ភ្ជាប់​ទៅ​គេហទំព័រ​ទាក់ទង

ផ្លូវ​អយស្ម័យាន​ដឹក​អ្នកដំណើរឥណ្ឌា​ទទួល​វិញ្ញាបនប័ត្រ​បន្ថយ​ឧស្ម័នការបោន​ឌីអុកស៊ីដ​


ក្រុម​មន្ដ្រី​រថ​ភ្លើង​​ក្រោម​ដី​ដេលី​​ដើរ​មើល​ស្ថានីយ​រថ​ភ្លើង​​ក្រោម​​ដី​សម្រាប់​ជូន​មន្ដ្រី​រដ្ឋាភិបាល​ទីក្រុង​ញូដេលី​​​ នៅ​ពិធី​សម្ពោធន៍​មួយនៅ​ស្ថានីយ​រថភ្លើង​ក្រោម​ដី​នៅ​ទី​ក្រុង​ញូ​ដេលី​​​ប្រទេស​ឥណ្ឌា​ នៅ​ថ្ងៃ​ទី​១៧​ខែ​កញ្ញា​​ឆ្នាំ​២០០២។​

ប្រព័ន្ធ​ផ្លូវ​អយស្ម័យាន​ដឹក​អ្នកដំណើរ​រស់​នៅ​ក្នុង​រដ្ឋធានី​នៃ​ប្រទេស​ឥណ្ឌា​ បាន​ក្លាយ​ទៅ​ជា​បណ្ដាញ​ ផ្លូវ​អយស្ម័យានទីមួយ​នៃ​ពិភពលោក​ ដែល​នឹង​ទទួល​វិញ្ញាបនប័ត្រ​របស់​អ.ស.ប. ​ស្ដី​ពី​ការ​កាត់ទទួល​វិញ្ញាបនប័ត្របន្ថយ​ឧស្ម័ន ​ការបោន​ឌីអុកស៊ីដ ​(carbone dioxide) ​សម្រាប់​ការ​ជួយ​កាត់​បន្ថយ​ការ​បញ្ចេញ​ឧស្ម័នធ្វើឲ្យ​ផែន​ដី​ឡើង​ក្ដៅ។ ​អ្វី ​ដែល​គេ​ហៅ​ថា​ រថ​ភ្លើងក្រោម​ដី​ ដេ​លី​ (Delhi Metro)​ បាន​ក្លាយ​ទៅ​ជា​ប្រព័ន្ធ​ដឹកជញ្ជូនមាន​ប្រជាប្រិយភាព​ នៅ​ក្នុងដំណើរប្រតិបត្ដិការ​របស់​ខ្លួន​ចំនួន​៩​ឆ្នាំ។

សេចក្ដី​ថ្លែងការណ៍​របស់​អ.ស.ប.​មួយ​ឲ្យ​ដឹង​ថា​ ប្រព័ន្ធផ្លូវ​អយស្ម័យាន​លឿន​នៃ​ទីក្រុង​ញូដេលី (New Delhi)​ ​បាន​កាត់​បន្ថយ​ការ​បញ្ចេញ​ឧស្ម័ន​ អាក្រក់​ហើយ​នឹង​កម្រិត​ខ្យល់កខ្វក់​ ធ្វើ​ឲ្យ​មាន​គ្រោះថ្នាក់​ នៅ​ក្នុង​ទីក្រុង​នេះ​ ដល់​ទៅ​ចំនួន ​៦៣​ម៉ឺន​តោន​ក្នុង​មួយ​ឆ្នាំ។

នេះ​បណ្ដាល​មក​ពី​ការប្រើ​ហ្វ្រាំង​ ដែល​ជួយ​ សន្សំ​ថាមពល​ជិត​ដល់​ទៅ​៣០​ភាគ​រយ​ ដោយធ្វើ​ឲ្យ​រថភ្លើងបន្ថយ​ល្បឿន​ ហើយ​រក្សា​ទុក​ថាមពល​សម្រាប់​ប្រើ​លើក​ក្រោយ​ឬ​ភ្លាមៗ​បើ​ត្រូវ​ការ។

រថ​ភ្លើងក្រោម​ដី​ ដេលីបាន​ត្រូវ​បង្កើត​ឡើង​នៅ​ឆ្នាំ​២០០២​ នៅ​ក្នុង​ទីក្រុង​ដែល​មាន​ពលរដ្ឋ​ប្រមាណ​ ១៤​ លាន​នាក់។​ រថ​ភ្លើងក្រោម​ដី​ មួយ​ផ្នែក​បើក​បរ​នៅ​ក្រោម​ដី​ហើយ​មួយ​ផ្នែក​ទៀត​ បើក​បរ​នៅ​លើ​ផ្លូវ​ដែក​លើ​ដីខ្ពស់​ កាត់​តាម​តំបន់​មាន​មនុស្ស​កុះករ​ជាង​គេ​នៃ​ទី​ក្រុង​នោះ។​ រថ​ភ្លើងក្រោម​ដី​នេះ​ដឹក​នាំ​អ្នក​ដំណើរ​ប្រមាណ​ពីរ​លាន​នាក់​ក្នុង​មួយ​ថ្ងៃ។

