ភ្ជាប់​ទៅ​គេហទំព័រ​ទាក់ទង

មជ្ឈ​មណ្ឌល​បង្ហោះ​អវកាស​ថ្មី​របស់កូរ៉េ​ខាង​ជើង​ ហាក់​ដូច​ជា​ធ្វើ​ហើយ


រូបភាព​ប៉ម​បង្ហោះ​មួយ​នៅ​មជ្ឈ​មណ្ឌល​បង្ហោះ​កាំជ្រួច​ផ្លោង​ទី​ពីរ​របស់​​ប្រទេស​កូរ៉េ​ខាង​ជើង។

រូប​ភាព​តាម​ផ្កាយ​រណប​ថ្មី​ដែល​ទី​ភ្នាក់​ងារ​ព័ត៌មាន​វីអូអេ​(VOA​ News)​បាន​ឃើញ បង្ហាញ​ថា​ប្រទេស​កូរ៉េ​ខាង​ជើង​បាន​ធ្វើ​បង្ហើយ​ប៉ម​បង្ហោះ​មួយ​ នៅ​មជ្ឈ​មណ្ឌល​បង្ហោះ​កាំជ្រួច​ផ្លោង​ទី​ពីរ​របស់​ខ្លួន​ នៅ​ភាគ​ពាយ័ព្យ​នៃ​ប្រទេស។​ ក្រុម​អ្នក​វិភាគ​ការណ៍​សម្ងាត់​នៅ​ក្នុង​ស.រ.អា.​និង​កូរ៉េ​ខាង​ត្បូង​កំពុង​ឃ្លាំ​មើល​មជ្ឈ​មណ្ឌល​នេះ​យ៉ាង​ដិត​ដល់​ នៅ​ក្បែរ​ទី​ក្រុង​តូច​ តុងចាំង-ដុង​(Tongchangdong)។ មជ្ឈ​មណ្ឌល​នេះ​ត្រូវ​គេ​ចាត់​ទុក​ថា​ជា​កត្តា​សំខាន់​មួយ​នៅ​ក្នុង​ការប្រឹង​ប្រែង​របស់​ក្រុង​ព្យុងយាំង​ (Pyongyang)​ ដើម្បី​ស្ថាបនា​កាំជ្រួច​ផ្លោង​មួយ​គ្រឿង​ដែល​អាច​បញ្ជូន​អាវុធ​នុយគ្លេអ៊ែរ​ (Nuclear)​ មួយ​ ឆ្លង​មហា​សមុទ្រ​ប៉ាស៊ីហ្វិក​បាន។

រូបភាព​ដែល​ទី​ភ្នាក់​ងារ​ព័ត៌មាន​វីអូអេ​បាន​ទទួល​បង្ហាញ​ឲ្យ​ឃើញ​មជ្ឈ​មណ្ឌល​បង្ហោះ​កាំជ្រួច​ផ្លោង​និង​អវកាស​មួយ​ ដែល​ធ្វើ​ហើយ​នៅ​ក្នុង​ប្រទេស​កូរ៉េ​ខាង​ជើង។​ រូប​ភាព​តាម​ផ្កាយ​រណប​ទាំង​នេះ​ត្រូវ​បាន​ថត​ក្នុង​ពេល​មួយ​ខែ​មុន​នេះ។

សំខាន់​បំផុត​រូបថត​ទាំង​នេះ​បង្ហាញ​ឲ្យ​ឃើញ​ប៉ម​បង្ហោះ​ដែល​ធ្វើ​ហើយ​ ដោយ​មាន​ខ្សែ​កាប​ នៅ​មជ្ឈ​មណ្ឌល​ តុងចាំងដុង។

លោក​ ធិម​ ប្រោន​(Tim​ Brown)​ អ្នក​វិភាគ​រូបភាព​ម្នាក់​ដែល​ជា​អ្នក​ស្រាវ​ជ្រាវ​ជើង​ចាស់នៅ​អង្គការ​ Global​ Security​-dot​-org​ និយាយ​ថា​ប្រទេស​កូរ៉េ​ខាង​ជើង​បាន​ប្រើ​ពេល​ប្រហែល​មួយ​ទសវត្សរ៍​ដើម្បី​សង់​មជ្ឈ​មណ្ឌល​នេះ​ឲ្យ​ហើយ។

