គ្មានករណីបើកវគ្គបំពាក់បំប៉នមន្ត្រីការិយាល័យបោះឆ្នោត ដោយគណបក្សនយោបាយណាមួយ ដូចការអះអាងរបស់គណបក្សភ្លើងទៀន អំឡុងពេលនៃការធ្វើយុទ្ធនាការឃោសនាបោះឆ្នោតទេ។ នេះជាការប្រកាសជាសាធារណៈរបស់ គណៈកម្មាធិការជាតិរៀបចំការបោះឆ្នោត (គ.ជ.ប)ដែលជាការឆ្លើយតបទៅនឹងសំណើរបស់ប្រធានគណបក្សភ្លើងទៀនដែលសុំឱ្យមានការពិនិត្យវគ្គបណ្តុះបណ្តាលមន្ត្រីបោះឆ្នោតនោះ។
ក្នុងលិខិតមួយចុះថ្ងៃទី២៥ ខែឧសភា ឆ្នាំ២០២២ នេះ គ.ជ.បបានប្រាប់លោក ទាវ វណ្ណុល ប្រធានគណបក្សភ្លើងទៀនថា កាលពីថ្ងៃទី២២ ខែឧសភា ឆ្នាំ២០២២ ពុំមានករណីបើកវគ្គបំពាក់បំប៉នមន្រ្តីការិយាល័យបោះឆ្នោតដោយគណបក្សនយោបាយណាមួយ ដូចការលើកឡើងរបស់គណបក្សភ្លើងទៀននោះទេ។
លិខិតដដែលរបស់គ.ជ.ប បានបន្ថែមថា កាលពីថ្ងៃទី២២ ខែឧសភាកន្លងទៅនោះ «គ.ជ.ប មិនទាន់បានជ្រើសរើស និងតែងតាំងសមាសភាពគណៈកម្មការការិយាល័យបោះឆ្នោត (គ.ក.ប) ណាមួយនៅឡើយទេ។ ហើយផ្អែកតាមប្រតិទិនការងាររបស់គ.ជ.ប ការប្រឡងជ្រើសរើសសមាសភាពគ.ក.ប សម្រាប់ការបោះឆ្នោតជ្រើសរើសក្រុមប្រឹក្សាឃុំ សង្កាត់ អាណត្តិទី៥ ឆ្នាំ២០២២ គឺត្រូវប្រព្រឹត្តទៅនៅថ្ងៃទី២៥ ខែឧសភា ឆ្នាំ២០២២។
លិខិតបំភ្លឺរបស់គ.ជ.បទៅនឹងសំណើរបស់គណបក្សភ្លើងទៀន កើតមានឡើង ក្រោយថ្នាក់ដឹកនាំគណបក្សប្រជាជនកម្ពុជាក្នុងរាជធានីភ្នំពេញ បានចេញលិខិតពីរដាច់ដោយឡែកពីគ្នាកាលពីថ្ងៃទី១៩ និងថ្ងៃទី២០ខែឧសភា និងដែលវីអូអេទទួលបាន ដើម្បីអញ្ជើញមន្ត្រីដែលត្រៀមបំពេញការងារជា ប្រធាន អនុប្រធាន និងលេខាការិយាល័យបោះឆ្នោត ដើម្បីចូលរួមវគ្គបំប៉ន មន្ត្រីការិយាល័យបោះឆ្នោតក្រុមប្រឹក្សា ឃុំសង្កាត់ អាណត្តិទី៥ ឆ្នាំ២០២២ ដែលគ្រោងរៀបចំនៅថ្ងៃទី២២ ខែឧសភា។
ការចេញលិខិតអញ្ជើញយ៉ាងដូច្នេះ បានធ្វើឱ្យគណបក្សមួយចំនួនមានការសង្ស័យ និងព្រួយបារម្ភពីការទិញទឹកចិត្ត នៅពេលមានការរៀបចំការបោះឆ្នោត ដែលអាចនាំឱ្យដំណើរការបោះឆ្នោតប្រព្រឹត្តទៅដោយមានបញ្ហាចម្រូងចម្រាសមួយចំនួន ទាក់ទងនឹងភាពសេរី ត្រឹមត្រូវ និងយុត្តិធម៌សម្រាប់ការបោះឆ្នោតជ្រើសរើសក្រុមប្រឹក្សាឃុំសង្កាត់ ដែលនឹងរៀបចំឡើងនៅថ្ងៃទី៥ ខែមិថុនា ខាងមុខ។
អ្នកនាំពាក្យគណៈកម្មាធិការជាតិរៀបចំការបោះឆ្នោត លោក ហង្ស ពុទ្ធា បានប្រាប់វីអូអេនៅថ្ងៃព្រហស្បតិ៍នេះថា គ.ជ.ប នឹងមិនបើកការស្រាវជ្រាវបន្ត ជុំវិញករណីពាក់ព័ន្ធនឹងលិខិតអញ្ជើញនោះទេ ដោយថា ស្ថាប័នរៀបចំការបោះឆ្នោតជាតិគ្មានទំនាក់ទំនងជាមួយនឹងគណបក្សនយោបាយណាមួយឡើយ។
