ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

ភាពយន្ត​ថ្មី​មួយ​បង្ហាញ​ពី​ប្រវត្តិសាស្ត្រ​កម្ពុជា​តាមរយៈ​បទចម្រៀង​របស់​លោក ស៊ីន ស៊ីសាមុត


តួសម្តែងនៅក្នុងរឿង«តន្រ្តីជីវិត» ដែលនិយាយអំពីគ្រួសារខ្មែរមួយពីទសវត្សរ៍១៩៦០ដល់ទសវត្សរ៍២០០០ ដោយប្រើប្រាស់ចម្រៀងបទ«ចំប៉ាបាត់ដំបង»របស់អធិរាជសំឡេងមាស ស៊ីន ស៊ីសាមុត។ (រូបថតពីហ្វេសប៊ុក)
តួសម្តែងនៅក្នុងរឿង«តន្រ្តីជីវិត» ដែលនិយាយអំពីគ្រួសារខ្មែរមួយពីទសវត្សរ៍១៩៦០ដល់ទសវត្សរ៍២០០០ ដោយប្រើប្រាស់ចម្រៀងបទ«ចំប៉ាបាត់ដំបង»របស់អធិរាជសំឡេងមាស ស៊ីន ស៊ីសាមុត។ (រូបថតពីហ្វេសប៊ុក)

ខ្សែភាពយន្ត​ថ្មី​មួយ​ដែល​និយាយ​អំពី​បទចម្រៀង​របស់​អធិរាជ​សំឡេង​មាស លោក ស៊ីន ស៊ីសាមុត និង​ក្រុម​គ្រួសារ​ខ្មែរ​មួយ​ដែល​មាន​បី​ជំនាន់ នឹង​ត្រូវ​ចាក់​បញ្ចាំង​ជា​លើក​ដំបូង​នៅ​ទីក្រុង Los Angeles រដ្ឋ California នៅ​ដើម​ខែ​ឧសភា​ខាង​មុខ​នេះ នៅ​ក្នុង​មហោស្រព​ភាពយន្ត​ដ៏​ធំ​មួយ​នៅ​សហរដ្ឋអាមេរិក។

ខ្សែ​ភាពយន្តមួយ​ដែល​មាន​ចំណងជើង​ថា “In the Life of Music” ឬ​ជា​ភាសា​ខ្មែរ​ហៅ​ថា «តន្ត្រី​ជីវិត» និយាយ​អំពី​រឿងរ៉ាវ​របស់​គ្រួសារ​ខ្មែរ​មួយ​ពី​ទសវត្សរ៍​១៩៦០​ដល់​ទសវត្សរ៍​២០០០ ដោយ​ប្រើប្រាស់​បទចម្រៀង​ដ៏​ល្បីល្បាញ​មួយ​បទ​នៅ​ទសវត្សរ៍​១៩៦០។

ខ្សែភាពយន្ត​ដែល​ដឹកនាំ​សម្តែង​ដោយ​អ្នកស្រី Caylee So និង​លោក សុខ វិសាល ​នេះ​នឹង​ដាក់​បញ្ចាំង​នៅ​ក្នុង​មហោស្រព​ភាពយន្ត​អាស៊ី​ប៉ាស៊ីហ្វិក​នៅ​ទីក្រុង Los Angeles (Los Angeles Asian Pacific Film Festival) ប្រចាំ​ឆ្នាំ​លើក​ទី​៣៤​ នៅ​ថ្ងៃ​ទី​៥ ខែ​ឧសភា នៅ​ឯ​រោងភាពយន្ត Aratani Theatre ក្នុង​ទីក្រុង Los Angeles រដ្ឋ California។ មហោស្រព​ភាពយន្ត​នេះ​នឹង​ប្រព្រឹត្ត​ទៅ​ចាប់​ពី​ថ្ងៃ​ទី​៣ដល់​ថ្ងៃ​ទី​១២ខែ​ឧសភា​ខាង​មុខ​នេះ។