«បន្តិច​ម្តងៗ​ ពួក​គេ​បាន​ធ្វើ​បង្ហើយ​កន្លែង​មួយ​ ដែល​អាច​ប្រើ​ការ​បាន។​យើង​អាច​និយាយ​បាន​ដោយ​សេចក្តី​ទុក​ចិត្ត​ថា​ប៉ម​បង្ហោះ​និង​ទ្រនាប់​បង្ហោះ​បាន​ធ្វើ​រួច​រាល់​អស់​ហើយ។​ ឥឡូវ​សំណួរ​គឺ​ថា​ តើ​ពួក​គេ​មាន​យាន​មួយ​ដើម្បី​បាញ់​បង្ហោះ​ទេ?​ យើង​មិន​អាច​ដឹង​បាន​ទេ»។

លោក​ប្រោន​និង​សហការី​ម្នាក់​បាន​មើល​ឃើញ​មជ្ឈ​មណ្ឌល​នេះ​ក្នុង​ឆ្នាំ​ ២០០៨​ នៅ​ពេល​កំពុង​ចាប់​សង់។​ លោក​ទាំង​ពីរ​ជា​អ្នក​ប្រកាស​មុន​គេ​ឲ្យ​ដឹង​ជា​សាធារណៈ​អំពី​មជ្ឈ​មណ្ឌល​នេះ។

លោក​ ប្រោន​ និយាយ​ថា​មជ្ឈ​មណ្ឌល​នេះ​ជា​កន្លែង​បង្ហោះ​ទំនើប​ជាង​កន្លែង​បង្ហោះ​ទី​មួយ​របស់​កូរ៉េ​ខាង​ជើង​ នៅ​មូស៊ូដាន-រី​ (Musudan-ri)​ ពីព្រោះ​វា​មាន​វេទិកា​មួយ​សម្រាប់​ធ្វើ​តេស​ម៉ាស៊ីន​រ៉ុក្កែត​ អាគារ​តម្លើង​និង​ធ្វើ​តេស​កាំជ្រួច​ផ្លោង​ រណ្តៅ​បង្ហោះ​មួយ​ និង​ប៉ម​សង្កេត​មើល​មួយ។

«កន្លែង​បង្ហោះ​ដ៏​ទំនើប​បែប​នេះ​មួយ​ជា​ការអស្ចារ្យ​ណាស់​ បើ​ប្រៀប​ធៀប​ទៅ​នឹង​កន្លែង​ចាស់​ ដែល​គេ​អាច​បង្ហោះ​កាំជ្រួច​ផ្លោង​បាន​ តែ​នៅ​ពេល​ណា​ដែល​មាន​ធាតុ​អាកាស​ល្អ​ប៉ុណ្ណោះ។​ កន្លែង​នេះ​គឺ​ពិត​ជា​មជ្ឈ​មណ្ឌល​បង្ហោះ​មួយ​ ដែលគេ​បាន​យក​ចិត្ត​ទុក​ដាក់​យ៉ាង​ដិត​ដល់»។

លោក​ ដាន្ញែល​ ពិងស្តុន​ (Daniel​ Pinkston)​ ជា​អ្នក​វិភាគ​ជើង​ចាស់​ម្នាក់​របស់​ក្រុម​វិបត្តិ​អន្តរជាតិ​ International​ Crisis​ Group​ នៅ​ក្រុង​ សេអ៊ូល។​ លោក​ថ្លែង​ថា​ មជ្ឈ​មណ្ឌល​នេះ​ជា​ជំហាន​សំខាន់​មួយ​នៅ​ក្នុង​ការ​ស្វះ​ស្វែង​របស់​កូរ៉េ​ខាង​ជើង​ដើម្បី​ឲ្យ​មាន​កាំជ្រួច​ផ្លោង​អន្តរទ្វីប​មួយ​ដែល​អាច​បាញ់​ដល់​ស.រ.អា.។

«វត្ថុ​ទាំង​ពីរ​នេះ​មិន​អាច​បំបែក​គ្នា​បាន​ទេ។ បើ​លោក​អ្នក​មាន​សមត្ថភាពអាច​បង្ហោះ​អវកាស​បាន​ហើយ​ ចាប់​ពី​ចំណុច​នេះ​ទៅ​គឺ​ លោក​អ្នក​អាច​យក​សមត្ថភាព​ទៅ​ផលិត​កាំជ្រួច​ផ្លោង​អន្តរទ្វីប​មួយ​បាន​យ៉ាង​ងាយ»។

