ភ្ជាប់​ទៅ​គេហទំព័រ​ទាក់ទង

ប្រធានាធិបតី​ថ្មី​របស់​ប្រទេស​ហ្គំប៊ី​នឹង​ត្រឡប់​មក​កាន់​ប្រទេស​វិញ​ក្រោយ​មាន​វិបត្តិ​នយោបាយ


លោក​ប្រធានាធិបតី​ហ្គំប៊ី​ លោក Adama Barrow ផ្តល់​បទ​សម្ភាសន៍​ជាមួយ​នឹង​ VOA ក្នុង​ប្រទេស​សេណេហ្គាល់ កាលពី​ថ្ងៃទី២២ ខែមករា ឆ្នាំ២០១៧។

ប្រធានាធិបតី​ដែល​ទើប​តែ​ជាប់​ឆ្នោត​ថ្មី​របស់​ប្រទេស​ហ្គំប៊ី​ លោក Adama Barrow នឹង​វិល​ត្រឡប់​មក​កាន់​ប្រទេស​ហ្គំប៊ី​វិញ​នៅ​ថ្ងៃ​ព្រហស្បតិ៍​នេះ បន្ទាប់​ពី​លោក​បាន​ភៀស​ខ្លួន​ចេញ​ពីប្រទេស​កាលពី​ដើម​ឆ្នាំ​នេះ ដោយ​លោក​បារម្ភ​ពី​សុវត្ថិភាព​របស់​លោក នេះ​បើ​យោង​តាម​ការ​ថ្លែង​របស់​ក្រុម​មន្ត្រី។

លោក Barrow ឈ្នះ​ឆ្នោត​លើ​មេដឹកនាំ​ដ៏​យូរ​អង្វែង​របស់​ប្រទេស​ហ្គំប៊ី​គឺ​លោក Yahya Jammeh នៅ​ក្នុង​ការ​បោះឆ្នោត​ជាតិ​កាលពី​ខែ​ធ្នូ ប៉ុន្តែ​លោក Jammeh បដិសេធ​មិន​ទទួល​ស្គាល់​លទ្ធផល​ឆ្នោត​ដោយ​លើក​ឡើង​ពី​ភាព​មិន​ប្រក្រតី​នៅ​ក្នុង​ការ​បោះឆ្នោត រហូត​ដល់​សប្តាហ៍​មុន​ទើប​លោក​ទទួល​ស្គាល់។

លោក Jammeh បាន​ចាកចេញ​ពី​ប្រទេស​ហ្គំប៊ី​ កាលពី​ថ្ងៃ​សៅរ៍​ ក្រោយ​ពេល​ដែល​បណ្តា​នានា​នៅ​តំបន់​អាហ្វ្រិក​ខាង​លិច គំរាម​លូក​ដៃ​ចូល​ទៅ​ក្នុង​រឿង​នេះ​ដោយ​ប្រើ​ប្រាស់​កម្លាំង​យោធា​ប្រសិន​បើ​លោក​មិន​ផ្ទេរ​អំណាច​នោះ។ ការ​ចាកចេញ​របស់​លោក Jammeh គឺ​ជា​ការ​បញ្ចប់​របប​គ្រប់​គ្រង​រយៈ​ពេល​២២ឆ្នាំ ដែល​លោក​ត្រូវ​បាន​ក្រុម​ការពារ​សិទ្ធ​មនុស្ស​ចោទ​ប្រកាន់​ថា​បាន​ប្រើ​ប្រាស់​ហិង្សា​ដើម្បី​គាប​សង្កត់​គណបក្ស​ប្រឆាំង។

កង​កម្លាំង​ក្នុង​តំបន់​បាន​ចូល​ទៅ​កាន់​ប្រទេស​ហ្គំប៊ី​ រយៈ​ពេល​ប្រហែល​មួយ​សប្តាហ៍​ ដោយ​សារ​តែ​លោក Jammeh បដិសេធ​មិន​ចុះ​ចេញ​ពី​តំណែង ហើយ​ឥឡូវ​នេះ​កង​កម្លាំង​ទាំង​នោះ​កំពុង​តែ​ការពារ​សន្តិសុខ​សម្រាប់​ការ​វិល​ត្រឡប់​របស់​លោក Barrow នៅ​ថ្ងៃ​ព្រហស្បតិ៍​នេះ។

ប្រធានាធិបតី​ថ្មី​រូប​នេះ​បាន​ស្នើសុំ​ឲ្យ​កង​កម្លាំង​សន្តិសុខ​បរទេស​បន្ត​ស្ថិត​នៅ​ក្នុង​ប្រទេស​ហ្គំប៊ី​ នៅ​៦ខែ​បន្ត​ទៅ​ទៀត ប៉ុន្តែ​ក្រុម​ទាំង​នេះ​មិន​ទាន់​បាន​សម្រេច​ចិត្ត​ថា​នឹង​បន្ត​ស្ថិត​នៅ​ក្នុង​ប្រទេស​នេះ​ទៀត​ឬ​យ៉ាង​ណា​នោះ​ទេ។

លោក Barrow បាន​ស្បថ​ចូល​កាន់​តំណែង​នៅ​ក្នុង​ស្ថានទូត​ហ្គំប៊ី​ ក្នុង​ប្រទេស​សេណេហ្គាល់​កាលពី​សប្តាហ៍​មុន កន្លែង​ដែល​លោក​បាន​ស្នាក់​នៅ​ចាប់​តាំង​ពី​ពេល​ដែល​លោក​បាន​ភៀស​ខ្លួន​ចេញ​ពី​ប្រទេស​របស់​លោក៕

XS
SM
MD
LG