ភ្ជាប់​ទៅ​គេហទំព័រ​ទាក់ទង

កាសែត​ថ្មី​មួយ​​បាន​ចេញ​ផ្សាយ​​ក្នុង​ប្រទេស​អាហ្រ្វិក​ខាង​ត្បូង


ម្ចាស់តូបលក់បារីនេះ អានកាសែត «សម័យ​កាល​ថ្មី​» ដែល​ទើប​នឹង​ចាប់ផ្តើម​ចេញ​ផ្សាយ។

កាសែត​ថ្មី​មួយ​ បាន​ចាប់​ផ្តើម​ចេញ​ផ្សាយ​កាល​ពីថ្ងៃ​ច័ន្ទ​សប្តាហ៍​មុននៅ​ក្នុង​ប្រទេស​អាហ្រ្វិក​ខាង​ត្បូង។ ​កាសែត​ដែល​មាន​ឈ្មោះ​ថា ​«សម័យ​កាល​ថ្មី​» កាន់​កាប់​ដោយគ្រួសារ​មួយ​ដែល​ត្រូវ​បាន​គេ​និយាយ​ថា ​មាន​ទំនាក់​ទំនង​ជិត​ស្និទ្ធ​ជាមួយ​នឹង​ប្រធានា​ធិបតី​អាហ្រ្វិក​ខាង​ត្បូង​ ចាកូប ហ្សូម៉ា (Jacob Zuma) ​ប៉ុន្តែ​និពន្ធ​នាយក​នៃ​កាសែត​នេះ​និយាយ​ថា ​ការ​ចេញ​ផ្សាយ​ប្រចាំ​ថ្ងៃ​នឹង​មាន​លក្ខណៈ​ឯករាជ្យ។

ការ​ចេញ​ផ្សាយ​លើក​ទី​មួយ​នៃ​កាសែត​«​សម័យ​កាល​ថ្មី» ​បាន​លក់​ដាច់​យ៉ាង​ឆាប់​រហ័ស​នៅ​ក្នុង​រយៈ​ពេល​ប៉ុន្មាន​ម៉ោង​ដំបូង​នៅ​តាម​ផ្លូវ​នានា។​ ការ​ចេញ​ផ្សាយ​ក្នុង​ទម្រង់​អេឡិច​ត្រូ​និក​ ក៏​បាន​ចាប់​ផ្តើម​ផង​ដែរ​នៅ​តាម​ប្រព័ន្ធ​អ៊ីន​ធឺណែត។

នាយក​ប្រតិបត្តិ​ដែល​ទើប​ចូល​កាន់​មុខ​ដំណែង​ លោក​ ណាហ្សីម​ ហូវ៉ា (Nazeem Howa) បានប្រាប់វីអូអេ​ថា​ ដើម្បី​ឱ្យ​កាសែត​នេះ​ទទួល​បាន​ជោគ​ជ័យ​ផ្នែក​ហិរញ្ញវត្ថុ​ គឺ​ត្រូវ​រក្សា​គោល​ការណ៍បោះ​ពុម្ព​ផ្សាយឯក​រាជ្យ។

«គោល​នយោ​បាយ​នៃ​ការ​បោះ​ពុម្ព​ផ្សាយ​របស់​យើង​គឺ​ពិត​ជា​ការ​បន្ត​និរន្តរ​ភាព​ ហើយ​និរន្តរ​ភាព​មាន​ន័យ​ថា​យើង​ត្រូវ​តែ​ទាក់ទាញអ្នក​អាន។ ហើយ​ប្រសិន​បើ​យើង​ចង់​ទាក់​ទាញ​អ្នក​អាន យើង​ត្រូវ​តែមាន​លទ្ធ​ភាព ក្នុង​ការ​ធ្វើ​ឱ្យព័ត៌មានជាប់​ទាក់​ទង​នឹង​អ្នក​អាន។ យើង​ត្រូវ​តែ​ធ្វើ​ឱ្យ​គេទុក​ចិត្ត​យើង។ យើង​ត្រូវ​តែ​ឯក​រាជ្យ»។