លោកបានថ្លែងថា៖ «មិនមានការស៊ើបអង្កេតនោះទេ ដោយសារគ.ជ.ប.មិនមានទំនាក់ទំនងអ្វីពាក់ព័ន្ធនឹងខាងគណបក្សនយោបាយណាមួយនោះទេ។ ផ្ទុយទៅវិញគឺ គ.ជ.ប.ខិតខំបំពេញតួនាទីរបស់ខ្លួន ទទួលខុសត្រូវបម្រើសេវាបោះឆ្នោតជូនប្រជាពលរដ្ឋ។ ហើយបើមានការចោទប្រកាន់គ.ជ.ប.មានតួនាទីក្នុងការបំភ្លឺ និងឆ្លើយតបទៅវិញបាទ»។
បើតាមអ្នកនាំពាក្យរបស់គ.ជ.ប គណបក្សនយោបាយគ្មានសិទ្ធិណាមួយក្នុងការអញ្ជើញមន្រ្តីការិយាល័យបោះឆ្នោតទៅចូលរួមក្នុងវគ្គបំពាក់បំប៉នណាមួយនោះទេ។
មន្រ្តីសម្របសម្រួលជាន់ខ្ពស់នៃអង្គការខុមហ្វ្រែល លោក កន សាវាង្ស និយាយថា លោកចង់ឃើញគ.ជ.ប.ស៊ើបអង្កេតលម្អិតបន្ថែមទាក់ទិនប្រភពនៃលិខិតអញ្ជើញខាងលើ ដែលបង្កឱ្យមានការសង្ស័យ ឬមន្ទិលផ្សេងៗ ដល់ភាគីពាក់ព័ន្ធនៅក្នុងដំណើរការនៃការបោះឆ្នោតឃុំសង្កាត់នៅឆ្នាំ២០២២នេះ។ លោកបានបន្តថា បើមិនដូច្នេះទេ អព្យាក្រឹត្យភាពរបស់គ.ជ.ប.អាចបង្កឱ្យមានការរិះគន់។
លោកបានថ្លែងថា៖ «សំខាន់ជាងគេស្ថាប័នគ.ជ.ប.គួរតែធ្វើការសិក្សាវិភាគមើល ឬក៏រកឱ្យឃើញនៅក្នុងដំណើរការនៃរឿងហ្នឹង។ ហេតុអី? ដោយសារតែការបដិសេធតែមាត់ វាមិនមែនជាអំណះអំណាងមួយសមស្របនៅក្នុងការកើតឡើងទេ។ បើសិនជាមានពាក្យបណ្តឹង ឬក៏ការមិនសុខចិត្ត គួរតែពិនិត្យមើលថាតើប្រភពមកពីខាងណាឱ្យច្បាស់លាស់»។
អនុប្រធានគណបក្សភ្លើងទៀន លោក សុន ឆ័យ បញ្ជាក់សាជាថ្មីថា គណបក្សរបស់លោកមិនអាចធ្វើអ្វីច្រើនក្រៅពីស្នើសុំឱ្យគ.ជ.ប.មានការត្រួតពិនិត្យ ឬស៊ើបអង្កេតឱ្យច្បាស់លាស់ជុំវិញករណីខាងលើនេះ និងស្នើឱ្យស្ថាប័នទទួលបន្ទុកលើការបោះឆ្នោតនៅកម្ពុជាមួយនេះកុំបញ្ជូនភ្នាក់ងាររបស់ខ្លួនទៅចូលរួមក្នុងវគ្គបំពាក់បំប៉នរៀបចំឡើងដោយគណបក្សនយោបាយណាមួយ។
លោកបានថ្លែងថា៖ «អាហ្នឹង យើងខ្ញុំមិនដឹងធ្វើយ៉ាងម៉េចទេ។ គ្រាន់តែថា សុំឱ្យគ.ជ.ប.មេត្តារំឭកទៅដល់ភ្នាក់ងាររបស់ខ្លួន សុំកុំឱ្យចូលទៅប្រជុំជាមួយគណបក្សនយោបាយណាមួយ ទៅស្តាប់ការណែនាំរបស់គេ។ បើមានហេតុការណ៍នោះកើតមាន សុំជួយណែនាំទៅដល់ភ្នាក់ងារទាំងអស់ បើទោះបីជាគាត់ជាសមាជិកគណបក្សណាក៏ដោយ មិនត្រូវទទួលណែនាំក្នុងការបំពេញភារកិច្ចជាភ្នាក់ងារឯករាជ្យនោះទេ។ ការចូលរួមស្តាប់ការណែនាំ វាអាចទៅជាការចូលរួមទៅប្រព្រឹត្តអំពើខុសច្បាប់»។
ការបោះឆ្នោតក្រុមប្រឹក្សាឃុំសង្កាត់នឹងប្រព្រឹត្តទៅនៅថ្ងៃទី៥ ខែមិថុនា ខាងមុខ។ នៅក្នុងការបោះឆ្នោតជ្រើសរើសមេដឹកនាំមូលដ្ឋាន សម្រាប់អាណត្តិទី៥នេះទៀតសោត គណបក្សនយោបាយបានដាក់បេក្ខជនឈរឈ្មោះចំនួនជាង ៨២.៧០០ នាក់ សម្រាប់ឃុំសង្កាត់ចំនួន ១.៦៥២នៅទូទាំងប្រទេស។ ការឃោសនារបស់គណបក្សនីមួយៗនឹងមានរយៈពេល១៤ថ្ងៃ។ នេះបើតាមស្ថាប័នរៀបចំបោះឆ្នោតជាតិគ.ជ.ប៕
គ.ជ.បច្រានចោលការអះអាងរបស់បក្សភ្លើងទៀនថាបក្សកាន់អំណាចគ្រោងបើកវគ្គបំពាក់បំប៉នមន្ត្រីរៀបចំការបោះឆ្នោត
ភ្នំពេញ —