លោក​រដ្ឋ​មន្រ្តី​ការពារ​ប្រទេស​ស.រ.អា.​ រ៉ូបឺត​ ហ្កេតស៍​ (Robert​ Gates)​ បាន​ព្រមាន​កាល​ពី​ខែ​មុន​ថា​ ក្នុង​ពេល​ប្រាំ​ឆ្នាំ​ខាង​មុខកូរ៉េ​ខាង​ជើង​នឹង​មាន​សមត្ថភាព​អាច​បាញ់​កាំជ្រួច​ផ្លោង​មួយ​បាន​មក​ដល់​ទ្វីប​អាមេរិក​ខាង​ជើង។

ក្រុង​ ព្យុងយាំង​ បាន​សាក​ល្បង​អាវុធ​នុយគ្លេអ៊ែរ​ពីរ​ ហើយ​បាន​និយាយ​ថា​ពួក​គេ​បាន​ប្តូរ​ជាតិ​ព្លុយទោន្ញោម​(plutonium)​ខ្លះ​របស់​ខ្លួន​ឲ្យ​ទៅ​ជា​សម្ភារៈ​គ្រាប់​បែក។​ គេ​ព្រួយ​បារម្ភ​ថា​ កូរ៉េ​ខាង​ជើង​មាន​គោល​បំណង​ចង់​ស្ថាបនា​គ្រាប់​បែក​នុយគ្លេអ៊ែរ​មួយដែល​អាច​ដាក់​ផ្អោប​នៅ​លើ​កាំជ្រួច​ផ្លោង​បាន។

ដោយ​មក​ពី​កន្លែង​បង្ហោះ​ថ្មី​នេះ​ស្ថិត​នៅ​ជិត​ប្រទេស​ចិន​ នៅ​តាម​ដង​ទន្លេ​លឿង​ ប្រទេស​ដទៃ​ទៀត​នឹង​មាន​ការ​លំបាក​ក្នុង​ការ​តាម​ដាន​ការ​សាក​ល្បង​មុន​ការ​បង្ហោះ​ និង​ការ​បង្ហោះ​ពិតៗ។

កូរ៉េ​ខាង​ជើង​មិន​ដែល​បាន​និយាយ​យោង​ជា​សាធារណៈ​អំពី​កន្លែង​បង្ហោះ​ថ្មី​នេះ​ទេ។​ តែ​ករណី​នេះ​អាច​ផ្លាស់​ប្តូរ​ នៅ​ពេល​ដែល​មេ​ដឹក​នាំ​ គិម​ ចុង​ អ៊ិល​ (Kim​ Jong​ Il)​ រៀប​ចំ​ផ្ទេរ​អំណាច​ទៅ​ឲ្យ​កូន​ប្រុស​លោក​ គិម​ ចុង​ អ៊ុន​ (Kim​ Jong​ Un)​ កាន់​កាប់​បន្ត។

ប្រទេស​កូរ៉េ​ខាង​ជើង​ដែល​ជា​ប្រទេស​ក្រី​ក្រ​មួយ​បាន​សន្យាថា​នឹង​ក្លាយ​ទៅ​ជា​ប្រទេស​ «រុង​រឿង​ដ៏​ខ្លាំង​មួយ»​ នៅ​ឆ្នាំ​ក្រោយ​នេះ។​ អ្នក​វិភាគ​ក្នុង​តំបន់​ខ្លះ​និយាយ​ថា​ ផ្នែក​មួយ​នៃ​យុទ្ធនាការ​នេះ​អាច​រួម​បញ្ចូល​ការ​ព្យាយាម​បាញ់​បង្ហោះ​កាំជ្រួច​បី​ដំណាក់​មួយ​គ្រឿង​ទៀត។​ ការ​ខំ​ខ្នះ​ខ្នែង​ពី​មុនៗ​បាន​ទទួល​បរាជ័យ។

ការ​បង្ហោះ​ចុង​ក្រោយ​ រួម​ជា​មួយ​ការ​សាក​ល្បង​នុយគ្លេអ៊ែរ​មួយ​ បាន​ធ្វើ​ក្នុង​ឆ្នាំ​ ២០០៩​ ដែល​បាន​ជំរុញ​ឲ្យ​អង្គការ​សហប្រជាជាតិ​ដាក់​ទណ្ឌកម្ម​ថ្មី​បន្ថែម​យ៉ាង​តឹង​រ៉ឹង​លើ​ក្រុង​ព្យុងយ៉ាំង៕

ប្រែ​សម្រួល​ដោយ​ កែរ យ៉ាន

XS
SM
MD
LG