កាសែត​នេះ​កាន់​កាប់​ដោយ​ក្រុម​ហ៊ុន​ Gupta Group ​ដែល​ដំណើរ​ការ​រក​ស៊ី​ដោយ​គ្រួសារ​ពាណិជ្ជករ​មួយ ​ដែល​មាន​ដើម​កំណើត​មក​ពី​ប្រទេស​ឥណ្ឌា។ គេនិយាយ​ថា​ ក្រុម​នេះ​មាន​ទំនាក់​ទំនង​ជិត​ស្និទ្ធ​ជាមួយ​នឹង​ប្រធានា​ធិបតី​អាហ្រ្វិក​ខាង​ត្បូង ចាកូប​ ហ្សូម៉ា។ ប្រការ​នេះ​ បាន​នាំ​ទៅ​ដល់​ការ​សង្ស័យថា កាសែត​នេះ​នឹង​ធ្វើ​ការ​ប្រឆាំង​តប​ទៅ​នឹង​ការ​រិះ​គន់ចំពោះ​លោក​ប្រធានា​ធិបតី​ ហ្សូ​ម៉ា និង​គណ​បក្ស​កាន់​អំណាច​ដែល​មាន​ឈ្មោះ​ថា សមាជ​ជាតិ​អាហ្រ្វិក។

និពន្ធ​នាយក​លោក​ Henry Jeffreys នៅ​ក្នុង​សារ​មួយ​ទៅ​កាន់​អ្នកអាន និយាយ​ថា កាសែត​នេះ​នឹង​មិន​លម្អៀង​ទៅ​កាន់​គណបក្ស​ ឬ​ក្រុម​នយោ​បាយ​ណា​មួយ​ទេ។ លោក​និយាយ​ថា​កាសែត​នេះ​ នឹង​ព្យាយាមធ្វើ​ការ​រិះ​គន់​ប្រកប​ដោយ​ការ​ស្ថាបនា​ ហើយ​នឹង​ធ្វើ​ការ​ដាក់​បង្ហាញអំពី​រដ្ឋាភិ​បាល​អាក្រក់​ ពាណិជ្ជ​កម្ម​អាក្រក់​ និង​អំពើ​ពុក​រលួយ​នៅ​កន្លែង​ណា​ដែល​រឿង​ទាំង​នេះ​កើត​មាន​ឡើង។

លោក ហូវ៉ា ​និយាយ​ថា ជា​ប្រវត្តិ​សាស្រ្ត ​សារព័ត៌មាន​នៅ​ក្នុង​ប្រទេស​អាហ្រ្វិកខាង​ត្បូង​ ត្រូវ​បាន​គ្រប់​គ្រង​ដោយក្រុម​ហ៊ុន​សំខាន់ៗ​មួយ​ចំនួន​តូច​ដែល​បង្ករ​ជា​បញ្ហា​ប្រឈម​មួយ​សម្រាប់ការ​បោះ​ពុម្ព​ផ្សាយ​ថ្មីៗ។

«ខ្ញុំ​គិត​ថា​យើង​គឺ​ជា​ជន​រង​គ្រោះ​ ចំពោះ​ការ​កំណត់​តួនាទី​ឱ្យ​យើង​ដោយ​សារ​កាសែត​ទាំង​អស់​នោះ។​ អ្វី​ដែល​ពួក​គេ​បាន​ព្យាយាមធ្វើ គឺ​ការ​ចាត់​ទុក​យើង​ ថា​ស្និទ្ធ​ជាមួយ​នឹង​គណ​បក្ស​សមាជ​ជាតិ​អាហ្រ្វិក ឬ​មាន​ការ​បើក​ទូលាយ​ខ្លាំង​ពេកក្នុង​ការ​ដាក់​ឥទ្ធិពល។ ហើយ​តាម​ពិត​ទៅ​ ខ្ញុំ​គិត​ថា​ យើង​ផ្ទុយ​ពី​នេះ​ទាំង​អស់»។

លោក​និយាយ​ថា​ ភស្តុតាង​នៃ​ឯក​រាជ្យ​ភាព​របស់​កាសែត​លោក​ គឺ​ស្ថិត​នៅ​ក្នុង​ខ្លឹម​សារ​នៃ​ការ​ផ្សាយរបស់កាសែត​នោះ។

