងតំបន់ដែលមានកុមារធាត់ដុះពោះ។ ប៉ុន្តែលោកកត់ចំណាំថា គម្រោងសហគមន៍ខ្លះដែលមានគោលដៅជួយកុមារឲ្យមានទម្ងន់ទាបនោះ កំពុងជួបប្រទះនឹងជោគជ័យខ្លះៗហើយ។ លោកនិយាយថា គម្រោងទាំងនេះបានផ្តោតទៅលើការធ្វើឲ្យប្រសើរដល់គុណភាពម្ហូបអាហារដែលឲ្យដល់កុមារក្នុងសាលារៀននិងការលើកស្ទួយសកម្មភាពហាត់ប្រាណ។
«ត្រូវធ្វើឲ្យប្រាកដថា ការផ្គត់ផ្គង់ម្ហូបអាហារដែលផ្តល់ឲ្យប្រចាំថ្ងៃនៅក្នុងស្ថាប័នសិក្សា មានគ្រប់គ្រាន់ ដោយមានគ្រឿងផ្តល់ឋាមពលទាប។ មានកិច្ចប្រឹងប្រែងកាន់តែច្រើនឡើងចំពោះ ឧទាហរណ៍ដូចជា ការកាត់បន្ថយការប្រើប្រាស់ទឹកសូដាកំប៉ុង ដែលជាសមាសភាគសំខាន់នៃការធ្វើឲ្យក្មេងធាត់ដុះពោះ ការផ្សព្វផ្សាយអំពីគុណភាពខ្ពស់នៃម្ហូបអាហារ ដូចជា ផ្លែឈើនិងបន្លែ។ នៅមានការផ្តើមគំនិតច្រើនទៀត ដូចជានៅក្នុងទ្វីបអឺរ៉ុប ដើម្បីធ្វើឲ្យបានប្រសើរដល់ការផ្តល់ផ្លែឈើនិងបន្លែនៅក្នុងសាលារៀន ក៏ដូចគ្នានឹងការលើកស្ទួយសកម្មភាពលំហែកាយ និងការហាត់ប្រាណផងដែរ»។
អង្គការ WHO រាយការណ៍ថា មនុស្សរាប់ពាន់លាននាក់ត្រូវបានប៉ះពាល់ដោយការខ្វះអាហារូបត្ថម្ភ មួយឬក៏ច្រើនប្រភេទដែរ។ អង្គការនេះឲ្យដឹងថា Website ដែលទើបបានបង្កើតឡើងនោះ នឹងផ្តល់ប្រទេសជាច្រើននូវវិទ្យាសាស្ត្រនិងការណែនាំដាស់តឿនជាក់លាក់ ដែលប្រទេសទាំងនោះត្រូវការ ដើម្បីកាត់បន្ថយការស្លាប់ដែលមិនចាំបាច់ និងការឈឺចាប់ដែលទាក់ទងនឹងការខ្វះអាហារូបត្ថម្ភ៕
ប្រែសម្រួលដោយ នុច សារីតា