វិញ្ញាបនប័ត្រ​ស្ដី​ពី​ការ​កាត់​បន្ថយ ជាតិការបោន​ឌីអុកស៊ីដ​ដែល​បណ្ដាញ​ផ្លូវ​អយស្ម័យាននេះ​បាន​ទទួល​នឹង​ផ្ដល់​ប្រាក់​៩លាន​កន្លះ​ដុល្លារ​ក្នុង​មួយ​ឆ្នាំៗ​សម្រាប់​រយ:​ពេល​ប្រាំពីរ​ឆ្នាំ​ខាង​មុខ​នេះ។

មាន​តែ​ប្រព័ន្ធ​ដឹកជញ្ជូន​សាធារណ:​មួយ​ចំនួន​តូច​ប៉ុណ្ណោះ​ទេ​ ដែល​បាន​ទទួល​ វិញ្ញាបនប័ត្រ​ស្ដី​ពី​ការ​កាត់​បន្ថយ​ជាតិ​ការបោន​ឌីអុកស៊ីដ​នេះ។ រថភ្លើង​ក្រោម​ដី​ដេលី​ជា​បណ្ដាញ​ផ្លូវ​អយស្ម័យាន​ទី​មួយ​ ដែល​មាន​លក្ខណ:​ជា​ចាំ​បាច់នឹង​បាន​ទទួល​វិញ្ញាបនប័ត្រ​នេះ។

លោក​ស្រីអានូមីតា​ រ៉យ​ឈូឌូរី​ (Anumita Roy Choudhury)​ ធ្វើការ​នៅ​មជ្ឈមណ្ឌល​វិទ្យាសាស្ដ្រ​និង​បរិស្ថាន​ នៅ​ទី​ក្រុង​ ញូដេលី ។ លោកស្រី​ហៅ​រឿង​នេះ​ថា​ជា​ជំហាន​យ៉ាង​សំខាន់​មួយ​នៅ​ក្នុង​ការ​ប្រយុទ្ធ​របស់​សកលលោកក្នុង​ការ​កាត់​បន្ថយ​ឧស្ម័ន​ដែល​ធ្វើ​ឲ្យ​ផែនដី​ឡើងក្ដៅ។

«នេះ​ជា​សារ​មួយ​ ហើយ​នឹង​ជំហាន​មួយ​ដ៏​សំខាន់​ទៅ​មុខ។​ វា​មិន​មែន​ជា​ការ​ប្រមើល​មើល​រថភ្លើង​ក្រោម​ដី​តែ​ប៉ណ្ណោះ​ទេ​ ប៉ុន្ដែបើ​យើង​និយាយ​ថា​នៅ​ពេល​អនាគត​ទី​ក្រុង​នានា​ដែល​ក្លាយ​ទៅ​ជា​ទីក្រុង​ប្រើ​រថយន្ដ​កាន់​តែ​ច្រើន​ឡើងៗ​ ការ​កាត់​បន្ថយ​បញ្ហាផែន​ដី​ឡើង​កំដៅ​ នឹង​ក្លាយ​ទៅ​ជា​រឿង​លំបាក​ណាស់​ លុះ​ត្រា​ណា​តែ​យើងអាច​ធ្វើ​ឲ្យ​ប្រព័ន្ធ​ដឹកជញ្ជូន​សាធារណ:​មាន​សភាព​ល្អ​ប្រសើរ​ជាង​មុន»។

ក្រុម​អ្នក​ថែ​រក្សា​បរិស្ថាន​ បាន​ផ្ដោត​ការ​យក​ចិត្ដ​ទុក​ដាក់​ជា​យូរ​យា​មក​ហើយ​ទៅ​លើ​សេចក្ដី​ត្រូវ​ការ​កាត់​បន្ថយ​ការ​ប្រើ​រថយន្ដ​ ហើយ​នឹង​យាន​ជំនិះ​ដទៃ​ៗ​ទៀត​កុំ​ឲ្យ​បើក​បរ​លើ​ផ្លូវ​ចង្អៀត​នៅ​ក្នុង​ទីក្រុង​ធំៗ​នៃ​ប្រទេស​ឥណ្ឌា​ ដើម្បី​បន្ថយ​ការ​បញ្ចេញ​ឧស្ម័ន​ដែល​ធ្វើ​ឲ្យ​ផែន​ដី​ឡើង​កំដៅ។ មាន​ការ​ប៉ាន់​ស្មាន​វាយ​តម្លៃ​ថា​ រថភ្លើងក្រោម​ដីដេលី​ ធ្វើ​វិភាគ​ទាន​ក្នុង​ការ​បន្ថយ​ឧស្ម័ន​នេះ​ដោយ​បន្ថយ​ដំណើរ​តាម​រថ​យន្ដ​និង​យាន​ជំនិះ​ដទៃៗ​ទៀត​ចំនួន​៩​មឺន​ក្នុង​មួយ​ថ្ងៃ​ៗ។