«ខ្ញុំ​នឹង​អញ្ជើញ​អ្នក​ណា​ក៏​បានដែ​រ ឱ្យពិនិត្យ​មើល​កាសែត​នា​ពេល​ព្រឹក​នេះ​ហើយ​បង្ហាញ​យើង​ថា​ ចំណុច​ណាដែល​យើង​បាន​សង្កត់​ធ្ងន់​ទៅ​លើ​គណ​បក្សណា​មួយ ឬ​ខ្សែ​បន្ទាត់​នយោ​បាយណា​មួយ។ យើង​នឹង​ផលិត​កាសែត​ដ៏ល្អ​មួយ។ យើង​នឹងធ្វើ​ការ​ប្រកប​ដោយ​យុត្តិ​ធម៌។ យើងនឹង​មិន​លម្អៀង»។

កាសែត​នេះ ​គ្រោងចេញ​ផ្សាយ​នៅ​ក្នុង​ខែ​កញ្ញា​កន្លង​ទៅ ​ប៉ុន្តែ​ត្រូវ​បាន​ពន្យា​ពេល​មក​វិញ។ គម្រោង​ចេញ​ផ្សាយជា​លើក​ទី​ពីរ​ដែលគ្រោង​ធ្វើ​ឡើងនៅ​ក្នុង​ខែ​តុលា​ ក៏​ត្រូវ​បាន​ពន្យា​ពេល​ផង​ដែរ​ ដោយ​សារ​បុគ្គលិក​ជាន់​ខ្ពស់​៥​រូប​ ដែល​រួម​ទាំង​និពន្ធ​នាយក​ផង​បាន​លា​លែង​ចេញ​ពី​ដំណែង។ មិន​មាន​ហេតុ​ផល​ណា​មួយ​ត្រូវ​បាន​ផ្តល់​ឱ្យនោះ​ទេ។

ការ​ចេញ​ផ្សាយ​កាលពីថ្ងៃ​ច័ន្ទរួម​បញ្ចូល​អត្ថ​បទ​មួយ​ចំនួន ស្តី​អំពី​នយោ​បាយ​និង​ពាណិជ្ជ​កម្ម​នៅ​ថ្នាក់​ជាតិ ថ្នាក់​មូលដ្ឋាន និង​ថ្នាក់អន្តរ​ជាតិ គឺ​មាន​លក្ខណៈ​ប្រហាក់​ប្រហែល​ទៅ​នឹង​កាសែត​ប្រចាំ​ថ្ងៃ​ផ្សេងៗ​ទៀត​ដែរ។ ផ្នែក​ទស្សនៈ ​រួម​មានអត្ថបទ​ស្តី​អំពី​ជម្ងឺអេដស៍​ អំពើ​ហិង្សា​ប្រឆាំង​នឹង​ស្រ្តី​ និង​ការ​ធ្លាក់​ចុះ​នូវ​សីលធម៌។

លោក​ ហូវ៉ា​ បាន​ទទួល​ស្គាល់​ថា ​កាសែត​នេះ​បាន​ចាប់​ផ្តើម​ចេញ​ផ្សាយ​ នៅ​ក្នុង​បរិយាកាស​សេដ្ឋ​កិច្ច​ដ៏​លំបាក​មួយ ​ដោយសារ​ការ​ធ្លាក់​ចុះ​នៃ​ប្រាក់​ចំណូល​ ដែល​បាន​មក​ពី​ការ​ផ្សព្វ​ផ្សាយ​ពាណិជ្ជ​កម្ម តម្រូវ​ឱ្យកាសែត​មួយ​ចំនួន​ ត្រូវ​កាត់​បុគ្គ​លិក​និង​ចំនួន​ទំព័រ។

ប៉ុន្តែ​ លោក​និយាយ​ថា បញ្ហា​នេះ​នឹង​តម្រូវ​ឱ្យគណៈ​គ្រប់​គ្រង​ ដឹក​នាំ​ការ​បោះ​ពុម្ព​ផ្សាយ​ប្រកប​ដោយ​ប្រសិទ្ធ​ភាព​ ដែល​លោក​និយាយ​ថា ​ចុង​ក្រោយនឹង​ធានា​បាន​នូវ​ភាព​ជោគ​ជ័យ​របស់​ខ្លួន៕

ប្រែសម្រួល ដោយ ឌី ខាំ​បូលី

XS
SM
MD
LG