បទចម្រៀង «ចំប៉ា​បាត់ដំបង» នៅ​ក្នុង​ភាពយន្ត​នេះ គឺ​ជា​បទ​ដែល​ច្រៀង​និង​និពន្ធ​ឡើង​ដោយ​តារា​ចម្រៀង​លំដាប់​កំពូល​នៅ​ក្នុង​ប្រទេស​កម្ពុជា លោក ស៊ីន ស៊ីសាមុត។ លោក​ ស៊ីន ស៊ីសាមុត ទទួល​បាន​ការ​គាំទ្រ​យ៉ាង​ខ្លាំង​នៅ​ក្នុង​ទសវត្សរ៍​១៩៥០​និង​ពាក់​កណ្តាល​ទសវត្សរ៍​១៩៧០ ប៉ុន្តែ​លោក​បាន​បាត់ដំណឹង​សូន្យ​ឈឹង​នៅ​ក្នុង​របប​ប្រល័យ​ពូជសាសន៍​ខ្មែរ​ក្រហម។

អ្នកស្រី Caylee So បាន​ថ្លែង​ប្រាប់ VOA ថា ខ្សែ​ភាពយន្ត​ថ្មី​នេះ​គឺ​និយាយ​អំពី​ក្តី​ស្រឡាញ់​និង​គ្រួសារ​ដែល​ឆ្លង​កាត់​សង្គ្រាម​និង​ទុក្ខលំបាក​នានា។

អ្នកស្រី Caylee So វ័យ​៣៦​ឆ្នាំ ​ដែល​ជា​ផលិតករ​ខ្សែភាពយន្ត​អាមេរិកាំង​ដើម​កំណើត​ខ្មែរ​បាន​មាន​ប្រសាសន៍​ថា៖

«ខ្ញុំ​ចង់​និយាយ​ពី​រឿងរ៉ាវ​ទាំង​អស់​តែ​ម្តង មិន​មែន​និយាយ​តែ​ពី​សង្គ្រាម​ឬ​និយាយ​តែ​ពី​ឥទ្ធិពល​នៃ​សង្គ្រាម​ទៅ​លើ​ឪពុក​ម្តាយ​យើង​នោះ​ទេ ប៉ុន្តែ​ខ្ញុំ​ចង់​និយាយ​ពី​រឿង​រ៉ាវ​ជីវិត​នៅ​មុន​សម័យ​សង្គ្រាម​និង​សង្គម​ជីវិត​នៅ​មុន​ពេល​សង្គ្រាម​បាន​កើត​ឡើង។»

អ្នកស្រី Caylee So បាន​និយាយ​ថា បទចម្រៀង​«ចំប៉ា​បាត់ដំបង»​នេះ មាន​អត្ថន័យ​ជ្រាលជ្រៅ​ណាស់​សម្រាប់​ប្រជាពលរដ្ឋ​ខ្មែរ។

អ្នកស្រី​បាន​ថ្លែង​ថា៖ «យើងទទួល​បាន​ការ​ជំរុញ​លើកទឹក​ចិត្ត​ឲ្យ​ផលិត​ខ្សែភាពយន្ត​នេះ​ឡើង​ដោយសារ​តែ​បទចម្រៀង​នេះ។ ពលរដ្ឋ​ខ្មែរ​គ្រប់​ជំនាន់​ដឹង​ពី​បទចម្រៀង​នេះ ទោះ​បី​ជា​ពួកគេ​មិន​ដឹង​ថា បទចម្រៀង​នេះ​មាន​ដើម​កំណើត​ពី​ណា​ក៏​ដោយ។ ពួកគេ​មិន​ដឹង​នៅ​ទីណា​ទេ នៅ​ពេល​ដែល​បទចម្រៀង​នេះ​ត្រូវបាន​គេ​និពន្ធ​ឡើង​ឬ​ច្រៀង​នោះ​។» ​