រថភ្លើង​ក្រោម​ដី​ ដេលីបាន​ទទួល​វិញ្ញាបនប័ត្រ​របស់​អ.ស.ប.ស្ដី​ពី​ការ​កាត់​បន្ថយ​ជាតិការបោន​ឌីអុកស៊ីដ​យោង​ទៅ​តាម​គម្រោង​របស់​អ.ស.ប​. ដែល​ផ្ដល់​ហិរញ្ញ​វត្ថុ​ដើម្បី​លើក​ទឹក​ចិត្ដ​ទៅ​ឲ្យ​ក្រុម​ហ៊ុន​នា​នា​ នៅ​ក្នុង​ប្រទេស​កំពុង​អភិវឌ្ឃន៍​ដើម្បីបន្ថយ​ការ​បញ្ចេញ​ឧស្ម័ន​ដែល​ធ្វើ​ឲ្យ​ផែនដី​ឡើង​កំដៅ។​ លោកស្រី​ អានូមីតា​ រ៉យ​ឈូឌូរី​ សង្ឃឹម​ថា​ប្រព័ន្ធ​ដឹកជញ្ជូន​ច្រើន​ថែម​ទៀត​នឹង​មាន​លក្ខណ:ចាំ​បាច់​សម្រាប់​ទទួល​វិញ្ញាបនប័ត្រ​របស់​អ.ស.ប.ស្ដី​ពី​ការ​កាត់​បន្ថយ​ជាតិ​ការបោន​ឌីអុកស៊ីដ​នេះ។

«យើង​សង្ឃឹម​ថា​ នៅ​ពេល​អនាគត​គម្រោង​ដូច​គ្នា​នេះ​នឹង​ទទួល​ការ​លើក​ទឹក​ចិត្ដដែរ​ ពីព្រោះ​ការ​លើក​ទឹក​ចិត្ដនេះ​ពិត​ជា​មាន​សារ:សំខាន់​ណាស់​ដើម្បី​ធានា​ថា​ទីក្រុង​នានា​ ពិត​ជា​ផ្ដល់​ជម្រើស​ច្រើន​ទៀត​ក្នុង​ការ​ប្រើ​ប្រព័ន្ធ​ដឹក​ជញ្ជូន​សាធារណ:។ ពីព្រោះ​នៅ​ទី​បញ្ចប់​យើង​អាច​ទប់​ទល់​ឧស្ម័ន ការបោនឌីអុកស៊ីដ​ជា​ច្រើន​បាន​បើ​យើង​អាច​បន្ថយ​ការ​ពឹង​ពាក់​លើ​រថយន្ដ​ផ្ទាល់​ខ្លួន​បាន»។

រថភ្លើង​ក្រោម​ដី​ដេលីជា​រឿង​បាន​សម្រេច​ជោគជ័យ​កម្រ​មាន​មួយ​នៅ​ក្នុង​ប្រទេស​មួយ​ដែលគម្រោងរបស់​រដ្ឋាភិបាល​ជា​ញឹក​ញាប់​ណាស់ត្រូវ​បាន​រិះគន់​ ថាប្រើ​សម្ភារ:មាន​តម្លៃ​ថោក​ឬ​យក​ទៅ​ប្រើ​ប្រាស់​មិន​ត្រឹម​ត្រូវ​។ រថភ្លើង​ក្រោម​ដី​នេះ​ដែល​ស្អាត​ បើក​បរ​ដោយ​ទៀងទាត់​ពេល​វេលា​ ហើយ​នឹង​ថែទាំ​យ៉ាង​ដិតដល់​អស្ចារ្យ​ មាន​សភាព​ខុស​គ្នា​ស្រឡះពី​ហេត្ថា​រចនាសម្ព័ន្ធ​ទ្រុឌ​ទ្រោម​នៃ​ទីក្រុង​ឥណ្ឌា​នានា៕

ប្រែ​សម្រួល​ដោយ​ កងស៊ីវន

XS
SM
MD
LG