លោក សុខ វិសាល ដែល​ស្ថិត​ក្នុង​វ័យ​ជាង​៤០​ឆ្នាំ​នោះ គឺ​ជា​ផលិតករ​ខ្សែភាពយន្ត​នៅ​ក្នុង​រាជធានី​ភ្នំពេញ។ លោក​គឺ​ជា​ស្ថាបនិក​និង​ជា​នាយក​ច្នៃប្រឌិត​នៃ​ក្រុមហ៊ុន 802AD Productions ដែល​ជា​ក្រុមហ៊ុន​ផលិត​ខ្សែភាពយន្ត កម្មវិធី​ទូរទស្សន៍ វីដេអូ​ចម្រៀង និង​វីដេអូ​ផ្សាយ​ពាណិជ្ជកម្ម​លើ​កញ្ចក់​ទូរទស្សន៍​ក្នុង​ប្រទេស​កម្ពុជា។ ស្នាដៃ​ដឹកនាំ​ខ្សែ​ភាពយន្ត​មុនៗ​របស់​លោក រួម​មាន​រឿង​គ្រាប់ពេជ្រ រឿង Jailbreak និង​រឿង Poppy Goes to Hollywood ​ជាដើម​។

រឿង«តន្រ្តីជីវិត» និយាយអំពីគ្រួសារខ្មែរមួយពីទសវត្សរ៍១៩៦០ដល់ទសវត្សរ៍២០០០ ដោយប្រើប្រាស់ចម្រៀងបទ«ចំប៉ាបាត់ដំបង»របស់អធិរាជសំឡេងមាស ស៊ីន ស៊ីសាមុត។ (រូបថតពីហ្វេសប៊ុក)
រឿង«តន្រ្តីជីវិត» និយាយអំពីគ្រួសារខ្មែរមួយពីទសវត្សរ៍១៩៦០ដល់ទសវត្សរ៍២០០០ ដោយប្រើប្រាស់ចម្រៀងបទ«ចំប៉ាបាត់ដំបង»របស់អធិរាជសំឡេងមាស ស៊ីន ស៊ីសាមុត។ (រូបថតពីហ្វេសប៊ុក)

អ្នកស្រី Caylee So គឺ​ជា​សហ​ស្ថាបនិក​នៃ​មហោស្រព​ភាពយន្ត​ក្រុង​ខ្មែរ (Cambodia Town Film Festival) ប្រចាំ​ឆ្នាំ​ ក្នុង​ទីក្រុង Long Beach រដ្ឋ California។ ស្នាដៃ​ដឹកនាំ​ខ្សែ​ភាពយន្ត​មុនៗ​របស់អ្នកស្រីរួម​មាន​រឿង “Paulina” ដែលនិយាយ​ពី​យុវតី​អាមេរិកាំង​ដើម​កំណើត​ខ្មែរ​ម្នាក់ ​ដែល​ក្លាយ​ជា​មនុស្ស​វក់​នឹង​ល្បែង​នៅ​ក្នុង​សហគមន៍​ខ្មែរ​អាមេរិកាំង​ដែល​នាង​ធំធាត់​ឡើង​នៅ​ប៉ែក​ខាង​ត្បូង ​រដ្ឋ California។​

អ្នកស្រី Caylee So ចូល​បម្រើកងទ័ព Virginia National Guard របស់​អាមេរិក​ និង​ត្រូវ​បាន​បញ្ជូន​ទៅ​បំពេញ​បេសកកម្ម​នៅ​ប្រទេស អ៊ីរ៉ាក់ ក្រោយ​ពី​អ្នកស្រី​រៀន​ចប់​វិទ្យាល័យ​នៅ​រដ្ឋ Virginia។ បន្ទាប់​មក​អ្នកស្រី​បាន​សិក្សា​ផ្នែក​ផលិត​ខ្សែភាពយន្ត​នៅ​ក្នុង​រដ្ឋ California។

ភាពយន្ត​ដែល​និយាយ​ភាសាខ្មែរ​និង​មាន​អក្សរ​រត់​ពីក្រោម​ជា​ភាសា​អង់គ្លេស​និង​មាន​រយៈពេល​៩២​នាទី​នេះ ត្រូវ​បាន​ថត​នៅ​ក្នុង​ប្រទេស​កម្ពុជា​កាល​ពី​ឆ្នាំ​២០១៦។

ភាពយន្ត​ខ្មែរ​មួយ​ទៀត ដែល​មាន​ចំណងជើង​ថា ​«អង្គការ» ក៏​នឹង​ត្រូវ​ចាក់​បញ្ចាំង​នៅ​ក្នុង​មហោស្រព​ភាពយន្ត​អាស៊ី​ប៉ាស៊ីហ្វិក​នៅ​ទីក្រុង Los Angeles ​នេះ​ផង​ដែរ។

ភាពយន្ត​នេះ​គឺ​ជា​ភាពយន្ត​ខ្នាត​វែង​ទី​មួយ​របស់​អ្នកនាង Neary Adeline Hay ដែល​ជា​ជនជាតិ​បារាំង​ដើម​កំណើត​ខ្មែរ។ ភាពយន្ត ​«អង្គការ» និយាយ​អំពី​អ្នក​រស់រាន​មាន​ជីវិត​ពី​របប​ខ្មែរ​ក្រហម​ ហើយ​ត្រូវ​ប្រឈម​នឹងជន​ដៃដល់​ក្នុង​រយៈពេល​ប៉ុន្មាន​ឆ្នាំ​ក្រោយ​មក។ អ្នកនាង Neary Adeline Hay មាន​កំណើត​នៅ​ក្នុង​ប្រទេស​កម្ពុជា​កាល​ពី​ឆ្នាំ​១៩៨១ ហើយ​បានទៅ​រស់នៅ​និង​សិក្សា​មុខវិជ្ជា​ផលិត​ភាពយន្ត​នៅ​ក្នុង​ប្រទេស​បារាំង។ ​

ភាពយន្ត “In the Life of Music"សម្តែង​ដោយ​អ្នកនាង Ellen Wong ​ដែល​ជា​តារាសម្តែង​ជនជាតិ​កាដាណា​ដើម​កំណើត​ខ្មែរ និង​លោក អាន ចនផន ដែល​ជា​សហស្ថាបនិក​អង្គការ​សិល្បៈ​ខ្មែរ​អមតៈ ដែល​ជា​អង្គការ​មិន​ស្វែងរក​ប្រាក់​កម្រៃ​មួយ​បង្កើត​ឡើង​ដើម្បី​ស្តារ​សិល្បៈ​ខ្មែរ​គ្រប់​ទម្រង់​ទាំងអស់។

អ្នកស្រី Caylee So បាន​និយាយ​ថា គំនិតផលិត​ខ្សែភាពយន្ត​នេះ​គឺ​ផ្តួចផ្តើម​ចេញ​ពី​ពេល​ដែល​អ្នកស្រី​បាន​ទៅ​ប្រទេស​កម្ពុជា​កាល​ពី​ឆ្នាំ​២០១៥។

អ្នកស្រី Caylee So បាន​ថ្លែង​ថា៖ «គំនិត​ផលិត​ខ្សែភាពយន្ត​នៅ​កម្ពុជា​គឺ​ជា​អ្វី​ដែល​ខ្ញុំ​ត្រូវ​តែ​ធ្វើ ដោយ​សារ​តែ​ទិដ្ឋភាព​នៅ​ទីនោះ​គឺ​ស្អាត​ខ្លាំង​ណាស់ ហើយ​ប្រជាជន​ខ្មែរ​ក៏​ស្រស់ស្អាត​ខ្លាំង​ដែរ។ រឿងរ៉ាវ​នៅ​ទីនោះ​មាន​ច្រើន​ណាស់ ប៉ុន្តែ​គ្មាន​នរណា​ម្នាក់​និយាយ​អំពី​វា​អស់​នៅ​ឡើយ​ទេ៕»

XS
SM
MD
LG